Евангелие от Матфея, глава 19

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 19
19:1 См.: 🔗Мк. 10:1	И бысть егда сконча Иисус словеса сия, прейде от Галилеи и прииде в пределы Иудейския об он пол Иордана.
19:2	И по Нем идоша народи мнози, и изцели их ту.
19:3	И приступиша к Нему фарисее искушающе Его и глаголаша Ему: аще достоит человеку пустити жену свою по всяцей вине?
19:4 См.: 🔗Быт. 1:27 🔗Мк. 10:6	Он же отвещав рече им: несте ли чли, яко Сотворивый искони, мужеский пол и женский сотворил я есть?
19:5 См.: 🔗Быт. 2:24 🔗Мк. 10:7 🔗1Кор. 6:16 🔗Еф. 5:31	И рече: сего ради оставит человек отца (своего) и матерь и прилепится к жене своей, и будета оба в плоть едину,
19:6	якоже ктому неста два, но плоть едина: еже убо Бог сочета, человек да не разлучает.
19:7 См.: 🔗Втор. 24:1 🔗Мф. 5:31	Глаголаша Ему: что убо Моисей заповеда дати книгу распустную и отпустити ю?
19:8	Глагола им: яко Моисей по жестосердию вашему повеле вам пустити жены вашя: изначала же не бысть тако:
19:9 См.: 🔗Мф. 5:32 🔗Мк. 10:11 🔗Лк. 16:18	глаголю же вам, яко иже аще пустит жену свою, разве словесе прелюбодейна, и оженится иною, прелюбы творит: и женяйся пущеницею прелюбы деет.
19:10	Глаголаша Ему ученицы Его: аще тако есть вина человеку с женою, лучше есть не женитися.
19:11	Он же рече им: не вси вмещают словесе сего, но имже дано есть:
19:12 См.: 🔗Ис. 56:3 🔗1Кор. 7:7	суть бо скопцы, иже из чрева матерня родишася тако: и суть скопцы, иже скопишася от человек: и суть скопцы, иже исказиша сами себе Царствия ради Небеснаго: могий вместити да вместит.
19:13 См.: 🔗Мк. 10:13 🔗Лк. 18:15	Тогда приведоша к Нему дети, да руце возложит на них и помолится: ученицы же запретиша им.
19:14 См.: 🔗Мф. 18:3	Иисус же рече (им): оставите детей и не возбраняйте им приити ко Мне: таковых бо есть Царство Небесное.
19:15	И возложь на них руце, отиде оттуду.
19:16 См.: 🔗Мк. 10:17 🔗Лк. 18:18	И се, един (некий) приступль рече Ему: Учителю благий, что благо сотворю, да имам живот вечный?
19:17 См.: 🔗Иак. 1:17	Он же рече ему: что Мя глаголеши блага? Никтоже благ, токмо един Бог: аще ли хощеши внити в живот, соблюди заповеди.
19:18	Глагола Ему: кия? Иисус же рече: еже, не убиеши: не прелюбы сотвориши: не украдеши: не лжесвидетелствуеши:
19:19 См.: 🔗Исх. 20:12 🔗Лев. 19:18 🔗Втор. 5:16	чти отца и матерь: и: возлюбиши искренняго твоего яко сам себе.
19:20	Глагола Ему юноша: вся сия сохраних от юности моея: что есмь еще не докончал?
19:21	Рече ему Иисус: аще хощеши совершен быти, иди, продаждь имение твое и даждь нищым: и имети имаши сокровище на небеси: и гряди вслед Мене.
19:22	Слышав же юноша слово, отиде скорбя: бе бо имея стяжания многа.
19:23	Иисус же рече учеником Своим: аминь глаголю вам, яко неудобь богатый внидет в Царствие Небесное:
19:24	паки же глаголю вам: удобее есть велбуду сквозе иглине ушы проити, неже богату в Царствие Божие внити.
19:25	Слышавше же ученицы Его, дивляхуся зело, глаголюще: кто убо может спасен быти?
19:26 См.: 🔗Иов. 42:2	Воззрев же Иисус рече им: у человек сие невозможно есть, у Бога же вся возможна.
19:27 См.: 🔗Мк. 10:28 🔗Лк. 18:28	Тогда отвещав Петр рече Ему: се, мы оставихом вся и вслед Тебе идохом: что убо будет нам?
19:28 См.: 🔗Лк. 22:30	Иисус же рече им: аминь глаголю вам, яко вы шедшии по Мне, в пакибытие, егда сядет Сын Человеческий на престоле славы Своея, сядете и вы на двоюнадесяте престолу, судяще обеманадесяте коленома Израилевома:
19:29	и всяк, иже оставит дом, или братию, или сестры, или отца, или матерь, или жену, или чада, или села, имене Моего ради, сторицею приимет и живот вечный наследит:
19:30 См.: 🔗Мк. 10:31 🔗Лк. 13:30	мнози же будут перви последнии, и последни первии.