Книга Числа, глава 21

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 21
21:1 См.: 🔗Чис. 33:40	И услыша Хананей царь Арадский живый при пустыни, яко прииде Израиль путем Афаримским, и ратова противу Израиля, и взя от них плен.
21:2 См.: 🔗Лев. 27:28	И обещася Израиль обетом Господу и рече: аще мне предаси люди сия подручны, погублю их и грады их.
21:3 См.: 🔗Нав. 2:9	И услыша Господь глас Израилев и предаде Хананеа подручна ему: и опустоши его и грады его, и прозва има месту тому Запустение.
21:4 См.: 🔗Чис. 11:1	И воздвигшеся от Ора горы путем иже к морю Чермному, обыдоша землю Едомлю: и малодушествоваша людие на пути,
21:5 См.: 🔗Втор. 6:16	и роптаху людие на Бога и на Моисеа, глаголюще: вскую извел еси ны из Египта убити нас в пустыни, яко несть хлеба, ни воды? И душа наша негодует о хлебе сем тщем.
21:6 См.: 🔗Прем. 16:5 🔗1Кор. 10:9	И посла Господь на люди змиев умерщвляющих, и угрызаху людий: и умроша люди мнози от сынов Израилевых.
21:7 См.: 🔗Исх. 8:8	И пришедше людие к Моисеови глаголаша: согрешихом, яко роптахом на Господа и на тя: помолися убо ко Господу, да отженет от нас змии. И помолися Моисей ко Господу о людех.
21:8 См.: 🔗Ин. 3:14	И рече Господь к Моисею: сотвори себе змию (медяну) и положи ю на знамя: и будет аще угрызет змия человека, всяк угрызенный видев ю жив будет.
21:9 См.: 🔗4Цар. 18:4 🔗Ин. 3:14	И сотвори Моисей змию медяну и постави ю на знамени: и бысть егда угрызаше змия человека, и взираше на змию медяну, и оживаше.
21:10 См.: 🔗Чис. 33:43	И воздвигошася сынове Израилевы, и ополчишася во Овофе:
21:11 См.: 🔗Чис. 33:44	и воздвигшеся от Овофа, ополчишася во Ахалгеи об ону страну пустыни, яже есть пред лицем Моавитским, на восток солнца:
21:12 См.: 🔗Втор. 2:13	и оттуду воздвигошася, и ополчишася в дебри Заред:
21:13 См.: 🔗Суд. 11:13	и оттуду воздвигшеся, ополчишася об ону страну Арнона в пустыни, яже исходит от предел Аморрейских: есть бо Арнон предел Моавль между Моавом и между Аморреом.
21:14	Сего ради глаголется в книзе брань Господня: Зоову попали, и потоки Арнони,
21:15 См.: 🔗Ис. 15:8	и потоки устрои в селение Ир, и прилежит пределом Моавлим.
21:16 См.: 🔗Чис. 20:8	И оттуду (воздвигошася) ко Кладязю: сей есть кладязь, о немже рече Господь к Моисею: собери люди, и дам им воду пити.
21:17	Тогда воспе Израиль песнь сию у кладязя: начинайте ему:
21:18 См.: 🔗Втор. 33:21	кладязь, ископаша его князи, изсекоша его царие язычестии во царствии их, внегда обладати ими. И от кладязя (воздвигошася) в Манфанаил:
21:19	и от Манфанаила в Наадиил, и от Наадиила в Вамоф:
21:20	и от Вамофа в Напин, иже есть на поли Моавли, от верха Изсеченаго, зрящаго пред лице пустыни.
21:21 См.: 🔗Втор. 2:26 🔗Суд. 11:19 🔗Неем. 9:22	И посла Моисей послы к Сиону царю Аморрейску, словесы мирными глаголя:
21:22 См.: 🔗Чис. 20:17	да пройдем сквозе землю твою, путем пойдем: не уклонимся ни на села, ни на винограды, не испием воды от кладязь твоих: путем царским пойдем, дондеже пройдем пределы твоя.
21:23 См.: 🔗Втор. 2:32	И не даде Сион Израилю проити сквозе пределы своя: и собра Сион вся люди своя, и изыде ополчитися на Израиля в пустыню: и прииде во Иассан, и ополчися на Израиля.
21:24 См.: 🔗Втор. 31:4 🔗Нав. 9:10 🔗Нав. 24:8 🔗Суд. 11:21 🔗Пс. 134:11 🔗Ам. 2:9 🔗3Езд. 1:11	И порази его Израиль убийством меча, и обладаше землею его от Арнона до Иавока, даже до сынов Амманих: яко Иазир пределы сынов Амманих суть.
21:25	И взя Израиль вся грады сия: и вселися Израиль во всех градех Аморрейских, во Есевоне и во всех подлежащих ему:
21:26	есть бо Есевон град Сиона царя Аморрейска: и сей повоева царя Моавля прежде и взя всю землю его от Ароира даже до Арнона.
21:27	Сего ради рекут приточницы: приидите во Есевон, да соградится и созиждется град Сион:
21:28 См.: 🔗Иер. 48:45	яко огнь изыде от Есевона и пламень от града Сиона, и пояде даже до Моава, и пожре столпы Арнонския:
21:29 См.: 🔗3Цар. 11:7	горе тебе, Моаве, погибосте, людие Хамосовы: продани быша сынове их в заключение и дщери их пленницы царю Аморрейскому Сиону:
21:30 См.: 🔗Ис. 15:2 🔗Иер. 48:8	и семя их погибнет, Есевон даже до Девона: и жены их еще разожгоша огнь на Моава.
21:31	Вселися же Израиль во вся грады Аморрейски:
21:32	и посла Моисей соглядати Иазира: и взяша его и села его, и изгнаша Аморреа живущаго тамо:
21:33 См.: 🔗Втор. 3:1 🔗Втор. 29:7	и возвратившеся, приидоша путем в Васан. И изыде Ог, царь Васанский, противу им и вси людие его на брань во Едраин.
21:34 См.: 🔗Пс. 134:11	И рече Господь к Моисею: не убойся его, яко в руце твои предах его и вся люди его и всю землю его: и сотвориши ему, якоже сотворил еси Сиону царю Аморрейску, иже живяше во Есевоне.
21:35	И порази его и сыны его и вся люди его, даже не оста в них живый: и наследиша землю его.