Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 28 | |
28:1 | Есть бо сребру место, отюнудуже и бывает, и место злату, отюнудуже очищается. |
28:2 | Железо бо из земли раждается, медь же равно камению сечется. |
28:3 | Чин положи тме, и вся концы сам испытует, камык тмы и сень смерти. |
28:4 | Пресечение потока от праха: забывающии же путь правый изнемогоша, от человек подвигошася. |
28:5 | Есть земля, из неяже изыдет хлеб: под нею обратися яко огнь. |
28:6 | Место сапфира камение ея, и персть злато ему. |
28:7 | Стезя, не позна ея птица, и не узре ю око супово, |
28:8 | и не ходиша по ней сынове величавых, и не прейде по ней лев. |
28:9 | На несекоме камени простре руку свою, преврати же из корения горы: |
28:10 | бреги рек расторже, всякое же честное виде око мое: |
28:11 | глубины же рек откры и показа силу свою на свет. |
28:12 | Премудрость же откуду обретеся? И кое место есть ведения? |
28:13 | Не весть человек пути ея, ниже обретеся в человецех. |
28:14 | Бездна рече: несть во мне: и море рече: несть со мною. |
28:15 См.: 🔗Пс. 18:11 🔗Пс. 118:72 | Не дастся сокровище за ню, и не извесится сребро на изменение ея, |
28:16 См.: 🔗Прит. 8:11 🔗Прем. 7:9 | и не сравнится со златом Софирским, со ониксом честным и сапфиром: |
28:17 | не равно будет ей злато и кристаль, и изменение ея сосуди злати. |
28:18 | Превысокая и бисерие не помянутся, и притяжи премудрость паче внутреннейших: |
28:19 | не уравнится ей топазий Ефиопский, со златом чистым не сравнится. |
28:20 | Премудрость же откуду обретеся? И кое место есть разуму? |
28:21 | Утаися от всякаго человека, и от птиц небесных скрыся. |
28:22 | Пагуба и смерть рекосте: слышахом ея славу. |
28:23 См.: 🔗Вар. 3:32 | Бог благо позна ея путь: Сам бо весть место ея. |
28:24 | Ибо Сам поднебесную всю надзирает, ведый, яже на земли, вся, яже сотвори. |
28:25 | Ветров вес и воде меру егда сотворил, |
28:26 См.: 🔗Иов. 38:25 | тако видяй сочте, и путь в сотрясении гласов, |
28:27 | тогда виде ю и поведа ю, уготовав изследи |
28:28 См.: 🔗Прит. 1:7 | и рече человеку: се, благочестие есть премудрость, а еже удалятися от зла есть ведение. |