Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 См.: 🔗Лк. 1:47 🔗Пс. 91:11 | И помолися анна и рече: утвердися сердце мое въ Господѣ, вознесеся рогъ мой въ Бозѣ моемъ, разширишася уста моя на враги моя, возвеселихся о спасенiи твоемъ: |
2:2 См.: 🔗Мф. 19:17 🔗Исх. 15:11 | яко нѣсть святъ яко Господь, и нѣсть праведенъ яко Богъ нашъ, и нѣсть святъ паче тебе: |
2:3 | не хвалитеся и не глаголите высокая въ гордыни, ниже да изыдетъ велерѣчiе изъ устъ вашихъ: яко Богъ разумовъ Господь, и Богъ уготовляяй начинанiя своя: |
2:4 См.: 🔗Лк. 1:52 | лукъ сильныхъ изнеможе, и немощствующiи препоясашася силою: |
2:5 См.: 🔗Лк. 1:53 | исполненнiи хлѣба лишишася, и алчущiи пришелствоваша землю: яко неплоды роди седмь, и многая въ чадѣхъ изнеможе: |
2:6 | Господь мертвитъ и живитъ, низводитъ во адъ и возводитъ, |
2:7 См.: 🔗Сир. 11:21 | Господь убожитъ и богатитъ, смиряетъ и выситъ, |
2:8 См.: 🔗Пс. 112:7 | возставляетъ от земли убога и от гноища воздвизаетъ нища посадити его съ могущими людій, и престолъ славы дая въ наслѣдiе имъ: |
2:9 См.: 🔗Пс. 146:6 | даяй молитву молящемуся и благослови лѣта праведнаго, яко не въ крѣпости силенъ мужъ: |
2:10 См.: 🔗Ис. 45:9 | Господь немощна сотвори сопостата его, Господь святъ: да не хвалится премудрый премудростiю своею, и да не хвалится сильный силою своею, и да не хвалится богатый богатствомъ своимъ: но о семъ да хвалится хваляйся, еже разумѣти и знати Господа, и творити судъ и правду посредѣ земли: Господь взыде на небеса и возгремѣ: той судитъ концемъ земли, праведенъ сый, и дастъ крѣпость царемъ нашымъ и вознесетъ рогъ христа своего. |
2:11 | И оставиша его тамо предъ Господемъ и отидоша во Армаѳемъ въ домъ свой: отроча же бѣ служа лицу Господню предъ лицемъ иліи жерца. |
2:12 См.: 🔗Втор. 13:13 | Сынове же иліи жерца [быша] сынове погибелнiи, не вѣдуще Господа, |
2:13 | ни оправданiя жреческа предъ людьми всѣми жрущими. И прихождаше отрокъ жреческъ, егда варятся мяса, и удица трезубна въ руку его, |
2:14 См.: 🔗Лев. 7:34 | и влагаше ю въ конобъ великiй, или въ мѣдяный сосудъ, или горнецъ, и все еже вонзеся на удицу, взимаше е себѣ жрецъ: и тако творяху всему Израилеви приходящему пожрети Господеви въ Силомѣ. |
2:15 См.: 🔗Лев. 3:3 | И прежде кажденiя тука, прихождаше отрокъ жреческъ и глаголаше мужеви жрущему: даждь мяса испещи жерцу, и не возму от тебе мяса варенаго от коноба. |
2:16 | И глаголаше мужъ жряй: да покадится первѣе тукъ, якоже подобаетъ, и тогда возмеши себѣ от всѣхъ, еже хощетъ душа твоя. И рече: ни, нынѣ даждь: аще же не даси, возму силою. |
2:17 См.: 🔗Рим. 2:24 🔗2Кор. 6:3 | И бѣ предъ Господемъ грѣхъ отроковъ велiй зѣло, яко отметаху жертву Господню. |
2:18 | И самуилъ бѣ служа предъ Господемъ, отрочищь сый опоясанъ во Ефудъ льнянъ. |
2:19 | И хламиду малу сотвори ему мати его, и приношаше ему от дній во дни, егда восхождаше съ мужемъ своимъ пожрети жертву дній. |
