Книга Премудрости Иисуса, сына Сирахова, глава 15 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 15
15:1	Бояйся Господа сотворит сие, и держайся закона постигнет ю.
15:2 См.: 🔗Ис. 66:13	И срящет его яко мати, и яко жена девства приимет и:
15:3 См.: 🔗Ин. 4:14 🔗Еф. 5:17	ухлебит его хлебом разума и водою премудрости напоит и:
15:4	утвердится на ней и не преклонится, и до нея пристанет и не постыдится:
15:5	и вознесет его паче искренних его и посреде церкве отверзет уста его:
15:6	веселие и венец радости и имя вечно наследит.
15:7 См.: 🔗Прит. 14:6	Не постигнут ея человецы неразумивии, и мужие грешнии не узрят ея:
15:8	далече есть от гордыни, и мужие лживии не имут помянути ея.
15:9 См.: 🔗Пс. 49:16 🔗Ис. 52:7 🔗2Тим. 3:7	Не красна похвала во устех грешника, яко не от Господа послана бысть:
15:10 См.: 🔗Сир. 39:8	премудростию бо речена будет хвала, и Господь благопоспешит ей.
15:11 См.: 🔗Пс. 5:5	Не рцы, яко Господа ради отступих: ихже бо возненавиде, да не сотвориши.
15:12 См.: 🔗Иак. 1:13	Не рцы, яко Сам мя прельсти: не требует бо мужа грешника.
15:13	Всяку мерзость возненавиде Господь, и несть любезна боящымся Его.
15:14 См.: 🔗Быт. 1:27	Сам из начала сотвори человека и остави Его в руце произволения его:
15:15 См.: 🔗Мф. 19:17	аще хощеши, соблюдеши заповеди и веру сотвориши благоволения.
15:16	Предложил ти огнь и воду, и на неже хощеши, простреши руку твою.
15:17 См.: 🔗Иер. 21:8	Пред человеком живот и смерть, и еже аще изволит, дастся ему.
15:18	Яко многа премудрость Господня: крепок силою и видяй вся:
15:19 См.: 🔗Пс. 33:16	и очи Его на боящихся Его, и Той познает всяко дело человеческо.
15:20 См.: 🔗Пс. 5:5 🔗Ос. 5:5	Не заповеда ни единому же нечествовати и не даде ослабы ни единому не согрешати.