Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 19 | |
19:1 См.: 🔗3Цар. 18:40 | И возвѣсти Ахаавъ Иезавели женѣ своей вся, елика сотвори илiа, и яко изби пророки оружiемъ. |
19:2 См.: 🔗3Цар. 2:23 🔗3Цар. 20:10 | И посла Иезавель ко илiи и рече: аще ты еси илiа, азъ же Иезавель: сiя да сотворятъ ми бози и сiя да приложатъ ми, яко въ сей же часъ утро положу душу твою, якоже душу единаго от нихъ. |
19:3 См.: 🔗Быт. 21:31 | И убояся илiа, и воста, и отъиде души ради своея, и прiиде въ вирсавію землю Иудину, и остави отрочище свое тамо, |
19:4 | самъ же иде въ пустыню дне путь, и прiиде, и сѣде подъ смерчiемъ, и проси души своей смерти, и рече: довлѣетъ нынѣ [ми], возми убо от мене душу мою, Господи, яко нѣсмь азъ лучшiй отецъ моихъ. |
19:5 | И ляже, и успе подъ садомъ: и се, ангелъ Господень коснуся ему и рече ему: востани, яждь и пій. |
19:6 | И воззрѣ илiа: и се, у возглавiя его опрѣснокъ ячменный и чванецъ воды. И воста, и яде и пи, и возвратився успе. |
19:7 | И обратися ангелъ Господень вторицею, и коснуся ему, и рече ему: востани, яждь и пій, яко многъ от тебе путь. |
19:8 | И воста, и яде и пи: и иде въ крѣпости яди тоя четыредесять дній и четыредесять нощей до горы Божiя Хоривъ. |
19:9 См.: 🔗3Цар. 18:9 | И вниде тамо въ пещеру, и вселися въ ней. И се, глаголъ Господень къ нему и рече: что ты здѣ, илiе? |
19:10 См.: 🔗Рим. 11:3 | И рече илiа: ревнуя поревновахъ по Господѣ [бозѣ] Вседержители, яко оставиша тя сынове Израилевы: олтари твоя раскопаша, и пророки твоя избиша оружiемъ, и остахъ азъ единъ, и ищутъ души моея изъяти ю. |
19:11 | И рече: изыди утро и стани предъ Господемъ въ горѣ: и се, мимо пойдетъ Господь, и духъ великъ и крѣпокъ разоряя горы и сокрушая каменiе въ горѣ предъ Господемъ, [но] не въ дусѣ Господь: и по дусѣ трусъ, и не въ трусѣ Господь: |
19:12 | и по трусѣ огнь, и не во огни Господь: и по огни гласъ хлада тонка, и тамо Господь. |
19:13 См.: 🔗Исх. 3:6 | И бысть яко услыша илiа, покры лице свое милотiю своею, и изыде и ста предъ вертепомъ. И се, къ нему бысть гласъ и рече: что ты здѣ, илiе? |
19:14 | И рече илiа: ревнуя поревновахъ по Господѣ Бозѣ Вседержители, яко оставиша завѣтъ твой сынове Израилевы, и олтари твоя раскопаша, и пророки твоя избиша оружiемъ, и остахъ азъ единъ, и ищутъ души моея изъяти ю. |
19:15 | И рече Господь къ нему: иди, возвратися путемъ своимъ, и изыдеши на путь пустыни Дамасковы, и помажеши азаила на царство сирійское, |
19:16 См.: 🔗4Цар. 9:1 🔗Сир. 48:8 | и ииуа сына намессіина помажеши на царство надъ Израилемъ, и Елиссеа сына Сафатова от Авелмаула помажеши вмѣсто себе пророка: |
19:17 См.: 🔗4Цар. 9:24 🔗2Пар. 22:8 | и будетъ спасаемаго от оружiя азаилева убiетъ ииуй, и спасаемаго от оружiя ииуина убiетъ Елиссей: |
19:18 См.: 🔗Рим. 11:4 | и оставиши во Израили седмь тысящъ мужей, вся колѣна, яже не преклониша колѣна Ваалу, и всяка уста, яже не молишася ему. |
19:19 См.: 🔗4Цар. 1:8 🔗Зах. 13:4 | И иде оттуду, и обрѣте Елиссеа сына Сафатова, и сей оряше двѣманадесятьма супругома воловъ предъ нимъ, и той самъ по двоюнадесяти супругъ. И прiиде илiа къ нему, и поверже милоть свою на него. |
19:20 | И остави Елиссей волы, и тече вслѣдъ илiи, и рече: [молю тя,] да облобыжу отца моего и матерь мою, и иду вслѣдъ тебе. И рече ему илiа: иди, возвратися, яко сотворихъ тебѣ. |
19:21 См.: 🔗1Цар. 6:14 | И возвратися от него: и взя супруги воловъ, и закла, и испече я въ сосудѣхъ воловныхъ, и даде людемъ, и ядоша. И воста, и иде вслѣдъ илiи, и служаше ему. |