2:20 | И благослови илій Елкану и жену его, глаголя: да воздастъ ти Господь сѣмя от жены сея за даръ, егоже даровалъ еси Господеви. И отъиде человѣкъ въ мѣсто свое. |
2:21 | И посѣти Господь Богъ анну, и зача, и роди еще три сыны и дщери двѣ. И возвеличися отрокъ самуилъ предъ Господемъ. |
2:22 | Илій же состарѣся зѣло: и услыша, яже творяху сынове его всѣмъ сыномъ Израилевымъ, и яко бываху съ женами предстоящими у дверiй скинiи свидѣнiя, |
2:23 | и рече имъ: почто творите по глаголу сему, егоже азъ слышу изъ устъ всѣхъ людій Господнихъ [о васъ]? |
2:24 | ни, чада, ни: яко не благъ слухъ, егоже азъ слышу о васъ: не творите тако, яко не добры слухи, яже азъ слышу, еже не работати людемъ Богу: |
2:25 См.: 🔗Чис. 15:30 🔗3Цар. 12:16 | аще согрѣшая согрѣшитъ мужъ мужеви, помолятся о немъ ко Господу: аще же Господеви согрѣшитъ, кто помолится о немъ? И не послушаста гласа отца своего, яко хотяй восхотѣ Господь погубити я. |
2:26 | Отрокъ же самуилъ хождаше предуспѣвая, и бѣ благъ предъ Господемъ и человѣки. |
2:27 См.: 🔗Исх. 4:27 🔗Деян. 7:25 | И прiиде человѣкъ Божiй ко илію и рече: сiя глаголетъ Господь: открываяся открыхся въ дому отца твоего, сущымъ имъ въ земли Египетстѣй рабомъ въ дому фараони, |
2:28 См.: 🔗Лев. 7:34 🔗Лев. 10:14 | и избрахъ домъ отца твоего от всѣхъ домовъ Израилевыхъ мнѣ служити, еже восходити ко олтарю моему и кадити кадиломъ и носити Ефудъ, и дахъ дому отца твоего вся, яже огня жертвенная сыновъ Израилевыхъ, въ снѣдь: |
2:29 | и почто ты воззрѣлъ еси на ѳимiамъ мой и на жертву мою безстуднымъ окомъ, и прославилъ сыны твоя паче мене, еже благословляти начатокъ всякiя жертвы Израилевы предо мною? |
2:30 | сего ради сiя глаголетъ Господь Богъ Израилевъ, глаголя: рекохъ, домъ твой и домъ отца твоего прейдетъ предо мною до вѣка: а нынѣ глаголетъ Господь: никакоже мнѣ, зане токмо прославляющыя мя прославлю, и уничижаяй мя безчестенъ будетъ: |
2:31 См.: 🔗3Цар. 2:27 | се, дніе идутъ, и потреблю сѣмя твое и сѣмя дому отца твоего, и не будетъ старца въ дому твоемъ во вся дни, |
2:32 См.: 🔗3Цар. 2:26 | и узриши державу мою во всѣхъ, имиже разблажаетъ Израиля, и не будетъ старца въ дому твоемъ во вся дни: |
2:33 См.: 🔗Пс. 101:24 🔗Пс. 111:10 | и мужа не истреблю тебѣ от олтаря моего, во еже оскудѣти очесемъ его и истаяти души его: и вси прочiи дому твоего падутъ оружiемъ мужескимъ: |
2:34 См.: 🔗1Цар. 4:11 | и сiе тебѣ знаменiе, еже прiидетъ на оба сына твоя сiя Офни и Финееса: въ день единъ умрутъ оба: |
2:35 | и возставлю себѣ жерца вѣрна, иже вся яже въ сердцы моемъ и яже въ души моей сотворитъ, и созижду ему домъ вѣренъ, и предъидетъ предъ христомъ моимъ во вся дни: |
2:36 См.: 🔗3Цар. 2:27 🔗Иез. 44:14 | и будетъ всякъ оставшiйся въ дому твоемъ прiидетъ поклонитися ему съ цатою сребра и хлѣбомъ единымъ, глаголя: прiими мя къ единому от священнослуженiй твоихъ, еже ясти хлѣбъ. |