Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 43 | |
43:1 См.: 🔗Иез. 40:6 | И веде мя ко вратомъ зрящымъ на востоки и изведе мя: |
43:2 См.: 🔗Иез. 1:24 | и се, слава Бога Израилева грядяше по пути вратъ зрящихъ на востоки, и гласъ полка аки гласъ усугубляющихъ многихъ, и земля свѣтяшеся аки свѣтъ от славы его окрестъ. |
43:3 См.: 🔗Иез. 1:3 | И видѣнiе, еже видѣхъ, по видѣнiю, еже видѣхъ, егда вхождахъ помазати градъ: и видѣнiе колесницы, юже видѣхъ, подобяшеся видѣнiю, еже видѣхъ на рѣцѣ Ховаръ. И падохъ на лице мое. |
43:4 | Слава же Господня вниде во храмъ по пути вратъ зрящихъ на востокъ. |
43:5 | И взя мя духъ и введе мя во дворъ внутреннiй: и се, полнъ славы домъ Господень. |
43:6 | И стахъ, и се, гласъ от храма глаголющаго ко мнѣ, и мужъ стояше близъ мене |
43:7 | и рече ко мнѣ: сыне человѣчь, видѣлъ ли еси мѣсто престола моего и мѣсто стопы ногъ моихъ, идѣже вселится имя мое средѣ дому Израилева во вѣкъ? и не осквернятъ ктому имене моего святаго домъ Израилевъ, тіи и старѣйшины ихъ во блуженiи своемъ и во убійствахъ старѣйшинъ своихъ средѣ себе, |
43:8 | внегда полагаху преддверiе мое во преддверiихъ своихъ и праги моя близъ праговъ своихъ: и даша стѣну мою яко держащуюся мене и онѣхъ, и оскверниша имя мое святое въ беззаконiихъ своихъ, яже творяху: и скончахъ я въ ярости моей и во избiенiи: |
43:9 | и нынѣ да отринутъ блуженiе свое и убийства старѣйшинъ своихъ от мене, и вселюся средѣ ихъ во вѣкъ. |
43:10 См.: 🔗Иез. 16:63 🔗Иез. 40:4 | Ты же, сыне человѣчь, покажи дому Израилеву храмъ, и да престанутъ от грѣховъ своихъ: и видѣнiе его, и чиноположенiе его, |
43:11 | и тіи прiимутъ казнь свою о всѣхъ, яже сотвориша: и распишеши храмъ и уготованiе его, и исходы его и входы его, и бытiе его и вся повелѣнiя его и вся законы его возвѣстиши имъ и да впишеши предъ ними, и снабдятъ вся оправданiя моя и вся повелѣнiя моя и сотворятъ я. |
43:12 См.: 🔗Иез. 41:4 | И расписанiе храма на верху горы: вси предѣлы его окрестъ святая святыхъ суть. |
43:13 См.: 🔗Иез. 40:5 | Сей законъ храма, и сiя мѣра требника, въ лакоть лактя и длани, нѣдро глубины лакоть на лакоть и лакоть въ широту, и огражденiе устiя ему окрестъ, пяди. |
43:14 | И сiя высота требника, и от глубины начала вдоленiя его ко очистилищу великому, еже внизу, двухъ лактей, широта же лакоть: а от очистилища малаго ко очистилищу великому лакти четыри, и широта лакоть. |
43:15 | И Арiилъ четырехъ лактей, а от Арiила и выше роговъ лакоть: |
43:16 | Арiилъ же дванадесять лактей въ долготу и дванадесять лактей въ широту, четвероуголенъ на четыри части своя. |
43:17 См.: 🔗Иез. 43:13 | И очистилище четыренадесять лактей въ долготу и четыренадесять лактей въ широту, четвероуголно на четыри части своя: и огражденiе ему окрестъ окружающее его полъ лактя, и обдержанiе его лакоть окрестъ, и степени его зрящыя на востокъ. |
43:18 См.: 🔗Исх. 40:16 🔗Лев. 8:11 | И рече ко мнѣ: сыне человѣчь, сiя глаголетъ Господь Богъ Израилевъ: сiя заповѣди требника въ день сотворенiя его, еже возносити на немъ всесожженiя и возливати нань кровь. |
43:19 См.: 🔗Иез. 40:46 | И даси жерцемъ и левитомъ, иже суть от сѣмене садукова, приступающымъ ко мнѣ, глаголетъ Господь Богъ, еже служити мнѣ, телца от говядъ за грѣхъ: |
43:20 | и да возмутъ от крове его и да возложатъ на четыри роги требника и на четыри части очистилища и на основанiе окрестъ, и окропиши е, и очистятъ е: |
43:21 См.: 🔗Лев. 16:3 | и да возмутъ телца, иже за грѣхъ, и да сожжется во отлученнѣмъ храмѣ внѣ святыхъ. |
43:22 | А во вторый день да возмутъ два козлища от козъ непорочныхъ за грѣхъ и да очистятъ требникъ, якоже очистиша телцемъ. |
43:23 | И егда скончаютъ очищенiе, да принесутъ телца от говядъ непорочна и овна от овецъ непорочна, |
43:24 | и да принесете предъ Господа: и да возвергутъ на ня жерцы соль и да вознесутъ я Господеви всесожженiя. |
43:25 | Седмь дній да сотвориши козлище за грѣхъ по вся дни, и телца от говядъ и овна от овецъ непорочна, да сотворятъ седмь дній: |
43:26 См.: 🔗Исх. 28:41 | и да очистятъ требникъ и освятятъ его, и наполнятъ руки своя. |
43:27 | И скончаютъ седмь дній, и будетъ от осмаго дне и потомъ, сотворятъ жерцы на жертвенницѣ всесожженiя ваша и яже спасенiя вашего: и прiиму вы, глаголетъ Господь. |