Второзаконие, глава 27

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 27
27:1	И заповѣда Моисей и старѣйшины сыновъ Израилевыхъ, глаголя: сохраните вся заповѣди сiя, елики азъ заповѣдаю вамъ днесь.
27:2 См.: 🔗Нав. 3:17	И будетъ въ оньже день прейдете Иорданъ на землю, юже Господь Богъ твой даетъ тебѣ во жребiй, и поставиши себѣ каменiе велико и обѣлиши я мѣломъ,
27:3 См.: 🔗Нав. 8:32 🔗Исх. 3:8 🔗Втор. 26:9	и напишеши на каменехъ тѣхъ вся словеса закона сего, егда прейдете Иорданъ, егда внидете въ землю, юже Господь Богъ твой даетъ тебѣ, землю кипящую медомъ и млекомъ, якоже рече Господь Богъ отецъ тво­ихъ тебѣ.
27:4	И будетъ егда прейдете Иорданъ, да поставите каменiе сiе, яже азъ повелѣваю вамъ днесь, въ горѣ Гевалъ, и побѣлиши ихъ мѣломъ:
27:5 См.: 🔗Исх. 20:25 🔗Нав. 8:31	и да созиждеши тамо олтарь Господеви Богу тво­ему, олтарь от­ каменiя: да не воз­ложиши на нихъ желѣза:
27:6	каменiемъ всецѣлымъ да созиждеши олтарь Господеви Богу тво­ему и воз­несеши на немъ всесожженiя Господеви Богу тво­ему,
27:7 См.: 🔗Втор. 14:26	и пожреши жертву спасенiя: и яси, и насытишися тамо, и воз­веселишися предъ Господемъ Богомъ тво­имъ,
27:8	и напишеши на каменiихъ сихъ весь законъ сей явѣ зѣло.
27:9 См.: 🔗Втор. 26:18	И глагола Моисей и жерцы левити всему Израилю, глаголюще: молчи и слыши, Израилю, въ день сей стал­ся еси въ люди Господеви Богу тво­ему:
27:10 См.: 🔗Втор. 26:17 🔗Втор. 28:1	и да послушаеши гласа Господа Бога тво­его, и да сотвориши вся заповѣди Его и оправданiя Его, яже азъ заповѣдаю тебѣ днесь.
27:11	И заповѣда Моисей людемъ въ той день, глаголя:
27:12 См.: 🔗Втор. 11:29	сіи да станутъ благословляти люди на горѣ Гаризинъ, прешедше Иорданъ: Симеонъ, Левій, Иуда, Иссахаръ, Иосифъ и Венiаминъ:
27:13	и сіи да станутъ на клятву на горѣ Гевалъ: Рувимъ, Гадъ и Асиръ, Завулонъ, Данъ и Нефѳалимъ.
27:14	И от­вѣщав­ше рекутъ левити всему Израилю гласомъ великимъ:
27:15 См.: 🔗Дан. 9:11	проклятъ человѣкъ, иже сотворитъ изваянiе и слiянiе, мерзость Господеви, дѣло рукъ художника, и положитъ е въ сокровенiи. И от­вѣщав­ше вси людiе рекутъ: буди.
27:16 См.: 🔗Исх. 21:17 🔗Лев. 20:9 🔗Прит. 20:20	Проклятъ безчестяй отца сво­его или матерь свою. И рекутъ вси людiе: буди.
27:17 См.: 🔗Втор. 19:14	Проклятъ прелагаяй предѣлы ближняго сво­его. И рекутъ вси людiе: буди.
27:18	Проклятъ прельщаяй слѣпаго въ пути. И рекутъ вси людiе: буди.
27:19 См.: 🔗Исх. 22:21 🔗Лев. 19:33 🔗Иер. 5:28	Проклятъ, иже уклонитъ судъ при­­шелцу и сиротѣ и вдовѣ. И рекутъ вси людiе: буди.
27:20 См.: 🔗Лев. 18:8 🔗Лев. 20:11 🔗Иез. 22:10	Проклятъ лежай съ женою отца сво­его, яко от­крылъ есть покровенiе отца сво­его. И рекутъ вси людiе: буди.
27:21 См.: 🔗Исх. 22:19 🔗Лев. 18:23	Проклятъ лежай со всякимъ скотомъ. И рекутъ вси людiе: буди.
27:22 См.: 🔗Лев. 18:9	Проклятъ лежай съ сестрою сво­ею, дщерiю отца сво­его или дщерiю матере сво­ея. И рекутъ вси людiе: буди.
27:23 См.: 🔗Быт. 38:18 🔗Лев. 18:15	Проклятъ лежай съ тещею сво­ею. И рекутъ вси людiе: буди. Проклятъ лежай съ сестрою жены сво­ея. И рекутъ вси людiе: буди.
27:24 См.: 🔗Быт. 9:6 🔗Исх. 21:12 🔗Лев. 24:17	Проклятъ бiяй ближняго съ лестiю. И рекутъ вси людiе: буди.
27:25 См.: 🔗Исх. 23:8	Проклятъ, иже возметъ дары поразити душу крове неповин­ныя. И рекутъ вси людiе: буди.
27:26 См.: 🔗Гал. 3:10	Проклятъ всякъ человѣкъ, иже не пребудетъ во всѣхъ словесѣхъ закона сего, еже творити я. И рекутъ вси людiе: буди.