Псалтирь, псалом 54

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Псаломъ 54
54:1	В конец, в песнех разума, Асафу, псалом.
54:2 См.: 🔗Пс. 53:4	Внуши, Боже, молитву мою и не презри моления моего:
54:3	вонми ми и услыши мя: возскорбех печалию моею, и смятохся
54:4 См.: 🔗2Цар. 17:1	от гласа вражия и от стужения грешнича: яко уклониша на мя беззаконие и во гневе враждоваху ми.
54:5	Сердце мое смятеся во мне, и боязнь смерти нападе на мя:
54:6	страх и трепет прииде на мя, и покры мя тма.
54:7	И рех: кто даст ми криле яко голубине? И полещу, и почию.
54:8	Се, удалихся бегая и водворихся в пустыни.
54:9	Чаях Бога спасающаго мя от малодушия и от бури.
54:10	Потопи, Господи, и раздели языки их: яко видех беззаконие и пререкание во граде.
54:11 См.: 🔗Чис. 23:21	Днем и нощию обыдет и по стенам его: беззаконие и труд посреде его, и неправда:
54:12	и не оскуде от стогн его лихва и лесть.
54:13	Яко аще бы враг поносил ми, претерпел бых убо: и аще бы ненавидяй мя на мя велеречевал, укрылбыхся от него.
54:14 См.: 🔗Мф. 26:23 🔗Ин. 13:18 🔗Деян. 1:16	Ты же, человече равнодушне, владыко мой и знаемый мой,
54:15	иже купно наслаждался еси со мною брашен: в дому Божии ходихом единомышлением.
54:16	Да приидет же смерть на ня, и да снидут во ад живи: яко лукавство в жилищих их, посреде их.
54:17	Аз к Богу воззвах, и Господь услыша мя.
54:18 См.: 🔗Дан. 6:10	Вечер и заутра и полудне повем и возвещу, и услышит глас мой.
54:19	Избавит миром душу мою от приближающихся мне: яко во мнозе бяху со мною.
54:20 См.: 🔗Пс. 9:8	Услышит Бог, и смирит я сый прежде век: несть бо им изменения, яко не убояшася Бога.
54:21	Простре руку свою на воздаяние: оскверниша завет Его.
54:22 См.: 🔗Пс. 56:5	Разделишася от гнева лица Его, и приближишася сердца их: умякнуша словеса их паче елеа, и та суть стрелы.
54:23 См.: 🔗Мф. 6:25 🔗Лк. 12:22 🔗1Пет. 5:7	Возверзи на Господа печаль твою, и Той тя препитает: не даст в век молвы праведнику.
54:24 См.: 🔗Прит. 26:27 🔗Пс. 68:16 🔗4Цар. 1:4	Ты же, Боже, низведеши их в студенец истления: мужие кровей и льсти не преполовят дний своих. Аз же, Господи, уповаю на Тя.