Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 См.: 🔗Ис. 45:12 | И совершишася небо и земля, и все украшенiе ихъ. |
2:2 | И соверши Богъ въ день шестый дѣла Своя, яже сотвори: и почи въ день седмый от всѣхъ дѣлъ Своихъ, яже сотвори. |
2:3 | И благослови Богъ день седмый, и освяти его: яко въ той почи от всѣхъ дѣлъ Своихъ, яже начатъ Богъ творити. |
2:4 | Сiя книга бытiя небесе и земли, егда бысть, въ оньже день сотвори Господь Богъ небо и землю, |
2:5 | и всякiй злакъ селный, прежде даже быти на земли, и всякую траву селную, прежде даже прозябнути: не бо одожди Господь Богъ на землю, и человѣкъ не бяше дѣлати ю: |
2:6 | источникъ же исхождаше изъ земли и напаяше все лице земли. |
2:7 См.: 🔗1Кор. 15:45 | И созда Богъ человѣка, персть [вземъ] от земли, и вдуну въ лицо его дыханiе жизни: и бысть человѣкъ въ душу живу. |
2:8 См.: 🔗Быт. 4:16 | И насади Господь Богъ рай во Едемѣ на востоцѣхъ, и введе тамо человѣка, егоже созда. |
2:9 См.: 🔗Отк. 2:7 🔗Отк. 22:2 | И прозябе Богъ еще от земли всякое древо красное въ видѣнiе и доброе въ снѣдь: и древо жизни посредѣ рая, и древо еже вѣдѣти разумѣтелное добраго и лукаваго. |
2:10 | Рѣка же исходитъ изъ Едема напаяти рай: оттуду разлучается въ четыри начала. |
2:11 См.: 🔗Сир. 24:27 | Имя единѣй Фисонъ: сiя окружающая всю землю Евилатскую: тамо убо есть злато. |
2:12 | Злато же оныя земли доброе: и тамо есть анѳраксъ и камень зеленый. |
2:13 | И имя рѣцѣ вторѣй Геон: сiя окружающая всю землю Еѳiопскую. |
2:14 См.: 🔗Дан. 10:4 | И рѣка третiя Тигръ: сiя проходящая прямо Ассириомъ. Рѣка же четвертая Евфратъ. |
2:15 | И взя Господь Богъ человѣка, егоже созда, и введе его въ рай Сладости, дѣлати его и хранити. |
2:16 | И заповѣда Господь Богъ Адаму, глаголя: от всякаго древа, еже въ раи, снѣдiю снѣси: |
2:17 См.: 🔗Рим. 5:12 🔗Рим. 6:23 | от древа же, еже разумѣти доброе и лукавое, не снѣсте от него: а въ оньже аще день снѣсте от него, смертiю умрете. |
2:18 См.: 🔗Еккл. 4:8 | И рече Господь Богъ: не добро быти человѣку единому: сотворимъ ему помощника по нему. |
2:19 | И созда Богъ еще от земли вся звѣри селныя и вся птицы небесныя, и приведе я ко Адаму видѣти, что наречетъ я: и всяко еже аще нарече Адамъ душу живу, сiе имя ему. |
2:20 | И нарече Адамъ имена всѣмъ скотомъ, и всѣмъ птицамъ небеснымъ, и всѣмъ звѣремъ земнымъ. Адаму же не обрѣтеся помощникъ подобный ему. |
2:21 | И наложи Богъ изступленiе на Адама, и успе: и взя едино от ребръ его, и исполни плотiю вмѣсто его. |
2:22 См.: 🔗1Тим. 2:13 | И созда Господь Богъ ребро, еже взя от Адама, въ жену, и приведе ю ко Адаму. |
2:23 См.: 🔗1Кор. 11:8 | И рече Адамъ: се, нынѣ кость от костей моихъ и плоть от плоти моея: сiя наречется жена, яко от мужа своего взята бысть сiя. |
2:24 | Сего ради оставитъ человѣкъ отца своего и матерь и прилѣпится къ женѣ своей, и будета два въ плоть едину. |
2:25 | И бѣста оба нага, Адамъ же и жена его, и не стыдястася. |