Книга Бытия, глава 40

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 40
40:1	Бысть же по словесѣхъ сихъ, согрѣши старѣйшина винарскъ царя Египетска и старѣйшина житарскъ господину сво­ему царю Египетскому.
40:2	И разгнѣвася фараонъ на оба евнухи своя, на старѣйшину винарска и на старѣйшину житарска,
40:3 См.: 🔗Быт. 39:20	и вверже ихъ въ темницу во узилище, въ мѣсто, идѣже Иосифъ вверженъ бяше.
40:4	И вручи ихъ старѣйшина темницы Иосифу, и предста имъ: и бѣста дни [нѣкiя] въ темницѣ,
40:5 См.: 🔗Дан. 2:1 🔗Мф. 27:19	и видѣста оба сонъ во едину нощь: видѣнiе же сон­ное старѣйшины винарска и старѣйшины житарска, иже бѣста царя Египетска, суще въ темницѣ, бяше сiе.
40:6 См.: 🔗Быт. 41:8	Вниде же къ нимъ Иосифъ заутра и видѣ ихъ, и бяху смущени:
40:7	и вопроша­ше евнуховъ фараонихъ, иже быша съ нимъ въ темницѣ, у господина сво­его, глаголя: что, яко лица ваша уныла днесь?
40:8 См.: 🔗Быт. 41:16 🔗Дан. 2:27	Они же рѣша ему: сонъ видѣхомъ, и разсуждаяй его нѣсть. Рече же имъ Иосифъ: еда не Богомъ изъявленiе ихъ есть? Повѣдите убо мнѣ.
40:9	И повѣда старѣйшина винарскъ сонъ свой Иосифу и рече: во снѣ мо­емъ бяше виноградъ предо мною:
40:10	въ виноградѣ же три лѣторасли, и той цвѣтущь про­изнесе от­расли, зрѣлы грозды лозныя:
40:11	и чаша фараонова въ руцѣ мо­ей: и взяхъ грезнъ, и изжахъ оный въ чашу, и дахъ чашу въ руку фараоню.
40:12 См.: 🔗Быт. 41:25	И рече ему Иосифъ: сiе разсужденiе сему: три лѣторасли три дни суть:
40:13	еще три дни, и помянетъ фараонъ санъ твой, и паки поставитъ тя въ старѣйшин­ство твое винарско, и подаси чашу фараону въ руку его по сану тво­ему первому, якоже былъ еси виночерпчiй:
40:14 См.: 🔗Неем. 5:19 🔗Неем. 13:31 🔗Лк. 23:42	но помяни мя тобою, егда благо ти будетъ, и сотвориши надо мною милость, и да помянеши о мнѣ фараону, и изведеши мя от­ твердыни сея:
40:15 См.: 🔗Быт. 37:28	яко татьбою украденъ быхъ изъ земли Еврейскiя, и здѣ ничто зло сотворихъ, но ввергоша мя въ ровъ сей.
40:16	И видѣ старѣйшина житарскъ, яко прямо разсуди, и рече Иосифу: и азъ видѣхъ сонъ, и мняхся три кошницы хлѣбовъ держати на главѣ мо­ей:
40:17	въ кошницѣ же верхней от­ всѣхъ родовъ, яже фараонъ ястъ, дѣло хлѣбен­ное, и птицы небесныя ядяху тая от­ кошницы, яже на главѣ мо­ей.
40:18	Отвѣщавъ же Иосифъ, рече ему: сiе разсужденiе его: три кошницы три дніе суть:
40:19 См.: 🔗Быт. 41:13	еще три дніе, и отъ­иметъ фараонъ главу твою от­ тебе и повѣситъ тя на древѣ, и изъядятъ птицы небесныя плоть твою от­ тебе.
40:20 См.: 🔗Мк. 6:21	Бысть же въ день третiй, день рожденiя бяше фараоня, и творяше пиръ всѣмъ отрокомъ сво­имъ: и помяну старѣйшин­ство старѣйшины винарска и старѣйшин­ство старѣйшины житарска, посредѣ отрокъ сво­ихъ:
40:21	и постави старѣйшину винарска въ старѣйшин­ство его: и подаде чашу въ руку фараоню:
40:22 См.: 🔗Быт. 40:19	старѣйшину же житарска повѣси [на древѣ], якоже сказа има Иосифъ.
40:23 См.: 🔗Ам. 6:6	И не помяну старѣйшина винарскъ Иосифа, но забы его.