Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 16 | |
16:1 | И слышахъ гласъ велiй от храма глаголющь седмимъ Ангеломъ: идите и излійте седмь фiалъ ярости Божiя на землю. |
16:2 См.: 🔗Исх. 9:9 🔗Отк. 13:17 | И иде первый Ангелъ и излiя фiалъ свой на землю: и бысть гной золъ и лютъ на человѣцѣхъ имущихъ начертанiе звѣрино и кланяющихся иконѣ его. |
16:3 | И вторый Ангелъ излiя фiалъ свой въ море: и бысть кровь яко мертвеца, и всяка душа жива умре въ мори. |
16:4 | И третiй Ангелъ излiя фiалъ свой на рѣки и на источники водныя: и бысть кровь. |
16:5 См.: 🔗Отк. 4:8 | И слышахъ Ангела воднаго глаголюща: праведенъ еси, Господи, сый и Иже бѣ, и преподобенъ, яко сiя судилъ еси: |
16:6 См.: 🔗Ис. 49:26 🔗Мф. 23:34 | зане кровь святыхъ и пророкъ излiяша, и кровь имъ далъ еси пити: достойни бо суть. |
16:7 | И слышахъ другаго от олтаря глаголюща: ей, Господи Боже Вседержителю, истинни и прави суди Твои. |
16:8 | И четвертый Ангелъ излiя фiалъ свой на солнце: и дано бысть ему опаляти человѣки огнемъ. |
16:9 | И опалишася человѣцы зноемъ великимъ, и хулиша имя Божiе, иже имать область на язвахъ сихъ, и не покаяшася дати Ему славы. |
16:10 | И пятый Ангелъ излiя фiалъ свой на престолъ звѣринъ: и бысть царство его омрачено, и жваху языки своя от болѣзни, |
16:11 | и хулиша Бога небеснаго от болѣзни и от язвъ своихъ, и не покаяшася от дѣлъ своихъ. |
16:12 См.: 🔗Иер. 50:38 | И шестый Ангелъ излiя фiалъ свой на рѣку велику Евфратъ: и изсяче вода ея, да уготовится путь царемъ сущымъ от востокъ солнечныхъ. |
16:13 | И видѣхъ изъ устъ змія и изъ устъ звѣря и изъ устъ лжаго пророка духи три нечистыя, яко жабы исходящыя: |
16:14 См.: 🔗Мф. 24:24 | суть бо дуси демонстiи творяще знаменiя, иже исходятъ къ царемъ всея вселенныя, собрати я на брань въ день той великiй Бога Вседержителя. |
16:15 | Се, гряду яко тать: блаженъ бдяй и блюдый ризы своя, да не нагъ ходитъ и узрятъ срамоту его. |
16:16 | И собра ихъ на мѣсто нарицаемое еврейски Армагеддонъ. |
16:17 | И седмый Ангелъ излiя фiалъ свой на воздухъ: и изыде гласъ велiй от храма небесе от престола, глаголя: бысть. |
16:18 | И быша блистанiя и громи и гласи, и бысть трусъ великъ, яковъ николиже бысть, отнелѣже быша человѣцы на земли, толикъ трусъ, тако велiй. |
16:19 См.: 🔗Иер. 25:15 🔗Отк. 14:8 | И бысть градъ великъ въ три части, и гради язычестiи падоша, и Вавилонъ великiй помяновенъ бысть предъ Богомъ, дати ему чашу вина ярости гнѣва Своего. |
16:20 | И всякъ островъ бѣжа, и горы не обрѣтошася: |
16:21 | и градъ великъ, яко талантесъ, сниде съ небесе на человѣки: и хулиша человѣцы Бога от язвы градныя, яко велiя есть язва его зѣло. |