Книга пророка Иезекииля, глава 20

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 20
20:1 См.: 🔗Иез. 14:1	И бысть въ лѣто седмое, въ пятый месяцъ, въ десятый день месяца, прiидоша мужiе от­ старѣйшинъ дому Израилева вопросити Господа и сѣдоша предъ лицемъ мо­имъ.
20:2	И бысть слово Господне ко мнѣ глаголя:
20:3 См.: 🔗Иез. 14:3	сыне человѣчь, глаголи ко старѣйшинамъ дому Израилева и речеши къ нимъ: тако глаголетъ Адонаи Господь: еда вопросити мене вы при­­ходите? живу азъ, аще от­вѣщаю вамъ, глаголетъ Адонаи Господь.
20:4 См.: 🔗Иез. 22:2	Аще от­мщенiемъ от­мщу имъ: сыне человѣчь, беззаконiя отецъ ихъ засвидѣтел­ст­вуй имъ,
20:5 См.: 🔗Исх. 3:6	и речеши къ нимъ: сiя глаголетъ Адонаи Господь: от­ негоже дне избрахъ домъ Израилевъ, и увѣдѣнъ быхъ племени дому Иаковля и познанъ быхъ имъ во земли Египетстѣй, и прiяхъ я рукою мо­ею глаголя: азъ Господь Богъ вашъ:
20:6 См.: 🔗Исх. 3:17	въ той день подъяхъ я рукою мо­ею, еже извести я изъ земли Египетскiя въ землю, юже уготовахъ имъ, землю кипящую млекомъ и медомъ, сотъ есть паче всѣхъ земель,
20:7 См.: 🔗Исх. 23:24 🔗Исх. 34:13	и рекохъ къ нимъ: кійждо мерзости от­ очесъ сво­ихъ от­вержите и во творенiихъ Египетскихъ не оскверняйтеся, азъ Господь Богъ вашъ.
20:8	И от­вергошася мене и не хотѣша послушати мя: кійждо мерзостей от­ очесъ сво­ихъ не от­вергоша и творенiй Египетскихъ не оставиша. И рекохъ, еже излiяти ярость мою на ня и скончати гнѣвъ мой на нихъ средѣ земли Египетскiя.
20:9 См.: 🔗Чис. 14:16 🔗Ис. 52:5	И сотворихъ, яко да имя мое весьма не осквернит­ся предъ языки, въ нихже суть тіи средѣ ихъ, въ нихже познанъ быхъ имъ предъ лицемъ ихъ, еже извести я изъ земли Египетскiя.
20:10 См.: 🔗Исх. 16:1	И изведохъ я изъ земли Египетскiя и введохъ я въ пустыню,
20:11 См.: 🔗Лев. 18:5 🔗Неем. 9:29 🔗Рим. 10:5 🔗Гал. 3:12	и дахъ имъ заповѣди моя, и оправданiя моя явихъ имъ, яже аще сотворитъ человѣкъ, живъ будетъ въ нихъ:
20:12 См.: 🔗Исх. 20:8 🔗Исх. 31:13 🔗Втор. 5:12	и субботы моя дахъ имъ, еже быти въ знаменiе между мною и между ими, еже разумѣти имъ, яко азъ Господь освящаяй ихъ.
20:13 См.: 🔗Исх. 16:28	И глаголахъ ко дому Израилеву въ пустыни: въ заповѣдехъ мо­ихъ ходите и оправданiя моя сохраните, еже творити я, яже сотворитъ человѣкъ и живъ будетъ въ нихъ. И разгнѣва мя домъ Израилевъ въ пустыни: въ заповѣдехъ бо мо­ихъ не ходиша и оправданiя моя от­вергоша, яже сотворитъ человѣкъ и живъ будетъ въ нихъ: и субботы моя оскверниша зѣло. И рекохъ, еже излiяти ярость мою на ня въ пустыни, еже потребити ихъ.
20:14 См.: 🔗Чис. 14:16 🔗Втор. 9:28	И сотворихъ, яко да весьма имя мое не осквернит­ся предъ языки, изъ нихже изведохъ я предъ очима ихъ.
