Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 17 | |
17:1 См.: 🔗4Цар. 15:30 🔗4Цар. 18:9 | В лето второенадесять Ахаза царя Иудина, царствова Осиа сын Илы в Самарии над Израилем девять лет, |
17:2 | и сотвори лукавое пред очима Господнима, обаче не якоже царие Израилевы, иже беша прежде его. |
17:3 | И взыде нань Саламанассар царь Ассирийск . И бысть ему Осиа раб и даваше ему дань. |
17:4 См.: 🔗Ос. 7:12 | И обрете царь Ассирийск во Осии неправду, занеже посла послы к Сигору царю Египетску и не принесе дани царю Ассирийску лета того. И осади его царь Ассирийский и связа его в храмине темничней. |
17:5 См.: 🔗4Цар. 18:10 | И прииде царь Ассирийск во всю землю (его), и взыде в Самарию, и воева ю три лета. |
17:6 См.: 🔗4Цар. 18:10 | В лето девятое Осии взя царь Ассирийский Самарию, и заведе Израилтян во Ассирию, и посели их на Алаи и на Аворе, реках Гозанских, и в пределех Мидских. |
17:7 | И (сие) бысть, яко согрешиша сынове Израилевы Господу Богу своему изведшему их из земли Египетския, из под руки фараона царя Египетска, и убояшася богов инех, |
17:8 | и ходиша по преданием языков, ихже истреби Господь от лица сынов Израилевых, и царие Израилевы елицы сотвориша, |
17:9 | и елицы сокрыша сынове Израилевы словеса, не тако на Господа Бога своего: и создаша себе высокая во всех градех своих, от столпа стрегущих даже до града тверда, |
17:10 См.: 🔗Лев. 26:1 | и поставиша себе кумиры и Дубравы на всяцем холме высоце и под всяким древом чащным, |
17:11 | и кадяху тамо на всех высоких, якоже языцы, яже удали Господь от лица их, и сотвориша общники, и начаша яве прогневляти Господа, |
17:12 | и послужиша идолом, о нихже рече им Господь: не сотворите глагола сего Господеви. |
17:13 См.: 🔗Иер. 25:5 | И засвидетелствова Господь во Израили и во Иуде, и руками всех пророк Своих всякаго прозорливаго, глаголя: обратитеся от путий ваших лукавых, и сохраните заповеди Моя и оправдания Моя, и весь закон, егоже заповедах отцем вашым, елика послах им руками раб Моих пророков. |
17:14 См.: 🔗Исх. 32:9 🔗Втор. 31:27 | И не послушаша, и ожесточиша выю свою паче выи отец своих, иже не вероваша Господу Богу своему: |
17:15 См.: 🔗Рим. 1:21 🔗Лев. 18:24 | и отвергоша завет Его и оправдания, яже завеща отцем их и свидений Его, елика засвидетелствова им, не сохраниша, и идоша вслед суетных и осуетишася, и вслед языков сущих окрест их, о нихже заповеда Господь их, еже не сотворити по сему: |
17:16 | и оставиша заповеди Господа Бога своего и сотвориша себе две юницы слиты, и сотвориша дубравы, и поклонишася всей силе небесней и послужиша Ваалу: |
17:17 | и превождаху сыны своя и дщери своя чрез огнь, и волхвоваху волхвованием и вражаху: и продашася, еже творити лукавое пред очима Господнима, еже прогневати Его. |
17:18 | И разгневася Господь на Израиля зело и отрину их от лица Своего, и не остася, токмо едино колено Иудино. |
17:19 | И Иуда такожде не сохрани заповедий Господа Бога своего: и хождаху по оправданием Израилевым, яже сотвориша, и отвергошася Господа. |
17:20 | И разгневася Господь на все семя Израилево и поколеба я, и даде я в руки расхищающым я дондеже отверже я от лица Своего. |
