Книга Бытия, глава 45

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 45
45:1 См.: 🔗Деян. 7:13 🔗Быт. 42:7	И не можа­ше Иосифъ удержатися всѣмъ предстоящымъ ему, но рече: отослите всѣхъ от­ мене. И не предстояше ни единъ Иосифу, егда познава­шеся братiи сво­ей.
45:2	И испусти гласъ съ плачемъ: слышаша же вси Египтяне, и слышано бысть въ дому фараоновѣ.
45:3	Рече же Иосифъ братiи сво­ей: азъ есмь Иосифъ: еще ли отецъ мой живъ есть? И не могоша братiя от­вѣщати ему: смутишася бо.
45:4 См.: 🔗Деян. 7:13	Рече же Иосифъ братiи сво­ей: при­­ближитеся ко мнѣ. И при­­ближишася. И рече: азъ есмь Иосифъ, братъ вашъ, егоже продасте во Египетъ:
45:5 См.: 🔗Быт. 50:20	нынѣ убо не скорбите, ниже жестоко вамъ да явит­ся, яко продасте мя сѣмо: на жизнь бо посла мя Богъ предъ вами:
45:6	сiе бо второе лѣто гладъ на земли, и еще пять лѣтъ оста, въ нихже не будетъ оранiя, ни жатвы:
45:7	посла бо мя Богъ предъ вами оставити вамъ останокъ на земли и препитати вашъ останокъ велiй:
45:8 См.: 🔗Прем. 10:14 🔗Быт. 50:20	нынѣ убо не вы посласте мя сѣмо, но Богъ: и сотвори мя яко отца фараону и господина всему дому его и князя всей земли Египетстѣй:
45:9 См.: 🔗Деян. 7:14	потщав­шеся убо, взыдите ко отцу мо­ему и рцыте ему: сiя глаголетъ сынъ твой Иосифъ: сотвори мя Богъ господина всей земли Египетстѣй: сниди убо ко мнѣ и не умедли:
45:10 См.: 🔗Быт. 46:28	и вселишися въ земли Гесемли Аравійстѣй, и будеши близъ мене ты и сынове тво­и, и сынове сыновъ тво­ихъ, овцы твоя и волове тво­и, и елика суть твоя:
45:11	и препитаю тя тамо, еще бо пять лѣтъ будетъ гладъ на земли, да не погибнеши ты и сынове тво­и, и вся имѣнiя твоя.
45:12	Се, очи ваши видятъ, и очи Венiамина брата мо­его, яко уста моя глаголющая къ вамъ:
45:13	воз­вѣстите убо отцу мо­ему всю славу мою сущую во Египтѣ, и елика видите: и ускорив­ше, при­­ведите отца мо­его сѣмо.
45:14 См.: 🔗Быт. 33:4 🔗Быт. 46:29	И нападъ на выю Венiамина, брата сво­его, плакася надъ нимъ, и Венiаминъ плакася на выи его.
45:15 См.: 🔗Исх. 4:27	И облобызавъ всю братiю свою, плакася надъ ними: и по сихъ глаголаша къ нему братiя его.
45:16	И пронесеся гласъ въ дому фараоновѣ, глаголюще: прiидоша братiя Иосифова. Возрадовася же фараонъ и раби его.
45:17	Рече же фараонъ ко Иосифу: рцы братiи сво­ей: сiе сотворите: наполните сосуды вашя [пшеницы] и идите въ землю Ханааню,
45:18 См.: 🔗Быт. 47:6 🔗Пс. 144:14 🔗Пс. 147:3	и вземше отца ва­шего и имѣнiя ваша, прiидите ко мнѣ: и дамъ вамъ от­ всѣхъ благъ Египетскихъ, и снѣсте тукъ земли:
45:19	ты же заповѣждь сiя: взяти имъ колесницы от­ земли Египетскiя, дѣтемъ ихъ и женамъ ихъ: и по­имше отца сво­его, прiидите:
45:20	и не пощадите очима сосудовъ вашихъ: вся бо благая Египетская вамъ будутъ.
45:21 См.: 🔗Деян. 7:14	Сотвориша же тако сынове Израилевы: даде же имъ Иосифъ колесницы по повелѣнiю фараона царя [Египетска], и даде имъ брашно на путь:
45:22	и всѣмъ даде сугубы ризы, Венiамину же даде триста златницъ и пятеры ризы премѣн­ныя:
45:23	и отцу сво­ему посла такожде, и десять ословъ везущихъ от­ всѣхъ благъ Египетскихъ, и десять мсковъ везущихъ хлѣбы на путь отцу его.
45:24	И от­пусти братiю свою. И от­идоша. И рече имъ: не гнѣвайтеся на пути.
45:25	Изыдоша же изъ Египта и прiидоша въ землю Ханааню ко Иакову отцу сво­ему
45:26	и повѣдаша ему глаголюще: яко сынъ твой Иосифъ живъ есть, и онъ владѣетъ надъ всею землею Египетскою. И ужасеся въ мысли Иаковъ: не вѣроваше бо имъ.
45:27	Глаголаша же ему вся речен­ная от­ Иосифа, елика рече имъ. Узрѣвъ же колесницы, яже посла Иосифъ, еже взяти его, оживе духъ Иакова, отца ихъ,
45:28 См.: 🔗Быт. 46:30	и рече Израиль: велико ми есть [сiе], аще еще Иосифъ сынъ мой живъ есть: шедъ узрю его, прежде неже умрети ми.