20:15 См.: 🔗Чис. 14:30 🔗Пс. 94:11 🔗Евр. 3:11	И азъ воз­двигохъ руку мою на ня въ пустыни весьма, еже не ввести ихъ въ землю, юже дахъ имъ, въ землю текущую млекомъ и медомъ, сотъ есть паче всея земли:
20:16 См.: 🔗Ос. 9:17	понеже судьбы моя от­вергоша и въ заповѣдехъ мо­ихъ не ходиша, и субботы моя оскверниша и вслѣдъ помышленiй сердца сво­его хождаху.
20:17 См.: 🔗Иез. 5:11	И пощадѣ я око мое, еже потребити ихъ, и не сотворихъ имъ скончанiя въ пустыни.
20:18 См.: 🔗Втор. 4:25	И рекохъ ко чадомъ ихъ въ пустыни: въ законѣхъ отецъ вашихъ не ходите и оправданiй ихъ не храните, и ко творениемъ Египетскимъ не при­­мѣшайтеся и не оскверняйтеся:
20:19	азъ Господь Богъ вашъ: въ заповѣдехъ мо­ихъ ходите, и оправданiя моя снабдите и творите я,
20:20	и субботы моя освящайте: и будетъ въ знаменiе между мною и между вами, еже вѣдѣти вамъ, яко азъ Господь Богъ вашъ.
20:21 См.: 🔗Дан. 9:11	И разгнѣваша мя, и чада ихъ въ заповѣдехъ мо­ихъ не ходиша и оправданiй мо­ихъ не снабдѣша, еже творити я: сiя бо сотворивъ человѣкъ живъ будетъ въ нихъ: и субботы моя оскверниша зѣло. И рекохъ: излiю ярость мою на ня, еже скончати гнѣвъ мой на нихъ въ пустыни.
20:22 См.: 🔗Чис. 14:13	И сотворихъ, яко да имя мое весьма не осквернавит­ся предъ языки, от­ нихже изведохъ я предъ очима ихъ.
20:23	И азъ воз­двигохъ руку мою на ня въ пустыни, еже расточити я во языцѣхъ и разсѣяти я во странахъ,
20:24	понеже оправданiй мо­ихъ не сотвориша и заповѣди моя от­ринуша и субботы моя оскверниша, и вслѣдъ кумiровъ отецъ ихъ быша очеса ихъ.
20:25 См.: 🔗Пс. 80:13 🔗2Фес. 2:9	И дахъ имъ заповѣди не добры и оправданiя, въ нихже не будутъ живи:
20:26 См.: 🔗Иез. 20:31	и оскверню я въ даянiихъ ихъ, внегда проводити [имъ] всякое разверзающее ложесна, да погублю ихъ, да уразумѣютъ, яко азъ Господь.
20:27	Сего ради глаголи къ дому Израилеву, сыне человѣчь, и речеши къ нимъ: сiя глаголетъ Адонаи Господь: даже до сего разгнѣваша мя отцы ваши во грѣсѣхъ сво­ихъ, имиже согрѣшиша ко мнѣ:
20:28 См.: 🔗Быт. 17:8 🔗Быт. 22:16	и введохъ я въ землю, въ нюже воз­двигохъ руку мою, еже дати ю имъ: и видѣша всякъ холмъ высокъ и всяко древо при­­сѣн­ное, и пожроша тамо богомъ сво­имъ и учиниша тамо ярость даровъ сво­ихъ, и положиша тамо воню благовонiя сво­его и воз­лiяша тамо воз­лiянiя своя.
20:29 См.: 🔗Втор. 12:2	И рекохъ къ нимъ: что суть аввама {высоко­е}, яко вы входите тамо? и прозваша имя ему аввама даже до днешняго дне.
20:30	Сего ради рцы къ дому Израилеву: сiя глаголетъ Адонаи Господь: аще во беззаконiихъ отецъ вашихъ вы оскверняетеся и вслѣдъ мерзостей ихъ вы соблуждаете,
20:31 См.: 🔗Иез. 16:21	и въ при­­ношенiи даровъ вашихъ и въ нароцѣхъ вашихъ, егда проходятъ чада ваша сквоз­ѣ огнь: вы оскверняетеся во всѣхъ кумiрѣхъ вашихъ даже до днешняго дне, и азъ от­вѣщаю ли вамъ, доме Израилевъ? Живу азъ, глаголетъ Адонаи Господь, аще от­вѣщаю вамъ и аще взыдетъ на духъ вашъ сiе.
