Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 22 | |
22:1 | Сiя рече Господь: иди и вниди въ домъ царя Иудина и рцы тамо слово сiе, |
22:2 | и речеши: слыши слово Господне, царю Иудинъ, иже сѣдиши на престолѣ давидовѣ, ты и домъ твой, и раби твои и людiе твои и входящiи дверьми сими: |
22:3 См.: 🔗Иер. 21:12 🔗Исх. 22:21 | сiя глаголетъ Господь: творите судъ и правду, и избавите силою угнетена от руку обидящаго и, и пришелца и сира и вдовицы не оскорбляйте, не угнетайте беззаконно, и крове неповинныя не изливайте на мѣстѣ семъ. |
22:4 См.: 🔗Иер. 17:25 | Аще бо творяще сотворите слово сiе, то внидутъ вратами дому сего царiе сѣдящiи на престолѣ давидовѣ и всѣдающiи на колесницы и на кони, тіи и раби ихъ и людiе ихъ. |
22:5 См.: 🔗Мф. 23:38 | Аще же не послушаете словесъ сихъ, самъ собою закляхся, рече Господь, яко въ пустыню будетъ домъ сей. |
22:6 | Понеже тако глаголетъ Господь на домъ царя Иудина: Галаадъ ты мнѣ, глава Ливанская, аще не поставлю тебе въ пустыню, во грады необитанны, |
22:7 | и наведу на тя убивающа мужа и сѣкиру его, и посѣкутъ избранныя кедры твоя и вергутъ на огнь. |
22:8 См.: 🔗Втор. 29:24 🔗3Цар. 9:8 | И пройдутъ языцы мнози сквозѣ градъ сей, и речетъ кійждо искреннему своему: вскую сотвори Господь тако граду сему великому? |
22:9 | И отвѣщаютъ: сего ради, яко оставиша завѣтъ Господа Бога своего и поклонишася богомъ чуждимъ и послужиша имъ. |
22:10 | Не плачите мертваго, ниже рыдайте о немъ: плачите плачемъ о исходящемъ, яко не возвратится ктому, ниже увидитъ земли рожденiя своего. |
22:11 См.: 🔗4Цар. 23:31 | Понеже сiя рече Господь къ Селлиму сыну Иосіину царю Иудину царствующему вмѣсто Иосіи отца своего, иже изшелъ есть от мѣста сего: не возвратится ктому сѣмо, |
22:12 См.: 🔗4Цар. 23:34 | но на мѣстѣ томъ, аможе преведохъ его, тамо умретъ и земли сея не узритъ ктому. |
22:13 См.: 🔗Лев. 19:13 | Горе созидающему домъ свой съ неправдою и горницы своя не въ судѣ, у негоже ближнiй его дѣлаетъ туне, и мзды его не воздастъ ему: |
22:14 | иже рече: созижду себѣ домъ пространенъ, и горницы широки со отверстыми окнами и своды кедровыми, и расписаны червленцемъ. |
22:15 | Еда царствовати будеши, яко ты поощряешися о Ахазѣ отцѣ твоемъ? не ядятъ, ниже пiютъ: лучше тебѣ было творити судъ и правду благу. |
22:16 См.: 🔗Иер. 9:24 🔗1Ин. 2:4 | Не познаша, не судиша суда смиренныхъ, ниже суда нища: не сiе ли тебѣ есть, еже не знати тебѣ мене, рече Господь? |
22:17 См.: 🔗Иер. 26:23 | Се, не суть очи твои, ниже сердце твое благо, но къ сребролюбiю твоему и крове неповинныя пролiянiю, и ко обидамъ и ко убійству, еже творити я. |
22:18 См.: 🔗Иер. 16:6 🔗3Цар. 13:30 | Сего ради сiя рече Господь ко Иоакиму сыну Иосіину царю Иудину: горе мужу сему, не оплачутъ его: горе, брате! ниже возрыдаютъ о немъ: увы мнѣ, господине! |
22:19 См.: 🔗Иер. 36:30 | Погребенiемъ ослимъ погребется, влачимь изверженъ будетъ внѣ вратъ Иерусалима. |
22:20 См.: 🔗Иер. 14:18 🔗Иер. 30:14 | Взыди на Ливанъ и возопій, и въ Васанъ даждь гласъ твой, и возопій на онъ полъ моря, яко сотрени суть вси любовнiи твои. |
22:21 | Глаголахъ къ тебѣ въ паденiи твоемъ, и реклъ еси: не услышу. Сей путь твой от юности твоея, яко не послушалъ еси гласа моего. |
22:22 См.: 🔗Ос. 12:1 | Всѣхъ пастырей твоихъ упасетъ вѣтръ, и любовнiи твои во плѣненiе пойдутъ, и тогда постыдишися и посрамишися от всѣхъ любящихъ тя: |
22:23 | иже сѣдиши въ Ливанѣ и гнѣздишися въ кедрѣхъ, возстенеши, егда прiидутъ къ тебѣ болѣзни, яко раждающiя. |
22:24 | Живу азъ, рече Господь, аще будетъ Иехоніа сынъ Иоакима царь Иудинъ, перстень на руцѣ деснѣй моей, оттуду исторгну тя |
22:25 | и предамъ тя въ руки ищущихъ души твоея и въ руки, ихже ты боишися лица, и въ руки навуходоносора царя Вавилонска и въ руки халдеомъ, |
22:26 См.: 🔗4Цар. 24:12 | и отвергу тя и матерь твою, яже роди тя, въ землю чужду, въ нейже нѣсте рождени, и тамо умрете: |
22:27 См.: 🔗Иер. 44:14 | а въ землю, въ нюже тіи желаютъ душами своими возвратитися, не возвратятся. |
22:28 См.: 🔗Ос. 8:8 🔗4Цар. 24:15 | Обезчестися Иехоніа, аки сосудъ непотребенъ, яко отриновенъ бысть той и сѣмя его, и изверженъ въ землю, еяже не вѣдяше. |
22:29 | Земле, земле, земле, слыши слово Господне! |
22:30 | Сiя рече Господь: напиши мужа сего отвержена, мужа, иже во днехъ своихъ не предуспѣетъ: ниже бо будетъ от сѣмене его мужъ, иже сядетъ на престолѣ давидовѣ, и власть имѣяй ктому во Иудѣ. |