Первое послание апостола Павла к Коринфянам, глава 15

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 15
15:1 См.: 🔗Гал. 1:11	Сказую же вам, братие, Благовествование, еже благовестих вам, еже и приясте, в немже и стоите,
15:2 См.: 🔗Рим. 1:16	имже и спасаетеся, кацем словом благовестих вам, аще содержите: разве аще не всуе веровасте.
15:3 См.: 🔗Пс. 21:7 🔗Ис. 53:5 🔗Дан. 9:24 🔗Зах. 13:7	Предах бо вам исперва, еже и приях, яко Христос умре грех наших ради, по Писанием,
15:4 См.: 🔗Пс. 15:10 🔗Ис. 53:11 🔗Ос. 6:2 🔗Ион. 2:1	и яко погребен бысть, и яко воста в третий день, по Писанием,
15:5 См.: 🔗Мф. 28:17 🔗Мк. 16:14 🔗Лк. 24:34	и яко явися Кифе, таже единонадесятим:
15:6	потом же явися боле пяти сот братиям единою, от нихже множайшии пребывают доселе, нецыи же и почиша:
15:7	потом же явися Иакову, таже Апостолом всем:
15:8 См.: 🔗Деян. 9:3	последи же всех, яко некоему извергу, явися и мне.
15:9 См.: 🔗Деян. 8:3 🔗Еф. 3:8 🔗1Тим. 1:13	Аз бо есмь мний Апостолов, иже несмь достоин нарещися Апостол, зане гоних церковь Божию.
15:10 См.: 🔗Мф. 10:20 🔗Мк. 16:20 🔗Еф. 3:7	Благодатию же Божиею есмь, еже есмь, и благодать Его, яже во мне, не тща бысть, но паче всех их потрудихся: не аз же, но благодать Божия, яже со мною.
15:11	Аще убо аз, аще ли они, тако проповедуем, и тако веровасте.
15:12 См.: 🔗Деян. 17:18 🔗2Тим. 2:18	Аще же Христос проповедуется, яко из мертвых воста, како глаголют нецыи в вас, яко воскресения мертвых несть?
15:13 См.: 🔗Ин. 11:25 🔗Рим. 8:11	И аще воскресения мертвых несть, то ни Христос воста:
15:14	аще же Христос не воста, тще убо проповедание наше, тща же и вера ваша.
15:15	Обретаемся же и лжесвидетеле Божии, яко послушествовахом на Бога, яко воскреси Христа, Егоже не воскреси, аще убо мертвии не востают:
15:16	аще бо мертвии не востают, то ни Христос воста:
15:17 См.: 🔗Деян. 13:38 🔗Рим. 4:25	аще же Христос не воста, суетна вера ваша, еще есте во гресех ваших:
15:18	убо и умершии о Христе, погибоша.
15:19	(И) аще в животе сем точию уповающе есмы во Христа, окаяннейши всех человек есмы.
15:20 См.: 🔗Деян. 26:23 🔗Кол. 1:18 🔗Отк. 1:5	Ныне же Христос воста от мертвых, начаток умершым бысть.
15:21 См.: 🔗Быт. 2:17 🔗Быт. 3:19 🔗Ин. 6:39	Понеже бо человеком смерть (бысть), и человеком воскресение мертвых.
15:22	Якоже бо о Адаме вси умирают, такожде и о Христе вси оживут,
15:23 См.: 🔗1Фес. 4:15	кийждо же во своем чину: начаток Христос, потом же Христу веровавшии в пришествии Его.
15:24 См.: 🔗Дан. 7:14 🔗Мф. 28:18 🔗1Тим. 6:15	Таже кончина, егда предаст Царство Богу и Отцу, егда испразднит всяко началство и всяку власть и силу:
15:25 См.: 🔗Пс. 109:1 🔗Деян. 2:34 🔗Евр. 1:13	подобает бо Ему царствовати, дондеже положит вся враги под ногама Своима.
15:26 См.: 🔗Отк. 20:14	Последний же враг испразднится смерть,
15:27 См.: 🔗Пс. 8:7 🔗Евр. 2:8	вся бо покори под нозе Его: внегда же рещи, яко вся покорена суть Ему, яве, яко разве Покоршаго Ему вся.