20:32 См.: 🔗Иер. 44:17 🔗Ос. 4:13	И не будетъ, якоже вы глаголете: будемъ, якоже языцы и якоже племена земная, служити древу и каменiю.
20:33	Сего ради живу азъ, глаголетъ Адонаи Господь, аще не рукою крѣпкою и мышцею высокою и въ ярости излiян­нѣй цар­ст­вовати буду надъ вами:
20:34	и изведу вы от­ людій и прiиму вы от­ странъ, въ нихже бѣсте разсѣяни, рукою крѣпкою и мышцею высокою и яростiю излiян­ною,
20:35 См.: 🔗Ис. 1:18	и при­­веду васъ въ пустыню людскую и разсуждуся съ вами тамо лицемъ къ лицу:
20:36 См.: 🔗Чис. 14:22	якоже судихся со отцы вашими въ пустыни земли Египетскiя, тако сужду и вамъ, глаголетъ Адонаи Господь:
20:37 См.: 🔗1Кор. 4:21	и проведу вы подъ жезломъ мо­имъ и введу вы въ числѣ завѣта,
20:38 См.: 🔗Мф. 25:31	и изберу от­ васъ нечестивыя и от­вергшыяся: изъ земли бо обитанiя ихъ изведу я, и въ землю Израилеву не внидутъ, и познаете, яко азъ Господь Богъ.
20:39 См.: 🔗Ис. 29:23	Вы же, доме Израилевъ, сице глаголетъ Адонаи Господь: кійждо кумiры своя от­имите, и потомъ аще послушаете мене, и имене мо­его святаго не осквернавите ксему въ дарѣхъ вашихъ и рукотворенiихъ вашихъ:
20:40 См.: 🔗Ис. 27:13 🔗Зах. 8:22 🔗Зах. 14:16	понеже на горѣ мо­ей святѣй, на горѣ высоцѣ Израилевѣ, глаголетъ Адонаи Господь, тамо послужатъ ми весь домъ Израилевъ до конца на земли, и тамо прiиму я и тамо при­­сѣщу на при­­ношенiя ваша и начатки обѣтовъ вашихъ во всѣхъ освящен­ныхъ вашихъ.
20:41 См.: 🔗Рим. 12:1 🔗Рим. 15:16 🔗Флп. 4:18	Въ воню благовонiя прiиму вы, егда изведу вы изъ людій и прiиму вы от­ странъ, въ няже расточени бысте, и освящуся въ васъ предъ очима людскима:
20:42	и увѣсте, яко азъ Господь, егда введу вы въ землю Израилеву, въ землю, на нюже воз­двигохъ руку мою дати ю отцемъ вашымъ:
20:43 См.: 🔗Иез. 6:9 🔗Иез. 16:61	и помянете тамо пути вашя и вся мерзкiя грѣхи вашя, въ нихже осквернистеся, и посрамите лица ваша во всѣхъ злобахъ вашихъ, яже сотвористе:
20:44	и познаете, яко азъ Господь, егда сотворю вамъ тако, яко да имя мое не осквернит­ся по путемъ вашымъ злымъ и по рукотворениемъ вашымъ растлѣн­нымъ, доме Израилевъ, глаголетъ Адонаи Господь.
20:45	И бысть слово Господне ко мнѣ глаголя:
20:46 См.: 🔗Ам. 7:15	сыне человѣчь, утверди лице твое на югъ и воз­зри на дарома, и прорцы на дубраву старѣйшину нагева
20:47 См.: 🔗Иер. 11:16 🔗Иер. 17:27 🔗Иез. 28:18	и речеши дубравѣ нагевовѣ: слыши слово Господне, сiя глаголетъ Адонаи Господь: се, азъ воз­гнѣщу въ тебѣ огнь, и пожжетъ въ тебѣ всяко древо зеленое и всяко древо сухое, не угаснетъ пламень разжженый, и изгоритъ въ немъ всяко лице от­ полудне до сѣвера,
20:48 См.: 🔗Иер. 7:20	и увѣсть всяка плоть, яко азъ Господь разжегохъ его, и не угаснетъ.
20:49 См.: 🔗Иез. 17:2	И рекохъ: никакоже, Господи, Господи! сіи глаголютъ ко мнѣ: не притча ли есть сiя глаголема?