17:21 См.: 🔗3Цар. 12:16 | Яко отторжеся Израиль от дому Давидова, и поставиша себе царя Иеровоама сына Наватова: и отрину Иеровоам Израиля от Господа и введе их во грех великий. |
17:22 См.: 🔗3Цар. 12:30 🔗4Цар. 13:2 | И хождаху сынове Израилевы по всему греху Иеровоамлю, егоже сотвори: не отступиша от него, |
17:23 См.: 🔗Иер. 25:4 | дондеже отверже Господь Израиля от лица Своего, якоже глагола Господь рукою всех раб Своих пророков. И преселен бысть Израиль от земли своея во Ассирианы, даже до дне сего. |
17:24 См.: 🔗1Езд. 4:10 | И приведе царь Ассирийский из Вавилона иже от Хуфы и от Аиа, и от Емафа и Сепфаруима, и вселени быша во градех Самарийских вместо сынов Израилевых, и наследиша Самарию и вселишася во градех ея. |
17:25 См.: 🔗Лев. 26:22 | И бысть в начале седения их, не убояшася Господа, и пусти на ня Господь львы, и бяху убивающе я. |
17:26 | И реша царю Ассирийску, глаголюще: языки, ихже превел и пресадил еси во градех Самарийских, не разумеша суда Бога земли, и посла Господь на них львы, и се, суть убивающе их, яко не разумеша суда Бога земли. |
17:27 | И заповеда царь Ассирийский глаголя: отведите тамо единаго жерца от плененых, да идут и да вселятся тамо, и да просветит их судом Бога земли. |
17:28 См.: 🔗1Езд. 4:2 | И отведоша единаго от жерцев ихже взяша от Самарии, и седе в Вефили, и бе просвещая жрец их, яко да убоятся Господа. |
17:29 См.: 🔗Ион. 1:5 🔗Рим. 1:23 | И беша творяще кийждо язык боги своя: и поставиша я во храмех на высоких, ихже сотвориша Самаряне, кийждо язык во градех своих, в нихже живяху. |
17:30 | И мужие Вавилонстии сотвориша Сокхоф Вениф, и мужие Хуфовы сотвориша Гигель, и мужие Емафовы сотвориша Асимаф, |
17:31 См.: 🔗Ис. 36:19 | и Евее сотвориша Авлазер и Фарфак и Сепфаруим, егда сожигаху сыны своя огнем Андрамелеху и Анемелеху, богом Сепфаруимским. |
17:32 | И бяху боящеся Господа: и вселиша мерзости своя во храмех на высоких, ихже сотвориша в Самарии, кийждо язык во граде, в немже живяху. |
17:33 | И беша боящеся Господа и сотвориша себе жерцы в высоких, и сотвориша себе в храмине высоких и Господа бояхуся, и идолом своим служаху по обычаю языков отюнудуже преселиша их. |
17:34 | Даже до дне сего тии творяху по обычаю их: не бояхуся Господа, и не творяху по оправданием их, и по суду их, и по закону, и по заповеди, юже заповеда Господь сыном Иаковлим, идеже и нарече имя ему Израиль. |
17:35 | И положи Господь с ними завет и заповеда им, глаголя: не убойтеся богов иных и не поклонитеся им, и не послужите им и не пожрите им: |
17:36 См.: 🔗Исх. 6:6 | но токмо Господеви, иже изведе вы из земли Египта крепостию великою и мышцею высокою: Того убойтеся, и Тому поклонитеся, и Тому пожрите: |
17:37 См.: 🔗Быт. 26:5 | и оправдания Его, и суды Его, и закон Его, и заповеди, яже написа вам творити, храните во вся дни, и не убойтеся богов иных: |
17:38 | и завета, егоже завеща с вами, не забывайте: и не убойтеся богов иных, |
17:39 | но токмо Господа и вашего убойтеся, и Той измет вы от всех враг ваших. |
17:40 | И не послушаша сего, но по обычаем своим преждним твориша. |
17:41 См.: 🔗1Езд. 4:3 🔗Ин. 4:22 | И бяху языцы сии боящеся Господа, и изваянным своим служаще: такожде и сынове их и сынове сынов их, якоже сотвориша отцы их, тако творят и до сего дне. |