Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 12 | |
12:1 См.: 🔗1Цар. 8:7 🔗1Цар. 11:15 | И рече Самуил ко всем мужем Израилевым: се, послушах гласа вашего о всех, елика ми ресте, и поставих над вами царя: |
12:2 См.: 🔗Чис. 27:17 | и се, ныне царь предходит пред вами, аз же состарехся и седети буду, и сынове мои се с вами: и аз се, ходих пред вами от юности моея и даже до днешняго дне: |
12:3 См.: 🔗Сир. 46:22 🔗Деян. 20:33 | се, аз, отвещайте на мя пред Господем и пред христом Его, еда у кого телца взях, или осля, или кого от вас насилствовах, или кого утесних, или от руку некоего приях мзду, или обущу? Извещайте на мя, и возвращу вам. |
12:4 | И реша к Самуилу: не обидел еси нас, ниже насилствовал еси нам, ниже утеснил еси нас, ниже взял еси от руки чиея что. |
12:5 | И рече Самуил к людем: свидетель есть Господь в вас, и свидетель христос Его днесь в сей день, яко ничтоже обретосте в руку моею. И реша людие: свидетель. |
12:6 | И рече Самуил к людем, глаголя: свидетель Господь сотворивый Моисеа и Аарона и изведый от земли Египетския отцы нашя: |
12:7 | и ныне предстаните, и разсуждуся с вами пред Господем и возвещу вам вся оправдания Господня, яже сотвори вам и отцем вашым: |
12:8 См.: 🔗Быт. 46:6 | егда вниде Иаков и сынове его во Египет, и смириша их Египтяне: и возопиша отцы наши ко Господу, и посла Господь Моисеа и Аарона, и изведе отцы нашя из Египта и всели их на месте сем: |
12:9 См.: 🔗Суд. 4:2 | и забыша Господа Бога своего, и вдаде я в руце Сисаре архистратигу Иавина царя Асорска, и в руки иноплеменничи, и в руки царя Моавска, и воеваша их: |
12:10 | и возопиша ко Господу и реша: согрешихом, яко оставихом Господа и поработахом Ваалиму и Дубравам, и ныне изми ны от рук враг наших, и поработаем Тебе: |
12:11 | и посла Господь Иероваала и Варака и Иеффая и Самуила, и изят вы из рук враг ваших окрестных, и обитасте уповающе: |
12:12 См.: 🔗1Цар. 8:5 | и весте, яко Наас царь сынов Аммоних прииде на вы, и ресте: ни, но царь да царствует над нами: егда Господь Бог царствова над вами: |
12:13 | и се, ныне царь, егоже избрасте и егоже просисте: и се, даде Господь над вами царя: |
12:14 См.: 🔗Втор. 7:12 | аще убоитеся Господа и поработаете Ему, и послушаете гласа Его и не воспротивитеся устом Господним, и будете и вы и царь царствуяй над вами вслед Господа ходяще: то рука Господня не будет на вас: |
12:15 См.: 🔗Втор. 1:26 🔗Втор. 2:15 | аще же не послушаете гласа Господня и воспротивитеся устом Господним, будет рука Господня на вас и на царя вашего: |
12:16 | и ныне станите и видите глаголгол сей великий, егоже сотворит Господь пред очима вашима: |
12:17 См.: 🔗Прит. 26:1 🔗1Цар. 8:7 | несть ли жатва пшеницы днесь? Призову Господа, и даст громы и дождь, и уразумеете и увидите, яко злоба ваша велика, юже сотвористе пред Господем, испросивше себе царя. |
12:18 | И призва Самуил Господа, и даде Господь гром и дождь в той день: и убояшася вси людие зело Господа и Самуила, |
12:19 См.: 🔗Исх. 20:19 | и реша вси людие к Самуилу: помолися о рабех твоих ко Господу Богу твоему, да не умрем: яко приложихом ко всем грехом нашым злобу, просяще себе царя. |
12:20 | И рече Самуил к людем: не бойтеся: вы сотвористе всю злобу сию: токмо не уклонитеся от последования Господня и поработайте Господу всем сердцем вашим, |
12:21 | и не преступите вслед ничтоже сущих, иже не пособствуют и не изимут, яко ничтоже суть: |
12:22 | понеже не отринет Господь людий Своих имене ради Своего великаго, яко кротце Господь прият вас Себе в люди: |
12:23 См.: 🔗1Цар. 7:8 🔗3Цар. 8:36 | и да никакоже ми согрешити Господу, оставити еже молитися о вас ко Господу, и поработаю Господеви и покажу вам путь благ и прав, |
12:24 См.: 🔗4Цар. 17:39 | токмо бойтеся Господа и работайте Ему во истине и всем сердцем вашим, яко видите яже великая сотвори Господь с вами: |
12:25 См.: 🔗Ис. 24:2 | и аще злобою зло сотворите, то вы и царь ваш погибнете. |