Четвёртая книга Царств (Вторая книга Царей), глава 6

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 6
6:1 См.: 🔗4Цар. 4:38	И реша сынове пророчи ко Елиссею: се, убо место, идеже мы живем противу тебе, тесно нам:
6:2	да идем ныне до Иордана, и да возмем оттуду кийждо муж по бервну единому и сотворим себе ту обиталища пребывати тамо. И рече: идите.
6:3	И рече един кротце: гряди и сам с рабы твоими. И рече: аз пойду.
6:4	И иде с ними: и приидоша ко Иордану, и секоша древа:
6:5	и егда един отсекаше бервно, и се, железо спаде с топорища и впаде в воду. И возопи: о, господине, и сие заемное.
6:6	И рече человек Божий: где паде? И показа ему место. И отсече древо и вверже и тамо: и всплыве железо.
6:7	И рече: возми себе. И простре руку свою и взят е.
6:8	И царь Сирский бе воюя на Израиля, и совеща со отроки своими, глаголя: на месте некоем сокровеннем ополчуся.
6:9	И посла Елиссей ко царю Израилеву, глаголя: блюдися не преити на место сие, яко ту Сиряне залягоша.
6:10	И посла царь Израилев на место, о немже рече ему Елиссей, и соблюдеся оттуду не единою, ниже дважды.
6:11	И смутися душа царя Сирска о словеси сем: и призва отроки своя и рече и ним: не возвестите ли мне, кто предает мя царю Израилеву?
6:12	И рече един от отрок его: ни, господине мой царю: яко пророк Елиссей, иже во Израили, возвещает царю Израилеву вся словеса, яже аще глаголеши в сокровищи ложницы твоея.
6:13 См.: 🔗Быт. 37:17	И рече: идите, видите, где сей, и послав возму его. И возвестиша ему, глаголюще: се, есть в Дофаиме.
6:14	И посла тамо кони и колесницы и силу тяжку: и приидоша нощию и окружиша град.
6:15	И урани раб Елиссеев востати, и изыде: и се, сила обступи град, и кони и колесницы. И рече отрок его к нему: о, господине, что сотворим?
6:16 См.: 🔗2Пар. 32:7 🔗1Ин. 4:4	И рече Елиссей: не бойся, яко множае иже с нами, нежели с ними.
6:17 См.: 🔗Чис. 24:4 🔗Деян. 27:23 🔗Евр. 1:14	И помолися Елиссей и рече: Господи, отверзи ныне очи отрока, да узрит. И отверзе Господь очи его, и виде: и се, гора исполнь коней, и колесница огненна окрест Елиссеа.
6:18 См.: 🔗Быт. 19:11	И снидоша к нему: и помолися Елиссей ко Господу и рече: порази убо язык сей невидением. И порази их невидением по глаголу Елиссееву.
6:19	И рече к ним Елиссей: не сей путь и не сей град: грядите по мне, и отведу вы к мужу, егоже ищете. И отведе их в Самарию.
6:20	И бысть егда внидоша в Самарию, и рече Елиссей: отверзи убо, Господи, очи их, и да видят. И отверзе Господь очи их, и видеша: и се, бяху посреде Самарии.
6:21	И рече царь Израилев ко Елиссею, егда увиде я: аще поражу я поражением, отче?
6:22 См.: 🔗3Цар. 20:31 🔗Прит. 25:22 🔗Рим. 12:20	И рече Елиссеи: да не поразиши: еда ли пленил еси их мечем твоим и луком твоим, да избиеши? И предложи им хлебы и воду, да ядят и да пиют и да отидут ко господину своему.
6:23	И предложи им предложение велие, и ядоша и пиша, и отпусти я, и идоша ко господину своему: и не приложиша ктому воини приходити из Сирии в землю Израилеву.
6:24	И бысть по сих, и собра сын Адеров царь Сирийский все ополчение свое, и взыде и обседе Самарию.
6:25 См.: 🔗4Цар. 7:18	И бысть глад велик в Самарии: и се, обседоша ю, дондеже бысть глава ослова за пятьдесят сикль сребра, и четвертая часть меры гноя голубинаго за пять сикль сребра.
6:26	И бысть царь Израилев обходяй по стенам: и жена (некая) возопи к нему, глаголющи: спаси мя, господине мой царю.
6:27	И рече ей: аще тебе не спасает Господь, како аз спасу тя? Еда от гумна или от точила?
6:28 См.: 🔗Втор. 28:53	И рече ей царь: что ти есть? И рече: сия жена ко мне рече: даждь сына твоего, да съядим его днесь, а утро моего сына съядим:
6:29 См.: 🔗Лев. 26:29 🔗Плч. 4:10 🔗Иез. 5:10	и испекохом сына моего и снедохом его: и рех к ней в день вторый: даждь сына твоего, и съядим его: и скры сына своего.
6:30 См.: 🔗4Цар. 5:7	И бысть егда услыша царь Израилев словеса жены, раздра ризы своя и сам хождаше по стене, и видеша людие вретище на плоти его внутрь.
6:31	И рече царь: сия да сотворит ми Бог и сия да приложит ми, аще будет глава Елиссеева на нем днесь.
6:32	Елиссей же седяше в дому своем, и старцы седяху с ним. И посла царь мужа пред лицем своим. И прежде даже приити посланному к нему, и той рече ко старцем: не весте ли, яко посла сын убийцы сей, да отсечет главу мою? Видите, егда приидет вестник, заключите двери и стисните его во дверех: не топот ли ног господина его вслед его?
6:33	И еще ему глаголющу с ними, и се, вестник сниде к нему и рече: се, сие зло от Господа: что потерплю Господеви ксему?