Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
10:1 См.: 🔗1Кор. 3:18 | Мухи умершыя згнояютъ елеа сладость: честно малое мудрости паче славы велики безумiя. |
10:2 | Сердце мудраго одесную его, сердце же безумнаго ошуюю его: |
10:3 | и въ путь егда безумный идетъ, сердце его лишается, и яже помышляетъ, вся безумiе суть. |
10:4 См.: 🔗Пс. 37:2 | Аще духъ владѣющаго взыдетъ на тя, мѣста твоего не остави: яко изцѣленiе утолитъ грѣхи велики. |
10:5 | Есть лукавство, еже видѣхъ подъ солнцемъ, аки невольно изыде от лица владѣющаго: |
10:6 | вданъ безумный въ высоты велики, а богатiи во смиренныхъ сядутъ: |
10:7 | видѣхъ рабовъ на конехъ, и князей идущихъ яко рабовъ на земли. |
10:8 | Копаяй яму впадетъ въ ню, и разоряющаго ограду угрызнетъ его змій. |
10:9 | Изъемляй каменiе поболитъ от нихъ, разсѣцаяй дрова бѣду прiиметъ въ нихъ: |
10:10 | аще спадетъ сѣчиво, и самъ лицемъ смятется: и силы укрѣпитъ, и изобилiе мужу мудрость. |
10:11 | Аще угрызнетъ змій не въ шептѣ, и нѣсть излишества обавающему. |
10:12 | Словеса устъ премудраго благодать, устнѣ же безумнаго потопятъ его: |
10:13 | начало словесъ устъ его безумiе, и послѣдняя устъ его прелесть лукава. |
10:14 См.: 🔗Еккл. 8:7 | Безумный умножаетъ словеса: не разумѣ человѣкъ, что бывшее и что будущее, что созади его, [и] кто возвѣститъ ему? |
10:15 | Трудъ безумныхъ озлобитъ ихъ, иже не разумѣ ити во градъ. |
10:16 См.: 🔗Ис. 3:4 | Горе тебѣ, граде, въ немже царь твой юнъ, и князи твои рано ядятъ. |
10:17 | Блаженна ты, земле, еяже царь твой сынъ свободныхъ, и князи твои во время ядятъ въ силѣ и не постыдятся. |
10:18 | Въ лѣностехъ смирится стропъ, и въ празднествѣ рукъ прокаплетъ храмина. |
10:19 | Во смѣхъ творятъ хлѣбъ и вино и елей, еже веселитися живущымъ: и сребра со смиренiемъ послушаютъ всяческая. |
10:20 См.: 🔗Исх. 22:28 | И въ совѣсти убо твоей не клени царя, и въ клѣти ложницы твоея не клени богатаго: яко птица небесная донесетъ гласъ твой, и имѣяй крилѣ возвѣститъ слово твое. |