Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 7 | |
7:1 | Случися же и седмимъ братiямъ вкупѣ съ матерiю ятымъ, понуждаемымъ быти от царя ясти противу правилъ мяса свиная, бичми и жилами волуями мучимымъ. |
7:2 | Единъ же от нихъ, иже бѣ первый, тако рече: что хощеши вопрошати и научитися от насъ? готови бо есмы умрети, нежели преступити отеческiя законы. |
7:3 | Разгнѣвався же царь повелѣ сковрады и конобы разжещи. |
7:4 | Имже скоро разжженнымъ бывшымъ, повелѣ сущему от нихъ предводителю слова отрѣзати языкъ, и со всего кожу содравше, краи удовъ тѣлесныхъ отсѣщи, прочiимъ братiямъ и матери смотрящымъ. |
7:5 | И егда уже неключимь сотворенъ бысть всѣми [удесы], повелѣ огню предати еще дышуща и пещи на сковрадѣ: пару же умножающуся от сковрады, [прочiи купно] съ матерiю другъ друга поощряху умрети мужественно, глаголюще сице: |
7:6 См.: 🔗Втор. 32:43 | Господь Богъ зритъ и о истинѣ нашей утѣшается, якоже предъ лицемъ свидѣтельствующею пѣснiю изъяви Моисей глаголя: и о рабѣхъ своихъ утѣшится. |
7:7 | Умершу же первому симъ образомъ, втораго изводяху на поруганiе: и кожу со главы его со власы содравше, и вопрошаху: будеши ли ясти прежде неже умучено будетъ все тѣло по удамъ. |
7:8 | Онъ же отвѣщавъ отеческимъ гласомъ, рече: ни. Тѣмже и сей по ряду прiятъ мученiе, якоже и первый. |
7:9 | Въ послѣднемъ же издыханiи бывъ, рече: ты убо, окаяннѣйшiй, от настоящаго живота насъ погубляеши, Царь же мiра умершихъ насъ своихъ ради законовъ воскреситъ насъ въ воскресенiе живота вѣчнаго. |
7:10 | По семъ же третiй поругаемь бѣ, и языка испрошенъ, абiе издаде и руцѣ дерзостнѣ простре и мужественнѣ рече: |
7:11 | от небесе сiя притяжахъ, и его ради законовъ презираю сiя, и от него сiя паки уповаю воспрiяти. |
7:12 | Яко и самъ царь и сущiи съ нимъ удивляхуся юнаго великодушiю, яко ни во чтоже полагаше муки. |
7:13 | И сему скончавшуся, и четвертаго такожде мучаху мучителе. |
7:14 | И егда уже бысть къ смерти тако рече: лучше убиваемымъ от человѣкъ упованiя чаяти от Бога, паки имущымъ воскрешенымъ быти от него, тебѣ же воскресенiе въ животъ не будетъ. |
7:15 | По семъ же пятаго приведше мучиша. И онъ воззрѣвъ нань, рече: |
7:16 | власть въ человѣцѣхъ имѣя тлѣненъ сый, еже хощеши, твориши: не мни же роду нашему от Бога оставлену быти: |
7:17 | ты же потерпи и зри велiю державу его, како тебе и сѣмя твое умучитъ. |
7:18 | По семъ приведоша шестаго. И той умрети начинающь рече: не прельщайся суетно, мы бо себе ради сiя страждемъ согрѣшающе къ Богу нашему, сего ради достойная удивленiя быша: |
7:19 | ты же да не возмниши неповиненъ быти, богоборствовати наченъ. |
7:20 | безмѣрно же мати дивная и благія памяти достойная, яже погибающихъ седми сыновъ единаго дне и времене видящи, благодушно терпяше ради упованiя на Господа, |
7:21 | и коегождо ихъ увѣщаваше отеческимъ гласомъ, доблiя исполнена мудрости и женское помышленiе мужескою душею воздвизающи, глаголаше къ нимъ: |
7:22 | не вѣмъ, яко во чревѣ моемъ явистеся, ниже бо азъ духъ и животъ дахъ вамъ, и коегождо уды не азъ составихъ, |
7:23 | но мiра творецъ, создавый родъ человѣчь и всѣхъ изобрѣтый рожденiе, и духъ и жизнь вамъ паки воздастъ съ милостiю, яко нынѣ сами себе презираете ради законовъ его. |
7:24 | Антiохъ же непщуяй уничиженъ быти и понощающь гласъ презрѣвъ, еще юнѣйшему живу сущу, не токмо словесы творяше увѣщанiе, но и клятвою подкрѣпляше, богата купно и блажена сотворити, преведеннаго от отеческихъ законовъ, и друга возъимѣти, и дѣла ввѣрити ему. |
7:25 | Симъ же юношѣ никакоже внемлющу, призвавъ царь матерь увѣщаваше, да будетъ юношѣ совѣтница на спасенiе. |
7:26 | Много же ему увѣщавающу, обѣщала совѣтовати сыну своему. |
7:27 | Приклонившися же къ нему, посмѣяся жестокому мучителю и сице рече отеческимъ гласомъ: сыне, помилуй мя носившую тя во чревѣ девять месяцей и млекомъ питавшую тя лѣта три, и воскормившую тя и приведшую въ возрастъ сей, и болѣзни воспитанiя понесшую: |
7:28 | молю тя, чадо, да воззриши на небо и землю, и вся, яже въ нихъ, видящь уразумѣеши, яко от не сущихъ сотвори сiя Богъ, и человѣчь родъ тако бысть: |
7:29 | не убойся плоторастерзателя сего, но достоинъ бывъ братiи твоея, воспрiими смерть, да въ милости съ братiею твоею воспрiиму тя. |
7:30 | Еще же сiя ей глаголющей, юноша рече: кого ожидаете? не слушаю повелѣнiя царева, но повелѣнiя закона слушаю даннаго отцемъ нашымъ чрезъ Моисеа: |
7:31 | ты же всякiя злобы изобрѣтатель бывъ на иудеи, не избѣжиши рукъ Божiихъ: |
7:32 | мы бо за грѣхи нашя сiя страждемъ: |
7:33 | аще же ради устрашенiя и наказанiя живый Господь нашъ мало прогнѣвася, но паки примирится рабомъ своимъ: |
7:34 | ты же, о, беззаконниче и всѣхъ человѣкъ сквернавѣйше, не возносися суетно кичася тщетнымъ упованiемъ, на небесныя рабы его возносящь руку: |
7:35 | не у бо Вседержителя и всевидца Бога суда избѣглъ еси: |
7:36 | братiя бо наша мало нынѣ болѣзни потерпѣвше по завѣту Божiю вѣчный животъ получиша: ты же судомъ Божiимъ праведную казнь гордыни [твоея] воспрiимеши: |
7:37 | азъ же, якоже братiя моя, душу и тѣло мое предаю за отеческiя законы, призывая Бога милостива вскорѣ быти Израилю: ты же съ мученiемъ и бiенiемъ исповѣси, яко единъ токмо Богъ есть: |
7:38 | на мнѣ и на братiи моей престанетъ Вседержителя гнѣвъ нанесенный праведно всему роду нашему. |
7:39 | Тогда царь разъярися яростiю нань паче иныхъ лютѣе, горцѣ терпящь посмѣянiе. |
7:40 | И сей убо чистъ от житiя премѣнися, по всему на Господа уповая. |
7:41 | Послѣди же сыновъ и мати скончася. |
7:42 | Сiя убо о жертвахъ и о превосходящихъ мучительствахъ толико извѣстишася. |