Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 10 | |
10:1 См.: 🔗Прит. 20:8 | Премудр судия наказует люди своя, и владычество разумиваго благочинно будет. |
10:2 См.: 🔗3Цар. 12:14 🔗Прит. 29:12 | Якоже судия людий своих, тако и слузи его, и якоже владыка града, тако и вси живущии в нем. |
10:3 См.: 🔗3Цар. 12:11 | Царь ненаказаный погубит люди своя: и град населится премудростию сильных. |
10:4 См.: 🔗Пс. 126:1 🔗Прем. 6:4 | В руце Господни власть земли, и потребнаго воздвигнет во время на ней. |
10:5 | В руце Господни благое шествие мужа, и на лицы книжника возложит славу Свою. |
10:6 См.: 🔗Лев. 19:17 | Во всяцей неправде не держи гнева на искренняго и не твори ни коего в делех досаждения. |
10:7 См.: 🔗1Пет. 5:5 | Возненавидена пред Богом и человеки гордыня и от обоих сотворит неправедная. |
10:8 | Царство от языка в язык преводится, ради неправды и досаждения и имений льстивых. |
10:9 См.: 🔗Иов. 13:28 🔗Сир. 40:2 | Почто гордится земля и пепел? |
10:10 | Яко в животе извергох утробу его. |
10:11 | Долгую болезнь отсецает врачь: |
10:12 | и царь днесь, а утро умрет. |
10:13 См.: 🔗Иов. 17:14 🔗Ис. 14:11 | Ибо егда умрет человек, наследит гады и звери и червие. |
10:14 См.: 🔗Быт. 3:5 | Начало гордыни человеку отступление от Господа, и егда от Сотворшаго и отвращается сердце его: |
10:15 См.: 🔗Есф. 5:14 | яко начало греха гордыня, и держай ю изрыгнет скверну. |
10:16 См.: 🔗1Пет. 5:5 | Сего ради обезслави Господь в наведениих зол и низврати их до конца: |
10:17 См.: 🔗1Цар. 2:8 | престолы князей низложи Господь и посади кроткия вместо их, |
10:18 | корения языков гордых исторже Господь и насади смиренныя вместо их, |
10:19 См.: 🔗Быт. 19:24 | страны языков низврати Господь и погуби их до основания земли, |
10:20 | изсуши от них и погуби их и потреби от земли память их. |
10:21 | Не создана бысть человеком гордыня, ни гнев ярости рождением жен. |
10:22 | Семя честное кое? Семя человеческое. Семя честное кое? Боящиися Господа. |
10:23 | Семя безчестное кое? Семя человеческое. Семя безчестное кое? Преступающии заповеди. |
10:24 См.: 🔗1Пет. 2:17 | Посреде братии старейшина их честен, и боящиися Господа пред очима Его. |
10:25 См.: 🔗Иер. 9:23 | Богат и славен и нищь, похвала их страх Господень. |
10:26 См.: 🔗Иак. 2:5 | Неправедно есть укоряти нища разумива, и не подобает славити мужа грешника. |
10:27 См.: 🔗Иудиф. 16:19 | Вельможа и судия и сильный славни будут, и несть от них ни един вящший боящагося Господа. |
10:28 См.: 🔗Прит. 17:2 | Рабу разумиву свободнии послужат, и муж хитр не поропщет наказуемь. |
10:29 | Не мудрися творити дела своего, и не слави себе во время туги твоея. |
10:30 См.: 🔗Прит. 12:9 🔗Прит. 28:19 | Лучше делаяй и изюбилуяй во всем, неже славяйся и лишаяйся хлеба. |
10:31 См.: 🔗Иак. 1:2 | Чадо, кротостию прослави душу твою и даждь ей честь по достоинству ея. |
10:32 | Согрешающаго на душу свою кто оправдит? И кто прославит безчествующа живот свой? |
10:33 См.: 🔗Сир. 13:28 | Нищий славимь есть вежества ради своего, и богатый славимь есть богатства ради своего. |
10:34 См.: 🔗Еккл. 7:12 | Прославляемый же в нищете, а в богатстве кольми паче? Безславный же в богатстве, а в нищете кольми паче? |