Книга Исход, глава 23

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 23
23:1 См.: 🔗Лев. 19:11	Да не прiимеши слуха суетна, да не при­­ложишися съ неправеднымъ быти свидѣтель неправеденъ:
23:2	да не будеши со многими на злобу, да не при­­ложишися ко множе­ст­ву уклонитися со множайшими, яко превратити судъ,
23:3 См.: 🔗Лев. 19:15	и нищаго да не помилуеши на судѣ.
23:4 См.: 🔗Втор. 22:1	Аще же срящеши говядо врага тво­его или осля его заблуждающее, обративъ да от­даси ему:
23:5 См.: 🔗Лк. 14:5	аще же узриши осля врага тво­его падшее подъ бременемъ его, да не мимо­идеши е, но да воз­двигнеши е съ нимъ.
23:6 См.: 🔗Втор. 16:19 🔗Ис. 10:1	Да не превратиши суда нищему въ судѣ его.
23:7 См.: 🔗Дан. 13:62	От всякаго слова неправеднаго да от­ступиши: неповин­на и праведна да не убiеши, и не оправдиши нечестиваго даровъ ради,
23:8 См.: 🔗Втор. 16:19 🔗Сир. 20:29	и да не возмеши даровъ: дары бо ослѣпляютъ очи видящымъ и погубляютъ словеса праведна.
23:9 См.: 🔗Втор. 10:19 🔗Быт. 46:5 🔗Исх. 22:21	И при­­шелца не оскорбляйте, ни стужите [ему]: вы бо вѣсте душу при­­шелчу, понеже сами бѣсте при­­шелцы въ земли Египетстѣй.
23:10 См.: 🔗Лев. 25:3	Шесть лѣтъ да сѣеши землю твою и да собереши плоды ея:
23:11	въ седмое же оставленiе да сотвориши и опустиши ю, и да ясти будутъ убозiи языка тво­его, останки же да снѣдятъ звѣрiе дивiи: тако да сотвориши винограду тво­ему и масличiю тво­ему.
23:12 См.: 🔗Исх. 20:9 🔗Лев. 23:3	Въ шесть дній да сотвориши дѣла твоя, въ седмый же день покой: да почіетъ волъ твой и оселъ твой, и да почіетъ сынъ рабы тво­ея и при­­шлецъ.
23:13 См.: 🔗Втор. 27:1 🔗Исх. 20:3 🔗Нав. 23:7	Вся, елика глаголахъ вамъ, сохраните, именъ же боговъ инѣхъ не поминайте, ниже да слышат­ся изо устъ вашихъ.
23:14	Три краты въ лѣтѣ сотворите Ми праздникъ:
23:15 См.: 🔗Исх. 13:3 🔗Сир. 35:4	праздникъ опрѣсноковъ сохраните творити, седмь дній ядите опрѣсноки, якоже заповѣдахъ тебѣ, во время месяца новыхъ плодовъ, въ той бо изшелъ еси изъ Египта, да не явишися предо Мною тощь:
23:16 См.: 🔗Лев. 23:34	и праздникъ жатвы первородныхъ житъ сотвориши от­ дѣлъ тво­ихъ, яже посѣеши на нивѣ тво­ей: и праздникъ скончанiя при­­ исходѣ лѣта въ собранiи дѣлъ тво­ихъ, яже от­ нивъ тво­ихъ.
23:17 См.: 🔗Исх. 34:23 🔗Втор. 16:16	Три краты въ лѣтѣ да явит­ся всякъ мужескъ полъ твой предъ Господемъ Богомъ тво­имъ.
23:18	Егда бо изжену языки от­ лица тво­его и разширю предѣлы твоя, да не пожреши на квасѣ крове жертвы Мо­ея, ниже да долежитъ тукъ праздника Мо­его до утрiя.
23:19 См.: 🔗Исх. 34:26 🔗Втор. 14:21	Начатки первыхъ житъ земли тво­ея да внесеши въ домъ Господа Бога тво­его. Да не свариши ягняте во млецѣ матере его.
23:20 См.: 🔗Исх. 13:21 🔗Исх. 14:19	И се, Азъ послю Ангела Мо­его предъ лицемъ тво­имъ, да сохранитъ тя на пути, яко да введетъ тя въ землю, юже уготовахъ тебѣ:
23:21 См.: 🔗Ис. 63:10 🔗Иер. 23:6 🔗Ин. 10:30	вонми себѣ и послушай Его, и не ослушайся Его: не обинет­ся бо тебе, имя бо Мое есть на Немъ:
23:22 См.: 🔗Втор. 18:15 🔗Быт. 12:3	аще слухомъ послушаеши гласа Мо­его и сотвориши вся, елика Азъ заповѣдаю тебѣ, и сохраниши завѣтъ Мой, будете Ми люди избран­ни от­ всѣхъ языкъ: Моя бо есть вся земля, вы же будете Ми царское священiе и языкъ святъ. Сiя словеса да речеши сыномъ Израилевымъ. Аще слухомъ послушаеши гласа Мо­его и сотвориши вся, елика реку тебѣ, врагъ буду врагомъ тво­имъ и сопротивлюся сопротивникомъ тво­имъ.
23:23 См.: 🔗Исх. 33:2 🔗Втор. 7:1 🔗Нав. 24:11	Пойдетъ бо Ангелъ Мой наставляяй тя и введетъ тя ко Аморрею и Хеттею, и Ферезею и Хананею, и Гергесею и Евею и Иевусею, и потреблю ихъ [от­ лица ва­шего]:
23:24 См.: 🔗Исх. 20:5 🔗Быт. 35:2	да не поклонишися богомъ ихъ, ниже послужиши имъ: да не сотвориши по дѣломъ ихъ, но разоренiемъ разориши и сокрушенiемъ сокрушиши капища ихъ,
23:25 См.: 🔗Мф. 6:33 🔗Исх. 15:26	и да послужиши Господу Богу тво­ему: и благословлю хлѣбъ твой и вино твое и воду твою, и от­вращу болѣзнь от­ васъ.
23:26 См.: 🔗Втор. 7:14	Не будетъ безчаденъ, ниже неплоды на земли тво­ей: число дній тво­ихъ исполняя исполню.
23:27 См.: 🔗Быт. 35:5	И страхъ послю ведущiй тя, и устрашу вся языки, въ няже ты входиши къ нимъ, и дамъ вся сопротивники твоя въ бѣгуны:
23:28 См.: 🔗Втор. 7:20 🔗Нав. 24:12	и послю шершни предъ тобою, и изжену Аморреи и Евеи, и Иевусеи и Хананеи и Хеттеи от­ тебе:
23:29	не изжену ихъ въ лѣтѣ единѣмъ, да не будетъ земля пуста, и мнози будутъ на тя звѣри земніи:
23:30	помалу помалу изжену ихъ от­ тебе, дондеже воз­растеши и наслѣдиши землю.
23:31 См.: 🔗Быт. 15:18 🔗Быт. 28:14 🔗Чис. 34:2	И положу предѣлы твоя от­ Чермнаго моря до моря Филистимля, и от­ пустыни до рѣки великiя Евфрата, и предамъ въ руцѣ ваши сѣдящихъ на земли и изжену ихъ от­ тебе:
23:32 См.: 🔗Исх. 34:15 🔗Втор. 7:2	да не смѣсишися съ ними, и съ боги ихъ да не завѣщаеши завѣта,
23:33 См.: 🔗Исх. 34:12	и да не останут­ся на земли тво­ей, да не сотворятъ тя согрѣшити ко Мнѣ: аще бо поработаеши богомъ ихъ, сіи будутъ тебѣ въ соблазнъ.