Книга пророка Иеремии, глава 29

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 29
29:1	И сия словеса книги, юже посла Иеремиа из Иерусалима ко старейшинам преселеным и ко жерцем и лживым пророком и всем людем, ихже пресели Навуходоносор из Иерусалима до Вавилона,
29:2 См.: 🔗4Цар. 24:12	последи изшедшу Иехонии царю и царице, и кажеником и всякому свободну, и художнику и юзнику из Иерусалима,
29:3	рукою Елеаса сына Сафаня и Гамариа сына Хелкиина, егоже посла Седекиа царь Иудин ко царю Вавилонску в Вавилон, глаголя:
29:4	тако рече Господь Бог Израилев о преселеных, ихже пресели из Иерусалима в Вавилон:
29:5	соградите храмины и вселитеся, и насадите вертограды и ядите плоды их,
29:6	и поимите жены и чадотворите сыны и дщери, и приведите сыном вашым жены и дщери вашя дадите за мужы, и да раждают сыны и дщери, и умножайтеся, а не умаляйтеся:
29:7 См.: 🔗Вар. 1:11	и взыщите мира земли, на нюже преселих вас тамо, и молите Господа за ня, яко в мире их будет мир вам.
29:8 См.: 🔗Иер. 14:14 🔗Иер. 23:21 🔗Иер. 27:15	Яко тако рече Господь Сил, Бог Израилев: да не препирают вас лживии пророцы, иже в вас, и да не препирают вас волсви ваши, и не послушайте соний своих, яже вы видите во сне,
29:9 См.: 🔗Иер. 23:16 🔗Мф. 24:5	яко неправедне тии прорицают вам во имя Мое, а не послах их, рече Господь.
29:10 См.: 🔗Иер. 25:12	Яко тако рече Господь: егда исполнятся в Вавилоне седмьдесят лет, посещу вас и уставлю словеса Моя на вас, еже возвратити люди Моя на место сие:
29:11	и помышлю на вы помышление мира, а не злая, еже дати вам сия:
29:12 См.: 🔗Ис. 58:9	и помолитеся ко Мне, и послушаю вас,
29:13 См.: 🔗Мф. 7:7	и взыщете Мене, и обрящете Мя: и егда взыщете Мене всем сердцем вашим,
29:14 См.: 🔗Втор. 30:3	и явлюся вам, глаголет Господь, и возвращу узники вашя и соберу вас от всех стран и от всех градов, в няже изгнах вас, глаголет Господь: и возвратитися повелю вам на место откуду превести вас повелех.
29:15	Понеже рекосте: возстави нам Господь пророки в Вавилоне.
29:16	Тако бо рече Господь ко царю седящу на престоле Давидове и ко всем людем живущым во граде том, и братиям вашым, не изшедшым с вами в плен,
29:17 См.: 🔗Иер. 24:8	тако глаголет Господь Вседержитель: се, Аз послю на ня мечь и глад и мор, и положу я яко смоквы худыя, ихже немощно ясти, понеже зело худы быша:
29:18 См.: 🔗Иер. 15:4	и сотру я мечем и гладом и мором, и дам я в погубление всем царствам земным и в проклятие, и во удивление и в посмех и в поругание всем языком, к нимже извергох я:
29:19 См.: 🔗Иер. 25:4	занеже не послушаша словес Моих, глаголет Господь, яже послах к ним рабы Моими пророки, рано востая и посылая, и не послушасте, глаголет Господь.
29:20	Вы убо слышите слово Господне, все преселение, еже выслах из Иерусалима в Вавилон.
29:21 См.: 🔗Иез. 13:8	Тако глаголет Господь Вседержитель Бог Израилев на Ахиава сына Колиева и на Седекию сына Маасиева, иже прорицают вам во имя Мое лживо: се, Аз предаю я в руце Навуходоносора царя Вавилонска, и побиет я пред очима вашима:
29:22 См.: 🔗Ис. 65:15 🔗Иер. 44:12	и возмется от них проклятие всему преселению Иудину, еже в Вавилоне, глаголюще: да сотворит ти Господь якоже Седекии сотвори и якоже Ахиаву, ихже сожже царь Вавилонский во огни,
29:23	беззакония ради, еже сотвориша во Иерусалиме, и любодеяху с женами граждан своих и слово глаголаша во имя Мое лживо, егоже не повелех им, Аз же есмь судия и послух, глаголет Господь.
29:24	И к Самеи Еламитину речеши:
29:25	тако глаголет Господь Вседержитель, Бог Израилев: понеже послал еси во имя твое послания ко всем людем, иже во Иерусалиме, и ко Софонии сыну Маасеову жерцу и ко всем жерцем, глаголя:
29:26	Господь даде тя жерца вместо Иодаа жерца, быти приставнику в дому Господни, всякому человеку прорицающу и всякому человеку неистовующу, и вдаси его в затвор и в кладу.
29:27	И ныне почто не запретисте Иеремии, иже от Анафофа, прорицающему вам?
29:28 См.: 🔗Иез. 11:3	Яко того ради посла к нам в Вавилон, глаголя: долгое есть время, соградите храмины и вселитеся, и насадите вертограды и ядите плоды их.
29:29	И прочте книгу сию Софониа во ушы Иеремии пророка.
29:30	И бысть слово Господне ко Иеремии глаголя:
29:31 См.: 🔗Иер. 28:15	посли ко преселником глаголя: тако рече Господь на Самею Еламитина: понеже прорече вам Самеа, Аз же не послах его, и сотвори вас уповати на неправду:
29:32 См.: 🔗Иер. 28:16	того ради сице рече Господь: се, Аз посещу на Самею и на род его, и не будет ему человека посреде вас, еже видети благая, яже Аз сотворю вам, глаголет Господь, зане отступление глагола на Господа.