Книга Притчей Соломоновых, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1	Сыне, аще приим глагол моея заповеди, скрыеши в себе,
2:2 См.: 🔗Лк. 8:18	послушает премудрости твое ухо, и приложиши сердце твое к разуму: приложиши же е в наказание сыну твоему.
2:3	Аще бо премудрость призовеши и разуму даси глас твой, чувство же взыщеши великим гласом,
2:4 См.: 🔗Мф. 13:44	и аще взыщеши ея яко сребра, и якоже сокровища испытаеши ю:
2:5	тогда уразумееши страх Господень и познание Божие обрящеши:
2:6 См.: 🔗3Цар. 3:9 🔗Иов. 32:8 🔗Прем. 7:15 🔗Кол. 2:3	яко Господь дает премудрость, и от лица Его познание и разум:
2:7 См.: 🔗Пс. 83:12	и сокровищствует исправляющым спасение, защищает же шествие их,
2:8	еже сохранити пути оправданий, и путь благоговеинствующих Его сохранит.
2:9	Тогда уразумееши правду и суд и исправиши вся стези благия.
2:10	Аще бо приидет премудрость в твою мысль, чувство же твоей души добро быти возмнится.
2:11	Совет добр сохранит тя, помышление же преподобное соблюдет тя,
2:12	да избавит тя от пути злаго и от мужа, глаголюща ничтоже верно.
2:13 См.: 🔗Иов. 23:14 🔗Ин. 3:19	О, оставившии пути правыя, еже ходити в путех тмы!
2:14	О, веселящиися о злых и радующиися о развращении злем!
2:15	Ихже стези стропотны, и крива течения их, еже далече тя сотворити от пути права,
2:16	и чужда от праведнаго разума. Сыне, да тя не постигнет совет злый,
2:17	оставляяй учение юности, и завета Божественнаго забывый:
2:18	постави бо при смерти дом свой и при аде с земными деяния своя.
2:19	Вси ходящии по нему не возвратятся, ниже постигнут стезь правых: ни бо достигнут лет жизни.
2:20	Аще бо быша ходили в стези благия, обрели убо быша стези правы гладки: блази будут жителие на земли, незлобивии же останут на ней:
2:21 См.: 🔗Пс. 36:9 🔗Мф. 5:5	яко правии вселятся на земли, и преподобнии останут на ней.
2:22 См.: 🔗Иов. 18:17	Путие нечестивых от земли погибнут, пребеззаконнии же изринутся от нея.