Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 1 | |
1:1 См.: 🔗Прит. 8:22 🔗1Ин. 1:1 | В начале бе Слово, и Слово бе к Богу, и Бог бе Слово. |
1:2 | Сей бе искони к Богу: |
1:3 | вся Тем быша, и без Него ничтоже бысть, еже бысть. |
1:4 | В Том живот бе, и живот бе свет человеком: |
1:5 См.: 🔗Ин. 3:19 | и свет во тме светится, и тма его не объят. |
1:6 См.: 🔗Мф. 3:1 | Бысть человек послан от Бога, имя ему Иоанн: |
1:7 | Сей прииде во свидетелство, да свидетелствует о Свете, да вси веру имут ему. |
1:8 | Не бе той свет, но да свидетелствует о Свете: |
1:9 См.: 🔗Ис. 60:1 | бе Свет истинный, Иже просвещает всякаго человека грядущаго в мир: |
1:10 | в мире бе, и мир Тем бысть, и мир Его не позна: |
1:11 См.: 🔗Мф. 15:24 | во своя прииде, и свои Его не прияша. |
1:12 См.: 🔗Рим. 8:15 🔗Гал. 3:26 | Елицы же прияша Его, даде им область чадом Божиим быти, верующым во имя Его, |
1:13 См.: 🔗Ин. 3:5 | иже не от крове, ни от похоти плотския, ни от похоти мужеския, но от Бога родишася. |
1:14 | И Слово плоть бысть и вселися в ны, и видехом славу Его, славу яко Единороднаго от Отца, исполнь благодати и истины. |
1:15 См.: 🔗Мф. 3:11 | Иоанн свидетелствует о Нем и воззва глаголя: Сей бе, Егоже рех, Иже по мне Грядый, предо мною бысть, яко первее мене бе. |
1:16 См.: 🔗Еф. 1:6 🔗Кол. 1:19 | И от исполнения Его мы вси прияхом и благодать воз благодать: |
1:17 См.: 🔗Исх. 20:1 🔗Рим. 3:24 | яко закон Моисеом дан бысть, благодать (же) и истина Иисус Христом бысть. |
1:18 | Бога никтоже виде нигдеже: Единородный Сын, сый в лоне Отчи, Той исповеда. |
1:19 См.: 🔗Ин. 5:33 | И сие есть свидетелство Иоанново, егда послаша Жидове от Иерусалима иереев и левитов, да вопросят его: ты кто еси? |
1:20 См.: 🔗Ин. 3:28 🔗Деян. 13:25 | И исповеда и не отвержеся: и исповеда, яко несмь аз Христос. |
1:21 | И вопросиша его: что убо? Илиа ли еси ты? И глагола: несмь. Пророк ли еси? И отвеща: ни. |
1:22 | Реша же ему: кто еси? Да ответ дамы пославшым ны: что глаголеши о тебе самем? |
1:23 | Рече: аз глас вопиющаго в пустыни: исправите путь Господень, якоже рече Исаиа пророк. |
1:24 | И посланнии беху от фарисей: |
1:25 | и вопросиша его и реша ему: что убо крещаеши, аще ты неси Христос, ни Илиа, ни пророк? |
1:26 | Отвеща им Иоанн, глагола: аз крещаю водою: посреде же вас стоит, Егоже вы не весте: |
1:27 | Той есть Грядый по мне, Иже предо мною бысть, Емуже несмь аз достоин, да отрешу ремень сапогу Его. |
1:28 | Сия в Вифаваре быша об он пол Иордана, идеже бе Иоанн крестя. |
1:29 См.: 🔗Исх. 12:3 🔗Ис. 53:7 | Во утрий (же) виде Иоанн Иисуса грядуща к себе и глагола: се, Агнец Божий, вземляй грехи мира: |
1:30 | Сей есть, о Немже аз рех: по мне грядет Муж, Иже предо мною бысть, яко первее мене бе: |
1:31 См.: 🔗Мк. 1:4 | и аз не ведех Его: но да явится Израилеви, сего ради приидох аз водою крестя. |
1:32 | И свидетелствова Иоанн, глаголя, яко видех Духа сходяща яко голубя с небесе, и пребысть на Нем: |
1:33 | и аз не ведех Его: но Пославый мя крестити водою, Той мне рече: над Негоже узриши Духа сходяща и пребывающа на Нем, Той есть крестяй Духом Святым: |
1:34 | и аз видех и свидетелствовах, яко Сей есть Сын Божий. |
1:35 | Во утрий (же) паки стояше Иоанн, и от ученик его два. |
1:36 | И узрев Иисуса грядуща, глагола: се, Агнец Божий. |
1:37 | И слышаста его оба ученика глаголющаго, и по Иисусе идоста. |
1:38 | Обращься же Иисус и видев я по Себе идуща, глагола има: чесо ищета? Она же реста Ему: Равви, еже глаголется сказаемо учителю, где живеши? |
1:39 | (И) глагола има: приидита и видита. Приидоста и видеста, где живяше, и у Него пребыста день той. Бе же час яко десятый. |
1:40 | Бе (же) Андрей, брат Симона Петра, един от обою слышавшею от Иоанна и по Нем шедшею. |
1:41 | Обрете сей прежде брата своего Симона и глагола ему: обретохом Мессию, еже есть сказаемо Христос. |
1:42 См.: 🔗Мф. 16:18 | И приведе его ко Иисусови. Воззрев же нань Иисус рече: ты еси Симон сын Ионин: ты наречешися Кифа, еже сказается Петр. |
1:43 | Во утрий (же) восхоте изыти в Галилею: и обрете Филиппа и глагола ему: гряди по Мне. |
1:44 | Бе (же) Филипп от Вифсаиды, от града Андреова и Петрова. |
1:45 | Обрете Филипп Нафанаила и глагола ему: Егоже писа Моисей в законе и пророцы, обретохом Иисуса сына Иосифова, иже от Назарета. |
1:46 | И глагола ему Нафанаил: от Назарета может ли что добро быти? Глагола ему Филипп: прииди и виждь. |
1:47 | Виде (же) Иисус Нафанаила грядуща к Себе и глагола о нем: се, воистинну Израилтянин, в немже льсти несть. |
1:48 | Глагола Ему Нафанаил: како мя знаеши? Отвеща Иисус и рече ему: прежде даже не возгласи тебе Филипп, суща под смоковницею видех тя. |
1:49 | Отвеща Нафанаил и глагола Ему: Равви, Ты еси Сын Божий, Ты еси Царь Израилев. |
1:50 | Отвеща Иисус и рече ему: зане рех ти, яко видех тя под смоковницею, веруеши: болша сих узриши. |
1:51 См.: 🔗Быт. 28:12 | И глагола ему: аминь, аминь глаголю вам, отселе узрите небо отверсто и Ангелы Божия восходящыя и нисходящыя над Сына Человеческаго. |