Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 | И бысть егда начаша человѣцы мнози бывати на земли, и дщери родишася имъ: |
6:2 | видѣвше же сынове Божiи дщери человѣчи, яко добры суть, пояша себѣ жены от всѣхъ, яже избраша. |
6:3 | И рече Господь Богъ: не имать Духъ Мой пребывати въ человѣцѣхъ сихъ во вѣкъ, зане суть плоть: будутъ же дніе ихъ лѣтъ сто двадесять. |
6:4 | Исполини же бяху на земли во дни оны: и потомъ, егда вхождаху сынове Божiи къ дщеремъ человѣческимъ, и раждаху себѣ: тіи бяху исполини, иже от вѣка, человѣцы именитiи. |
6:5 | Видѣвъ же Господь Богъ, яко умножишася злобы человѣковъ на земли: и всякъ помышляетъ въ сердцы своемъ прилѣжно на злая во вся дни: |
6:6 См.: 🔗Чис. 23:19 🔗1Цар. 15:11 | и помысли Богъ, яко сотвори человѣка на земли, и размысли. |
6:7 | И рече Богъ: потреблю человѣка, егоже сотворихъ, от лица земли, от человѣка даже до скота, и от гадъ даже до птицъ небесныхъ: зане размыслихъ, яко сотворихъ я. |
6:8 | Ное же обрѣте благодать предъ Господемъ Богомъ. |
6:9 См.: 🔗Сир. 44:16 | Сiя же бытiя Ноева: Ное человѣкъ праведенъ, совершенъ сый въ родѣ своемъ, Богу угоди Ное. |
6:10 | Роди же Ное три сыны, Сима, Хама, Иафеѳа. |
6:11 | Растлѣся же земля предъ Богомъ, и наполнися земля неправды. |
6:12 | И видѣ Господь Богъ землю, и бѣ растлѣнна: яко растли всяка плоть путь свой на земли. |
6:13 См.: 🔗2Пет. 2:5 | И рече Господь Богъ Ною: время всякаго человѣка прiиде предъ Мя, яко исполнися земля неправды от нихъ: и се, Азъ погублю ихъ и землю. |
6:14 См.: 🔗Евр. 11:7 | Сотвори убо себѣ ковчегъ от древъ [негнiющихъ] четвероуголныхъ: гнѣзда сотвориши въ ковчезѣ, и посмолиши его внутрьуду и внѣуду смолою. |
6:15 | И тако сотвориши ковчегъ: трехъ сотъ лактей долгота ковчега, и пятидесяти лактей широта, и тридесяти лактей высота его. |
6:16 | Собирая сводомъ сотвориши ковчегъ, и въ лакоть свершиши его свыше: дверь же ковчега сотвориши от страны: обиталища двокровна и трекровна сотвориши въ немъ. |
6:17 См.: 🔗Пс. 28:10 | Азъ же, се, наведу потопъ, воду на землю, погубити всяку плоть, въ нейже есть духъ жизни подъ небесемъ: и елика суть на земли, скончаются. |
6:18 | И поставлю завѣтъ Мой съ тобою: внидеши же въ ковчегъ ты и сынове твои, и жена твоя и жены сыновъ твоихъ съ тобою. |
6:19 См.: 🔗Быт. 7:9 | И от всѣхъ скотовъ и от всѣхъ гадъ, и от всѣхъ звѣрей, и от всякiя плоти, два два от всѣхъ введеши въ ковчегъ, да питаеши съ собою: мужескiй полъ и женскiй будутъ. |
6:20 | От всѣхъ птицъ пернатыхъ по роду, и от всѣхъ скотовъ по роду, и от всѣхъ гадовъ ползающихъ по земли по роду ихъ, два два от всѣхъ внидутъ къ тебѣ, питатися съ тобою, мужескiй полъ и женскiй. |
6:21 | Ты же возми себѣ от всѣхъ брашенъ, яже имате ясти, и собереши къ себѣ, и будутъ тебѣ и онымъ брашно. |
6:22 См.: 🔗Быт. 7:5 | И сотвори Ное вся елика заповѣда ему Господь Богъ, тако сотвори. |