Книга пророка Иеремии, глава 21

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 21
21:1 См.: 🔗1Пар. 24:9	Слово, еже бысть от Господа ко Иеремии, егда посла к нему царь Седекиа Пасхора сына Мелхиина и Софонию сына Васаиева, священника, глаголя:
21:2	вопроси о нас Господа, яко Навуходоносор царь Вавилонский воста на нас: сотворит ли Господь с нами по всем чудесем Своим, и отидет от нас?
21:3	И рече Иеремиа к ним: тако рцыте Седекии: сия глаголет Господь Бог Израилев:
21:4	се, Аз обращаю оружия бранная, яже суть в руках ваших, имиже вы ополчаетеся на царя Вавилонска и Халдейска, иже обстоят вас окрест вне стен: и соберу та посреде града сего,
21:5 См.: 🔗Исх. 6:6 🔗Втор. 5:15 🔗Иер. 32:21	и поборю Аз по вас рукою простертою и мышцею крепкою с яростию и гневом великим,
21:6	и побию всех обитающих во граде сем, человеки и скоты, губителством великим, и измрут.
21:7 См.: 🔗Иер. 20:4 🔗Иер. 34:2 🔗Исх. 4:19	И по сих, тако глаголет Господь, дам Седекию царя Иудина и рабы его, и люди его и оставльшыяся во граде сем от губителства и глада и меча, в руку Навуходоносора царя Вавилонска и в руку врагов их и в руку ищущих душ их, и побиет их острием меча: и не пощажу их, ниже милостив буду им.
21:8 См.: 🔗Сир. 15:17	И к людем сим речеши: сия глаголет Господь: се, Аз даю пред вами путь живота и путь смерти:
21:9 См.: 🔗Иер. 38:2 🔗Иер. 45:5	иже обитает во граде сем, умрет мечем и гладом и губителством, а исходяй, иже прибежит ко Халдеом обстоящым вас, жив будет, и будет душа его в плен, и жив будет.
21:10 См.: 🔗Лев. 17:10 🔗Иер. 32:29 🔗Иер. 34:2	Утвердих бо лице Мое на град сей во злая, а не во благая, рече Господь: в руки царя Вавилонска предастся, и сожжет его огнем.
21:11	Доме царя Иудина, слышите слово Господне:
21:12 См.: 🔗Иер. 4:4 🔗Иер. 22:3	доме Давидов, сия глаголет Господь: судите заутра суд и исправите, и избавите силою угнетенаго от руки обидящаго и, да не зажжется яко огнь ярость Моя и возгорится, и не будет угашающаго, ради лукавых умышлений ваших.
21:13 См.: 🔗Иер. 49:4 🔗Иез. 11:15	Се, Аз к тебе обитающему во крепце и польне удолии, рече Господь, иже глаголете: кто побиет нас? Или кто внидет в домы нашя?
21:14 См.: 🔗Иер. 17:27 🔗Иер. 22:7	И посещу на вас по лукавым начинанием вашым, рече Господь, и возжгу огнь в лесе его, и пояст вся, яже окрест его.