Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 14 | |
14:1 См.: 🔗2Цар. 5:11 | И посла хирамъ царь тирскiй послы къ давиду, и древа кедрова, и здателей стѣнъ, и древодѣлей, да созиждутъ ему домъ. |
14:2 | И позна давидъ, яко уготова его Господь царемъ надъ Израилемъ, яко воздвижеся въ высоту царство его, ради людій его Израиля, |
14:3 См.: 🔗2Цар. 5:13 | и поятъ давидъ еще жены во Иерусалимѣ: и родишася ему еще сынове и дщери. |
14:4 См.: 🔗2Цар. 5:14 🔗1Пар. 3:5 | И сiя имена ихъ, иже родишася ему во Иерусалимѣ: саммаа и Совавъ, наѳанъ и соломонъ, |
14:5 | и Иевааръ и Елисуй и Елифааѳъ |
14:6 | и нагеѳъ, и Нафагъ и Иафiе, |
14:7 | и Елисама и Валiада и Елифалетъ. |
14:8 См.: 🔗2Цар. 5:17 | И услышаша иноплеменницы, яко помазанъ бысть давидъ въ царя надъ всѣмъ Израилемъ, и изыдоша вси иноплеменницы взыскати давида. И услыша давидъ и изыде противу ихъ. |
14:9 | Иноплеменницы же прiидоша и разлiяшася во юдоли исполиновъ. |
14:10 | И вопроси давидъ Бога, глаголя: аще взыду на иноплеменники, и предаси ли ихъ въ руки моя? И рече ему Богъ: взыди, и предамъ ихъ въ руки твоя. |
14:11 См.: 🔗2Цар. 5:20 | И изыде во Ваалъ-фарасинъ, и порази ихъ тамо давидъ. И рече давидъ: разсѣче Богъ враги моя рукою моею, якоже разсѣченiе воды. Сего ради нарече имя мѣсту тому фарасинъ, разсѣченiе. |
14:12 См.: 🔗Втор. 7:5 | И оставиша тамо боги своя иноплеменницы, ихже давидъ повелѣ сожещи огнемъ. |
14:13 См.: 🔗2Цар. 5:22 | И приложиша еще иноплеменницы, и разлiяшася еще во юдоли исполиновъ. |
14:14 | И вопроси паки давидъ Бога. И рече ему Богъ: не исходи за ними: отвратися от нихъ, и прiидеши на нихъ прямо грушей: |
14:15 | и будетъ егда услышиши гласъ шума верховъ грушей, тогда изыдеши на брань, яко изыде Богъ предъ тобою, да поразитъ полки иноплеменнически. |
14:16 См.: 🔗2Цар. 5:25 | И сотвори давидъ, якоже повелѣ ему Богъ: и порази полки Филистимовъ от гаваона даже до газира. |
14:17 | И прославися имя давидово во всѣхъ странахъ, и Господь даде страхъ его на вся языки. |