Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
10:1 | И царица савска услыша имя соломоне и имя Господне, и прiиде искусити его притчами: |
10:2 | и прiиде во Иерусалимъ съ силою тяжкою зѣло: и на велблюдѣхъ привезоша ароматы и злата много зѣло, и каменiе драгое: и вниде къ соломону и глагола ему вся, елика имѣ на сердцы своемъ. |
10:3 См.: 🔗2Пар. 9:2 | И возвѣсти ей соломонъ вся глаголы ея: и не бѣ слово презрѣно от царя, егоже не возвѣсти ей. |
10:4 См.: 🔗2Пар. 9:3 | И видѣ царица савска весь смыслъ соломонь и домъ егоже созда, |
10:5 | и снѣди соломони, и жилища отроковъ его, и предстоянiе служащихъ ему, и облаченiе его, и виночерпцы его, и всесожженiя его, яже приношаше во храмѣ Господни, и внѣ себе бысть, |
10:6 См.: 🔗2Пар. 9:5 | и рече къ соломону царю: истинна суть словеса, яже слышахъ въ земли моей, |
10:7 | о словесѣхъ твоихъ и о смыслѣ твоемъ: и не яхъ вѣры глаголющымъ ми, дондеже прiидохъ сѣмо, и видѣста очи мои: и се, нѣсть ни полъ того, якоже ми повѣдаша: приложилъ еси премудрость и благая къ симъ паче всякаго слуха, егоже слышахъ въ земли моей: |
10:8 | блаженны жены твоя, блажени отроцы твои сіи, иже предстоятъ предъ тобою всегда, слышаще всякiй смыслъ твой: |
10:9 | буди Господь Богъ твой благословенъ, иже восхотѣ тя дати на престолъ Израилевъ, понеже возлюби Господь Израиля утвердити во вѣки и постави тя царя надъ ними творити судъ въ правдѣ и въ судьбахъ ихъ. |
10:10 См.: 🔗2Пар. 9:9 | И даде соломону сто и двадесять талантъ злата, и ароматы многи зѣло, и каменiе драгое: не прiидоша еще таковыя ароматы во множествѣ, яже даде царица савска царю соломону. |
10:11 | И корабль хирамль приносящь злато изъ Софира, [и] принесе древа нетесана многа зѣло, и каменiе драгое. |
10:12 См.: 🔗Еккл. 2:8 | И сотвори царь древомъ нетесанымъ подпоры храму Господню и дому цареву, и сопѣли и гусли пѣвцемъ: не прiидоша по семъ таковая древеса нетесаная на земли, ниже видѣна быша гдѣ даже до дне сего. |
10:13 См.: 🔗2Пар. 9:12 | И царь соломонъ даде царицѣ савстѣй вся, елика восхотѣ и елики проси у него, кромѣ всѣхъ, яже даде ей рукама своима соломонъ царь, И возвратися, и отъиде въ землю свою, сама и вси отроцы ея. |
10:14 См.: 🔗2Пар. 9:13 | И бѣ вѣсъ принесеннаго злата соломону во едино лѣто шесть сотъ и шестьдесятъ и шесть талантъ злата, |
10:15 | кромѣ даней от подданныхъ и от купцовъ и от всѣхъ царей странныхъ и от воеводъ земныхъ. |
10:16 См.: 🔗3Цар. 14:26 | И сотвори царь соломонъ триста копiй златыхъ кованныхъ, по триста златыхъ во едино копiе вдѣла: |
10:17 См.: 🔗Иер. 46:3 | и триста щитовъ кованныхъ златыхъ, по три литры злата бяше на коемждо щитѣ: и даде я царь во храмъ дубравы Ливанскiя. |
10:18 См.: 🔗2Пар. 9:17 | И сотвори царь престолъ от костей слоновыхъ велiй и позлати его златомъ искушенымъ: |
10:19 | шесть степеней престолу, и образы телцовъ престолу созади, и верхъ престола круглъ бѣ созади его, и руцѣ сюду и сюду на престолѣ сѣдалища, и два льва стояща при рукахъ, |
10:20 | и дванадесять львы стояще ту на шести степенехъ сюду и сюду: не бяше тако во всякомъ царствѣ. |
10:21 См.: 🔗2Пар. 9:20 | И вси сосуди, иже бяху при царѣ соломонѣ, злати бѣша, и умывалницы златы и вси сосуди въ храмѣ дубравы Ливанскiя златокованны: не бяше сребра, понеже за ничто бѣ сребро во дни соломони: |
10:22 См.: 🔗3Цар. 9:27 🔗2Пар. 9:21 | корабль бо Ѳарсійскiй царю соломону на мори съ корабли хирамлими, единою во трiехъ лѣтѣхъ прихождаше цареви корабль изъ Ѳарсиса и приношаше злато и сребро, и зубы слоновы, и пиѳики и павы, и каменiе точеное и тесаное. |
10:23 | И возвеличися соломонъ паче всѣхъ царей земныхъ и богатствомъ и смысломъ. |
10:24 | И вси царiе земстiи искаху видѣти лице соломона, еже бы услышати смысла его, егоже даде ему Господь въ сердцы его: |
10:25 | и тіи приношаху кійждо дары своя, и сосуды златы и сребряны, и ризы, стакти и сладкости, и кони и мски на всякое лѣто. |
10:26 См.: 🔗2Пар. 1:14 | И собра соломонъ колесницы и кони, и бяху соломону четыредесять тысящъ кобылицъ въ колесницы, и дванадесять тысящъ конныхъ: и постави я во градѣхъ колесницъ, а [друзіи бяху] у царя во Иерусалимѣ: |
10:27 | и бѣ властелинъ всѣмъ царемъ от рѣки и до земли иноплеменникъ и до предѣлъ Египта. |
10:28 См.: 🔗2Пар. 1:15 | И сложи царь злато и сребро во Иерусалимѣ якоже каменiе, и кедры сложи якоже черничiе, еже на поли во множествѣ. |
10:29 См.: 🔗Втор. 17:16 🔗2Пар. 1:16 | И привождаху соломону кони от Египта и от Ѳекуя купцы царстiи и куповаху от Ѳекуя промѣною. |
10:30 | И прихождаху колесницы изъ Египта за шесть сотъ сребреникъ, и конь за сто пятьдесятъ сребреникъ: такожде и ко всѣмъ царемъ Хеттимскимъ и сирийскимъ по морю исхождаху. |