Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
10:1 | Рече же Господь къ Моисею глаголя: вниди къ фараону: Азъ бо ожесточихъ сердце его и рабовъ его, да и еще прiидутъ знаменiя сiя на нихъ: |
10:2 См.: 🔗Исх. 12:26 | яко да повѣсте во ушеса чадъ вашихъ и чадомъ чадъ вашихъ, елико наругахся Египтяномъ, и знаменiя Моя, яже сотворихъ въ нихъ, и увѣсте, яко Азъ Господь. |
10:3 См.: 🔗Исх. 9:1 | Вниде же Моисей и Ааронъ предъ фараона и рѣста ему: сiя глаголетъ Господь Богъ Еврейскiй: доколѣ не хощеши усрамитися Мене? Отпусти люди Моя, да послужатъ Ми: |
10:4 См.: 🔗Пс. 104:34 | аще же не хощеши ты отпустити люди Моя, се, Азъ наведу въ сей часъ заутра пруги многи на вся предѣлы твоя, |
10:5 | и покрыютъ лице земли, и не возможеши видѣти земли, и поядятъ весь останокъ земли оставшiйся, егоже остави вамъ градъ, и изъядятъ всяко древо растущее вамъ на земли: |
10:6 | и наполнятся домове твои и домове рабовъ твоихъ, и вси домове по всей земли Египетстѣй: ихже никогдаже видѣша отцы твои, ни прадѣды ихъ, от негоже дне быша на земли, даже до дне сего. И уклонився Моисей, изыде от фараона. |
10:7 | Рекоша же раби фараоновы къ нему: доколѣ намъ сiя будетъ мука? Отпусти люди, да послужатъ Господу Богу своему: или видѣти хощеши, яко погибнетъ Египетъ? |
10:8 | И возвратиша Моисеа и Аарона предъ фараона, и рече имъ фараонъ: идите и послужите Господу Богу вашему: кто же и кто суть идущiи? |
10:9 | И рече Моисей: съ юнотами нашими и съ старцы пойдемъ, съ сынми и дщерьми, и со овцами и волами нашими: будетъ бо праздникъ Господа Бога нашего. |
10:10 | И рече имъ фараонъ: да будетъ тако, Господь съ вами: якоже отпущаю васъ, еда и стяжанiе ваше? Видите, яко лукавство обрѣтается въ васъ: |
10:11 | не тако: но да идутъ мужiе и да послужатъ Богу: сего бо сами просите. И изгнаша ихъ от лица фараонова. |
10:12 См.: 🔗Исх. 9:32 | Рече же Господь Моисею: простри руку твою на землю Египетскую, и да взыдутъ прузи на землю Египетскую, и снѣдятъ всю траву земную и весь плодъ древесный, егоже остави градъ. |
10:13 См.: 🔗Исх. 14:21 🔗Чис. 11:31 | И воздвиже Моисей жезлъ на небо, Господь же наведе вѣтръ южный на землю во весь той день и во всю нощь: утро бысть, и вѣтръ южный взя пруги, |
10:14 См.: 🔗Пс. 77:46 | и наведе я на всю землю Египетскую: и нападоша на вся предѣлы Египетскiя мнози зѣло: прежде сихъ не быша сицевіи прузи, и по сихъ не будутъ тако, |
10:15 См.: 🔗Пс. 104:35 | и покрыша лице земное, и истлѣ земля: и снѣдоша всю траву земную и весь плодъ древесный, иже остася от града: не остася зелено ничтоже на древѣхъ и во всей травѣ польнѣй, по всей земли Египетстѣй. |
10:16 См.: 🔗Исх. 8:25 🔗Исх. 9:27 | Потщася же фараонъ призвати Моисеа и Аарона, глаголя: согрѣшихъ предъ Господемъ Богомъ вашимъ и къ вамъ: |
10:17 | простите убо мой грѣхъ еще нынѣ и помолитеся Господу Богу вашему, да отъиметъ от мене смерть сiю. |
10:18 | Изыде же Моисей от фараона и помолися ко Господу: |
10:19 См.: 🔗Исх. 8:31 | и премѣни Господь от моря вѣтръ великъ и взя пруги, и вверже ихъ въ море Чермное: и не остася ни единъ пругъ на всей земли Египетстѣй. |
10:20 См.: 🔗Исх. 11:10 | И ожесточи Господь сердце фараоново, и не отпусти сыновъ Израилевыхъ. |
10:21 См.: 🔗Ис. 50:3 | Рече же Господь Моисею: простри руку твою на небо, и да будетъ тма по земли Египетстѣй, осязаемая тма. |
10:22 См.: 🔗Пс. 104:28 | Простре же Моисей руку свою на небо, и бысть тма, мракъ, буря по всей земли Египетстѣй три дни: |
10:23 См.: 🔗Прем. 17:5 🔗Прем. 18:1 | и не видѣ никтоже брата своего три дни, и не воста никтоже от одра своего три дни, всѣмъ же сыномъ Израилевымъ бяше свѣтъ во всѣхъ [жилищахъ], въ нихже пребываху. |
10:24 См.: 🔗Исх. 8:8 | И призва фараонъ Моисеа и Аарона, глаголя: идите, послужите Господу Богу вашему: токмо овцы и волы оставите: стяжанiе же ваше да идетъ съ вами. |
10:25 | И рече Моисей: ни: но и ты намъ даси всесожженiя и жертвы, яже сотворимъ Господу Богу нашему: |
10:26 | и скотъ нашъ пойдетъ съ нами, не оставимъ и копыта: от нихъ бо возмемъ на службу Господу Богу нашему: мы же не вѣмы, чимъ послужимъ Господу Богу нашему, дондеже дойдемъ тамо. |
10:27 | Ожесточи же Господь сердце фараоново, и не восхотѣ отпустити ихъ: |
10:28 | и рече ему фараонъ: отиди от мене, внемли себѣ ктому, да не приложиши видѣти лица моего: въ оньже бо день аще явишися мнѣ, умреши. |
10:29 | Рече же Моисей: якоже реклъ еси, ктому не явлюся предъ лицемъ твоимъ. |