Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 См.: 🔗Иак. 1:22 | И сiя заповѣди и оправданiя и суды, елика заповѣда Господь Богъ вашъ научити васъ творити тако на земли, въ нюже вы входите тамо, наслѣдити ю: |
6:2 См.: 🔗Втор. 4:40 | да боитеся Господа Бога вашего, хранити вся оправданiя Его и заповѣди Его, яже азъ заповѣдаю тебѣ днесь, ты и сынове твои, и сыны сыновъ твоихъ, во вся дни живота твоего, да многи дни пребудете. |
6:3 | И послушай, Израилю, и снабди творити, да благо ти будетъ, и да умножитеся зѣло, якоже глагола Господь Богъ отецъ вашихъ, дати тебѣ землю кипящую млекомъ и медомъ.– |
6:4 | –И сiя оправданiя и суды, елика заповѣда Господь [Богъ] сыномъ Израилевымъ въ пустыни, изшедшымъ имъ изъ земли Египетскiя. |
6:5 См.: 🔗Мк. 12:29 | Слыши, Израилю: Господь Богъ нашъ Господь единъ есть. |
6:6 | И возлюбиши Господа Бога твоего от всего сердца твоего и от всея души твоея и от всея силы твоея. |
6:7 См.: 🔗Втор. 4:9 | И да будутъ словеса сiя, яже Азъ заповѣдаю тебѣ днесь, въ сердцы твоемъ и въ души твоей, |
6:8 См.: 🔗Втор. 30:19 🔗Пс. 77:5 | и да накажеши ими сыны твоя, и да возглаголеши о нихъ сѣдяй въ дому и идый путемъ, и лежа и востая: |
6:9 | и навяжеши я въ знаменiе на руку твою, и да будутъ непоколеблема предъ очима твоима: |
6:10 | и да напишете я на празѣхъ храминъ вашихъ и вратъ вашихъ. |
6:11 См.: 🔗Быт. 50:24 🔗Исх. 33:1 | И будетъ егда введетъ тя Господь Богъ твой въ землю, еюже клятся отцемъ твоимъ, Аврааму и Исааку и Иакову, дати тебѣ грады велики и добры, ихже не создалъ еси, |
6:12 См.: 🔗Втор. 8:10 | домы полны всякихъ благъ, ихже не наполнилъ еси, потоки ископаны, ихже не ископалъ еси, винограды и маслины, ихже не насадилъ еси: и ядый и насытився, |
6:13 | вонми себѣ, да не разширится сердце твое, да не забудеши Господа Бога твоего, изведшаго тебе изъ земли Египетскiя, от дому работы. |
6:14 | Господа Бога твоего да убоишися, и Тому единому послужиши, и къ Нему прилѣпишися, и именемъ Его кленешися. |
6:15 См.: 🔗Исх. 20:2 | Да не ходите вслѣдъ боговъ иныхъ, боговъ языческихъ, иже окрестъ васъ: |
6:16 | яко Богъ ревнивъ Господь Богъ твой посредѣ тебе: да не разгнѣвався яростiю Господь Богъ твой на тя, потребитъ тя от лица земли. |
6:17 | Да не искусиши Господа Бога твоего, якоже искушасте во Искушенiи. |
6:18 | Храня да сохраниши заповѣди Господа Бога твоего, свидѣнiя Его и оправданiя Его, елика заповѣда тебѣ: |
6:19 См.: 🔗Быт. 12:7 🔗Быт. 13:15 | и да сотвориши угодное и благое предъ Господемъ Богомъ твоимъ, да благо будетъ тебѣ, и внидеши и наслѣдиши землю благую, еюже клятся Господь отцемъ вашымъ, |
6:20 См.: 🔗Исх. 23:27 | отгнати вся враги твоя от лица твоего, якоже глагола Господь. |
6:21 См.: 🔗Исх. 12:26 | И будетъ егда вопроситъ тя сынъ твой утрѣ, глаголя: что суть свидѣнiя и оправданiя и суды, елика заповѣда Господь Богъ нашъ намъ? |
6:22 | И речеши сыну твоему: раби бѣхомъ фараону въ земли Египетстѣй, и изведе насъ Господь Богъ оттуду рукою крѣпкою и мышцею высокою: |
6:23 | и даде Господь [Богъ] знаменiя и чудеса велика и зла во Египтѣ на фараона и на домъ его и на силу его предъ нами, |
6:24 | и насъ изведе Господь Богъ нашъ оттуду, да введетъ насъ дати намъ землю сiю, еюже клятся Господь Богъ нашъ отцемъ нашымъ, дати ю намъ: |
6:25 См.: 🔗Пс. 66:7 | и заповѣда намъ Господь творити вся оправданiя сiя, боятися Господа Бога нашего, да благо будетъ намъ во вся дни, да живемъ, якоже и днесь, |
6:26 | и милосердiе будетъ намъ, аще сохранимъ творити вся заповѣди закона сего предъ Господемъ Богомъ нашимъ, якоже заповѣда намъ. |