Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 | И рече Господь къ Моисею: се, узриши, что сотворю фараону: рукою бо крѣпкою отпуститъ ихъ и мышцею высокою изженетъ ихъ от земли своея. |
6:2 См.: 🔗Исх. 15:3 | Глагола же Богъ къ Моисею и рече ему: Азъ Господь, |
6:3 | и явихся Аврааму, и Исааку, и Иакову, Богъ Сый ихъ, и имене Моего Господь не явихъ имъ: |
6:4 | и поставихъ завѣтъ Мой съ ними, яко дати имъ землю Ханаанску, землю пришелствiя ихъ, на нейже и обитаху: |
6:5 См.: 🔗Исх. 2:24 🔗Лев. 26:42 | Азъ же услышахъ стенанiе сыновъ Израилевыхъ, имже Египтяне поработиша ихъ, и помянухъ завѣтъ Мой: |
6:6 | иди, рцы сыномъ Израилевымъ глаголя: Азъ Господь, и изведу васъ от насилiя Египетска, и избавлю васъ от работы [ихъ], и отиму васъ мышцею высокою и судомъ великимъ, |
6:7 См.: 🔗Быт. 17:7 | и прiиму вы Себѣ въ люди, и буду вамъ Богъ: и уразумѣете, яко Азъ Господь Богъ вашъ, изведый васъ от земли Египетскiя и от насилiя Египетска: |
6:8 См.: 🔗Иез. 47:14 | и введу васъ въ землю, на нюже прострохъ руку Мою, дати ю Аврааму и Исааку и Иакову: и дамъ ю вамъ въ наслѣдiе, Азъ Господь. |
6:9 | Глагола же Моисей тако сыномъ Израилевымъ, и не послушаша Моисеа от малодушiя и от дѣлъ жестокихъ. |
6:10 | Рече же Господь къ Моисею, глаголя: |
6:11 | вниди, глаголи фараону царю Египетскому, да отпуститъ сыны Израилевы изъ земли своея. |
6:12 См.: 🔗Исх. 4:10 🔗Ис. 6:5 | Рече же Моисей предъ Господемъ глаголя: се, сынове Израилевы не послушаша мене, и како послушаетъ мене фараонъ? Азъ же несловесенъ есмь. |
6:13 | Рече же Господь къ Моисею и Аарону и завѣща имъ внити къ фараону царю Египетскому, да отпуститъ сыны Израилевы от земли Египетскiя. |
6:14 | И сіи старѣйшины домовъ отечествъ ихъ: сынове Рувима, первенца Израилева, Енохъ и Фаллосъ, Асронъ и Харми: сiе племя Рувимово. |
6:15 См.: 🔗1Пар. 4:24 | Сынове же Симеоновы: Иемуилъ и Иаминъ, и Аодъ и Ахинъ, и Сааръ и Саулъ, иже от Финиссины: сiя рожденiя сыновъ Симеоновыхъ. |
6:16 | И сiя имена сыновъ Левіиныхъ по сродствомъ ихъ: Гирсонъ, Кааѳъ и Мерари: лѣтъ же житiя Левіина сто тридесять седмь. |
6:17 | Сіи же сынове Гирсони: Ловени и Семей: домове рожденiя ихъ. |
6:18 См.: 🔗Чис. 3:19 | Сынове же Кааѳовы: Амврамъ и Иссааръ, Хевронъ и Озiилъ: лѣтъ же житiя Кааѳова сто тридесять три. |
6:19 См.: 🔗Чис. 26:57 | Сынове же Мерарины: Мооли и Омуси: сіи домове рожденiя Левіина по сродствомъ ихъ. |
6:20 | И поя Амврамъ Иохаведу, дщерь брата отца своего, себѣ въ жену, и роди ему Аарона и Моисеа и Марiамь сестру ихъ: лѣтъ же житiя Амврамова сто тридесять седмь. |
6:21 См.: 🔗Чис. 16:1 | Сынове же Иссааровы: Коре и Нафекъ и Зехри. |
6:22 См.: 🔗Лев. 10:4 | Сынове же Озiиловы: Мисаилъ и Елисафанъ и Сегри. |
6:23 См.: 🔗Чис. 3:2 | Поя же Ааронъ Елисавету, дщерь Аминадавову, сестру Наассонову, себѣ въ жену, и роди ему Надава и Авiуда, и Елеазара и Иѳамара. |
6:24 См.: 🔗1Пар. 6:22 | Сынове же Кореовы: Асиръ и Елкана и Авiасаръ: сiя рожденiя Кореова. |
6:25 См.: 🔗Чис. 25:7 🔗1Пар. 6:4 | И Елеазаръ, сынъ Аароновъ, поя от дщерей Футiиловыхъ себѣ въ жену, и роди ему Финееса: сiя старѣйшинства отечества левитска по сродствомъ ихъ. |
6:26 См.: 🔗Деян. 7:37 | Сей Ааронъ и Моисей, имже рече Богъ извести сыны Израилевы изъ земли Египетскiя съ силою ихъ. |
6:27 | Сіи суть, иже глаголаста къ фараону царю Египетскому, еже извести сыны Израилевы от земли Египетскiя: сей Ааронъ и Моисей, |
6:28 | въ оньже день глагола Господь къ Моисею въ земли Египетстѣй. |
6:29 | И рече Господь къ Моисею глаголя: Азъ Господь: глаголи къ фараону царю Египетскому, елика Азъ глаголю къ тебѣ. |
6:30 См.: 🔗Исх. 4:10 🔗Исх. 6:12 | И рече Моисей предъ Господемъ: се, азъ худогласенъ есмь, и како послушаетъ мене фараонъ? |