Книга пророка Исаии, глава 60

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 60
60:1 См.: 🔗Ис. 52:1 🔗Лк. 1:78 🔗Ин. 1:9	Светися, светися Иерусалиме, прииде бо твой свет, и слава Господня на тебе возсия.
60:2 См.: 🔗Еф. 4:18	Се, тма покрыет землю, и мрак на языки, на тебе же явится Господь, и слава Его на тебе узрится.
60:3 См.: 🔗Лк. 2:32	И пойдут царие светом твоим, и языцы светлостию твоею.
60:4 См.: 🔗Отк. 21:24 🔗Ис. 49:22 🔗Ис. 66:12	Возведи окрест очи твои и виждь собраная чада твоя: се, приидоша вси сынове твои издалеча, и дщери твоя на рамех возмутся.
60:5 См.: 🔗Деян. 11:18	Тогда узриши и возрадуешися, и убоишися и ужаснешися сердцем, яко преложится к тебе богатство морское и языков и людий:
60:6 См.: 🔗Пс. 71:10	и приидут к тебе стада велблюд, и покрыют тя велблюди Мадиамстии и Гефарстии: вси от Савы приидут, носяще злато, и Ливан принесут и камень честен, и спасение Господне благовозвестят:
60:7 См.: 🔗Ис. 11:14 🔗Ис. 42:11 🔗Мал. 1:11	и вся овцы Кидарския соберутся тебе, и овни Навеофстии приидут к тебе, и вознесутся приятная на жертвенник Мой, и дом молитвы Моея прославится.
60:8	Кии суть, иже яко облацы летят, и яко голубие со птенцы ко мне?
60:9	Мене острови ждаша, и корабли Фарсийстии во первых, привести чада твоя издалеча, и сребро и злато их с ними, имене ради Господня Святаго, и за еже Святому Израилеву славну быти.
60:10 См.: 🔗Пс. 29:6	И созиждут сынове инороднии стены твоя, и царие их предстояти будут тебе: за гнев бо Мой поразих тя и за милость Мою возлюбих тя.
60:11 См.: 🔗Отк. 21:25	И отверзутся врата твоя присно, день и нощь не затворятся, ввести к тебе силу язык и цари их ведомыя.
60:12 См.: 🔗Иер. 12:17 🔗Зах. 14:17	Языцы бо и царие, иже не поработают ти, погибнут, и языцы запустением запустеют.
60:13 См.: 🔗Ис. 35:1	И слава Ливанова к тебе приидет, кипарисом и певгом и кедром вкупе, прославити место святое Мое, и место ногу Моею прославлю.
60:14	И пойдут к тебе боящеся сынове смиривших тя и раздраживших тя, и поклонятся следам ногу твоею вси прогневавшии тя, и наречешися град Господень, Сион Святаго Израилева.
60:15 См.: 🔗Ис. 35:10	За сие, яко был еси оставлен и возненавиден и не бе помагающаго ти, положу тя в радость вечную, веселие родом родов.
60:16 См.: 🔗Ис. 49:23	И изссеши млеко языков и богатство царей снеси, и уразумееши, яко Аз Господь Спасаяй тя и Избавляяй тя Бог Израилев.
60:17 См.: 🔗Ис. 54:11	И вместо меди принесу ти злато, и вместо железа принесу ти сребро, и вместо древес принесу ти медь, и вместо камения железо: и вдам князи твоя в мир и надзиратели твоя в правду.
60:18	И не услышится посем неправда в земли твоей, ни сокрушение ни бедность во пределех твоих, но прозовется спасение забрала твоя и врата твоя хвала.
60:19 См.: 🔗Отк. 22:5	И не будет тебе ктому солнце во свет дне, ниже восход луны просветит твою нощь, но будет тебе Господь свет вечный и Бог слава твоя.
60:20 См.: 🔗Ис. 42:7	Не зайдет бо солнце тебе, и луна не оскудеет тебе: будет бо Господь тебе свет вечный, и исполнятся дние рыдания твоего.
60:21 См.: 🔗Ис. 52:1 🔗Ис. 61:3 🔗Отк. 21:27	И людие твои вси праведнии в век наследят землю, храняще сад дела руку Его в славу.
60:22 См.: 🔗Быт. 15:5	Малый будет в тысящы, а малейший во язык велик: Аз Господь по времени соберу их.