15:28 См.: 🔗1Кор. 11:3	Егда же покорит Ему всяческая, тогда и Сам Сын покорится Покоршему Ему всяческая, да будет Бог всяческая во всех.
15:29	Понеже что сотворят крестящиися мертвых ради? Аще отнюд мертвии не востают, что и крещаются мертвых ради?
15:30 См.: 🔗2Кор. 11:26	Почто (же) и мы беды приемлем на всяк час?
15:31 См.: 🔗Рим. 8:36	По вся дни умираю: тако ми ваша похвала, братие, юже имам о Христе Иисусе Господе нашем.
15:32 См.: 🔗Прем. 2:6 🔗Ис. 22:13 🔗Лк. 12:19	Аще (бо) по человеку со зверем боряхся в Ефесе, кая ми польза, аще мертвии не востают? Да ямы и пием, утре бо умрем.
15:33	Не льститеся: тлят обычаи благи беседы злы.
15:34 См.: 🔗Рим. 13:11	Истрезвитеся праведно и не согрешайте: неведение бо Божие нецыи имут, к сраму вам глаголю.
15:35	Но речет некто: како востанут мертвии? Коим же телом приидут?
15:36 См.: 🔗Ин. 12:24	Безумне, ты еже сееши, не оживет, аще не умрет:
15:37	и еже сееши, не тело будущее сееши, но голо зерно, аще случится, пшеницы или иного от прочих:
15:38	Бог же дает ему тело, якоже восхощет, и коемуждо семени свое тело.
15:39	Не всяка плоть таже плоть: но ина убо плоть человеком, ина же плоть скотом, ина же рыбам, ина же птицам.
15:40	И телеса небесная, и телеса земная: но ина убо небесным слава, и ина земным:
15:41	ина слава солнцу, и ина слава луне, и ина слава звездам: звезда бо от звезды разнствует во славе.
15:42 См.: 🔗Дан. 12:3	Такожде и воскресение мертвых: сеется в тление, востает в нетлении:
15:43	сеется не в честь, востает в славе: сеется в немощи, востает в силе:
15:44 См.: 🔗Мф. 22:30	сеется тело душевное, востает тело духовное. Есть тело душевное, и есть тело духовное.
15:45 См.: 🔗Рим. 5:18 🔗Быт. 2:7	Тако и писано есть: бысть первый человек Адам в душу живу, последний Адам в дух животворящь.
15:46	Но не прежде духовное, но душевное, потом же духовное.
15:47 См.: 🔗Быт. 2:7 🔗Ин. 3:31	Первый человек от земли, перстен: вторый человек Господь с небесе.
15:48 См.: 🔗Ин. 3:6	Яков перстный, такови и перстнии: и яков небесный, тацы же и небеснии:
15:49 См.: 🔗Быт. 5:3 🔗Рим. 8:29	и якоже облекохомся во образ перстнаго, да облечемся и во образ небеснаго.
15:50 См.: 🔗Ин. 1:13 🔗Ин. 3:3	Сие же глаголю, братие, яко плоть и кровь Царствия Божия наследити не могут, ниже тление нетления наследствует.
15:51 См.: 🔗1Фес. 4:17	Се, тайну вам глаголю: вси бо не успнем, вси же изменимся
15:52 См.: 🔗Мф. 24:31 🔗Ин. 5:28 🔗1Фес. 4:16	вскоре, во мгновении ока, в последней трубе: вострубит бо, и мертвии востанут нетленни, и мы изменимся:
15:53	подобает бо тленному сему облещися в нетление и мертвенному сему облещися в безсмертие.
15:54 См.: 🔗Ис. 25:8	Егда же тленное сие облечется в нетление и смертное сие облечется в безсмертие, тогда будет слово написанное: пожерта бысть смерть победою.
15:55 См.: 🔗Ос. 13:14	Где ти, смерте, жало? Где ти, аде, победа?
15:56 См.: 🔗Рим. 4:15	Жало же смерти грех: сила же греха закон.
15:57 См.: 🔗1Ин. 5:4	Богу же благодарение, давшему нам победу Господем нашим Иисус Христом.
15:58 См.: 🔗Кол. 1:23	Темже, братие моя возлюбленная, тверди бывайте, непоступни, избыточествующе в деле Господни всегда, ведяще, яко труд ваш несть тощь пред Господем.