Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 См.: 🔗Ис. 21:8 | На стражи моей стану, и взыду на камень, и посмотрю еже видѣти, что возглаголетъ во мнѣ и что отвѣщаю на обличенiе мое. |
2:2 См.: 🔗Ис. 8:1 | И отвѣща Господь ко мнѣ и рече: впиши видѣнiе, и явѣ на дскѣ, яко да постигнетъ читаяй я. |
2:3 См.: 🔗Евр. 10:37 | Зане еще видѣнiе на время, и просiяетъ въ конецъ, а не вотще: аще умедлитъ, потерпи ему, яко идый прiидетъ и не умедлитъ. |
2:4 | Аще усумнится, не благоволитъ душа моя въ немъ: праведникъ же [мой] от вѣры живъ будетъ. |
2:5 См.: 🔗Прит. 30:15 | Презорливый же и обидливый мужъ и величавый ничесоже скончаетъ: иже разшири аки адъ душу свою, и сей яко смерть ненасыщенъ: и соберетъ къ себѣ вся языки и прiиметъ къ себѣ вся люди. |
2:6 См.: 🔗1Тим. 6:9 | Не сiя ли вся на него притчу прiимутъ и гаданiе въ повѣсть его? и рекутъ: горе умножающему себѣ не сущая его, доколѣ? и отягчающему узу свою тяжцѣ. |
2:7 | Яко внезапу востанутъ угрызающiи его, и ободрятся навѣтницы твои, и будеши въ разграбленiе имъ. |
2:8 См.: 🔗Ис. 33:1 | Понеже ты плѣнилъ еси страны многи, плѣнятъ тя вси оставшiи людiе крове ради человѣчи и нечестiя земли и града и всѣхъ живущихъ на ней. |
2:9 См.: 🔗Иер. 22:13 | Горе лихоимствующымъ лихоимство злое дому своему, еже учинити на высотѣ гнѣздо свое, еже исторгнути от руки злыхъ. |
2:10 | Умыслилъ еси стыдѣнiе дому своему, скончалъ еси люди многи, и согрѣши душа твоя. |
2:11 См.: 🔗Лк. 19:40 | Зане камень изъ стѣны возопiетъ, и хрущь от древа возглаголетъ сiя: |
2:12 См.: 🔗Иез. 24:9 🔗Наум. 3:1 | у, лютѣ созидающему градъ кровьми и уготовляющему градъ неправдами. |
2:13 | Не сiя ли суть от Господа Вседержителя? и оскудѣша людiе мнози огнемъ, и языцы мнози изнемогоша: |
2:14 См.: 🔗Ис. 11:9 | яко наполнится вся земля вѣдѣнiя славы Господни, якоже вода многа въ мори покрыетъ я. |
2:15 | Горе напаяющему подруга своего развращенiемъ мутнымъ, и упоявающему, яко да взираетъ къ пещерамъ ихъ. |
2:16 См.: 🔗Иер. 25:27 | Сытость безчестiя от славы испій и ты: сердце, поколеблися и сотряснися: обыде о тебѣ чаша десницы Господни, и собрася безчестiе на главу твою. |
2:17 | Занеже нечестiе Ливаново покрыетъ тя, и страсть звѣрей престрашитъ тя, крове ради человѣчи и нечестiя земли и града и всѣхъ живущихъ на ней. |
2:18 См.: 🔗Иер. 10:8 | Что пользуетъ изваяное, яко изваяша е? создаша слiянiе, мечтанiе ложное, яко упова создавый на созданiе свое, сотворити кумiры нѣмыя. |
2:19 См.: 🔗Ос. 4:12 🔗Пс. 113:12 | У, лютѣ глаголющему ко древу: ободрися, востани: и каменiю: возвысися: и то есть мечтанiе, и сiе есть скованiе злата и сребра, и всякаго духа нѣсть въ немъ. |
2:20 См.: 🔗Пс. 10:4 | Господь же во храмѣ святѣмъ своемъ: да убоится от лица его вся земля. |