|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 4 | |
| 4:1 | Сiя книга повелѣнiй Божiихъ и законъ сый во вѣкъ: вси держащiися ея въ животъ [внидутъ], оставившiи же ю умрутъ. |
| 4:2 | Обратися, Иакове, и имися ея, ходи ко сiянiю прямо свѣта ея. |
| 4:3 | Не даждь иному славы твоея, и полезныхъ тебѣ языку чуждему. |
| 4:4 | Блажени есмы, Израилю, яко угодная Богу намъ разумна суть. |
| 4:5 | Дерзайте, людiе мои, память Израилева. |
| 4:6 | Продани бысте языкомъ не на пагубу: понеже разгнѣвасте Бога, предани бысте супостатомъ, |
| 4:7 | преогорчисте бо сотворшаго васъ, [Бога вѣчнаго,] пожерше бѣсомъ, а не Богу: |
| 4:8 | забысте бо Господа питающаго васъ, опечалисте же и воспитавшаго васъ Иерусалима. |
| 4:9 | Видѣ бо нашедшiй вамъ гнѣвъ от Бога и рече: слышите, приселницы Сiони, наведе бо ми Господь сѣтованiе велико, |
| 4:10 | видѣхъ бо плѣненiе людій сыновъ моихъ и дщерей, еже наведе имъ вѣчный. |
| 4:11 | Питахъ бо я съ веселiемъ, испустихъ же я съ плачемъ и рыданiемъ. |
| 4:12 | Никтоже да радуется о мнѣ вдовицѣ и оставленнѣй от многихъ, опустѣхъ за грѣхи чадъ моихъ, понеже уклонишася от закона Божiя, |
| 4:13 | и оправданiй его не познаша, и не ходиша въ путехъ заповѣдiй Божiихъ, ниже стезьми наказанiя въ правдѣ его ступаша. |
| 4:14 | Да прiидутъ окрестнiи Сiони, и помяните плѣненiе сыновъ моихъ и дщерей, еже наведе имъ вѣчный: |
| 4:15 | наведе бо на ня языкъ издалеча, языкъ безстудный и иноязычный: |
| 4:16 | понеже не усрамишася старца, ни помиловаша отрочате, и отведоша любезныхъ вдовичихъ, и от дщерей едину опустошиша. |
| 4:17 | Азъ же како мощенъ помощи вамъ? |
| 4:18 | Наведый бо вамъ злая избавитъ васъ от руки врагъ вашихъ. |
| 4:19 | Идите, чада, идите: азъ бо остахся пуста, |
| 4:20 | совлекохся ризы мирныя, облекохся же во вретище моленiя моего: возопiю къ вѣчному во дни моя. |
| 4:21 | Дерзайте, чада, возопійте къ Богу, и избавитъ васъ от насилiя руки вражiя. |
| 4:22 | Азъ бо [исперва] надѣяхся на вѣчнаго о спасенiи вашемъ: и прiиде ми радость от святаго въ помилованiи, еже прiидетъ вамъ вскорѣ от вѣчнаго Спаса нашего. |
| 4:23 | Испустихъ бо васъ съ рыданiемъ и плачемъ, отдастъ же ми Богъ васъ съ радостiю и веселiемъ въ вѣкъ. |
| 4:24 | Якоже бо нынѣ видѣша приселницы Сiони ваше плѣненiе [от Бога], такожде узрятъ вскорѣ спасенiе ваше от Бога, еже прiидетъ вамъ со славою великою и со освѣщенiемъ вѣчнаго. |
| 4:25 | Чада, долготерпите иже от Бога нашедшiй вамъ гнѣвъ, гонилъ бо тя врагъ твой, и узриши пагубу его вскорѣ и на выю его наступиши. |
| 4:26 | Младіи мои ходиша въ пути жестоки, восхищени суть, якоже стадо похищено врагами. |
| 4:27 | Дерзайте, чада, и возопійте къ Богу, будетъ бо вамъ от наведшаго память. |
| 4:28 | Якоже бо бысть умъ вашъ заблудити вамъ от Бога, тако нынѣ десятижды усугубите обратившеся взыскати его: |
| 4:29 | наведый бо вамъ злая наведетъ вамъ вѣчное веселiе со спасенiемъ вашимъ. |
| 4:30 | Дерзай, Иерусалиме, утѣшитъ тя нарекій тебе. |
| 4:31 | Окаянни озлобившiи тя и радовавшiися о паденiи твоемъ, [мщенiе будетъ надъ ними]. |
| 4:32 | Окаянни гради, имже поработаша чада твоя, окаянна прiимшая сыны твоя. |
| 4:33 | Якоже бо порадовася о твоемъ паденiи и возвеселися о разоренiи твоемъ, такожде опечалится о своемъ запустѣнiи. |
| 4:34 | И отсѣку от нея веселiе многонародства, и величанiе ея будетъ въ рыданiе. |
| 4:35 | Огнь и найдетъ на ню от вѣчнаго во дни многи, и населится бѣсами на множайшее время. |
| 4:36 | Воззри на востокъ, Иерусалиме, и виждь веселiе грядущее тебѣ от Бога. |
| 4:37 | Се, грядутъ сынове твои, ихже испустилъ еси, грядутъ собрани от востокъ даже до западъ словомъ святаго, радующеся о славѣ Божiей. |
