Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 23 | |
23:1 См.: 🔗Иез. 34:3 | Горе пастыремъ, иже погубляютъ и расточаютъ овцы паствы моея, рече Господь. |
23:2 | Сего ради сiя рече Господь Богъ Израилевъ къ пасущымъ людій моихъ: вы расточили есте овцы моя, и отвергосте я, и не посѣтисте ихъ, се, азъ посѣщу на васъ по лукавству умышленiй вашихъ, рече Господь: |
23:3 | и азъ соберу останки стада моего от всѣхъ земель, въ няже извергохъ ихъ тамо, и возвращу ихъ къ селениемъ ихъ, и возрастутъ и умножатся. |
23:4 | И возставлю надъ ними пастыри, и упасутъ ихъ, и не убоятся ктому, ниже ужаснутся, и ни единъ погибнетъ от числа, рече Господь. |
23:5 | Се, дніе грядутъ, глаголетъ Господь, и возставлю давиду востокъ праведный, и царствовати будетъ Царь и премудръ будетъ и сотворитъ судъ и правду на земли: |
23:6 См.: 🔗Втор. 33:28 🔗Иер. 33:16 | во днехъ его спасется Иуда, и Израиль пребудетъ въ надежди, и сiе имя ему, имже нарекутъ его: Господь праведенъ нашъ. |
23:7 См.: 🔗Иер. 16:14 | Сего ради, се, дніе грядутъ, рече Господь, и не рекутъ ктому: живетъ Господь, иже изведе сыны Израилевы от земли Египетскiя: |
23:8 | но: живетъ Господь, иже изведе и преведе сѣмя дому Израилева от земли сѣверски и от всѣхъ земель, въ няже изверже ихъ тамо, и обитати имутъ въ земли своей. |
23:9 | О пророцѣхъ сотрено есть сердце мое во мнѣ, вострепеташа вся кости моя, быхъ яко мужъ пiянъ и яко человѣкъ, егоже одолѣ вино, от лица Господня и от лица благолѣпiя славы его. |
23:10 | Яко прелюбодѣяньми исполнена есть земля, яко от лица ихъ плакася земля, изсхоша пажити пустынныя: и бысть теченiе ихъ лукаво, и крѣпость ихъ такожде. |
23:11 См.: 🔗Иер. 8:10 | Понеже пророкъ и священникъ осквернишася, и въ дому моемъ обрѣтохъ лукавство ихъ, рече Господь: |
23:12 См.: 🔗Иер. 13:16 | того ради путь ихъ будетъ имъ ползокъ во тмѣ, и поткнутся и падутъ въ немъ: наведу бо на нихъ злая въ лѣто посѣщенiя ихъ, рече Господь. |
23:13 | И во пророцѣхъ самарійскихъ видѣхъ беззаконiя: пророчествоваху чрезъ Ваала и прельщаху люди моя Израиля. |
23:14 | И во пророцѣхъ Иерусалимскихъ видѣхъ ужасная, прелюбодѣйствующихъ и ходящихъ во лжи и скрѣпляющихъ руки строптивымъ, да не отвратится кійждо от пути своего лукаваго: быша мнѣ вси аки Cодомъ, и обитающiи въ немъ яко Гоморръ. |
23:15 См.: 🔗Иер. 9:15 | Сего ради тако рече Господь силъ ко пророкомъ: се, азъ напитаю ихъ пелынемъ и напою ихъ желчiю, от пророковъ бо Иерусалимскихъ изыде оскверненiе на всю землю. |
23:16 См.: 🔗Иер. 27:9 | Сiя глаголетъ Господь силъ: не слушайте словесъ пророковъ, иже пророчествуютъ вамъ и прельщаютъ васъ: видѣнiе от сердца своего глаголютъ, а не от устъ Господнихъ. |
23:17 | Глаголютъ отвергающымъ мя: глагола Господь, миръ будетъ вамъ: и всѣмъ, иже ходятъ въ похотехъ своихъ, и всякому, ходящему въ строптивствѣ сердца своего, рекоша: не прiидутъ на васъ злая. |
23:18 См.: 🔗Иов. 15:8 🔗Ис. 40:13 | Кто бо бысть въ совѣтѣ Господни, и видѣ и слыша словеса его? кто внятъ слово его и слыша? |
23:19 См.: 🔗Иер. 30:23 | Се, буря от Господа и ярость исходитъ въ сотрясенiе, устремившися прiидетъ на нечестивыя. |
23:20 См.: 🔗Иер. 30:24 | И ктому не возвратится ярость Господня, дондеже сотворитъ сiе и дондеже совершитъ помышленiе сердца своего. Въ послѣднiя дни уразумѣете совѣтъ его. |
23:21 | Не посылахъ пророки, а они течаху: не глаголахъ къ нимъ, и тіи пророчествоваху. |
23:22 См.: 🔗Ис. 55:11 | И аще бы стали въ совѣтѣ моемъ, слышана сотворили бы словеса моя и отвратили бы людій моихъ от пути ихъ лукаваго и от начинанiй ихъ лукавыхъ. |
23:23 | Богъ приближаяйся азъ есмь, глаголетъ Господь, а не Богъ издалеча {Евр.: еда Богъ близъ сущiй азъ есмь, рече Господь, а не Богъ издалеча?} |
23:24 | Аще утаится кто въ сокровенныхъ, и азъ не узрю ли его? рече Господь. Еда небо и землю не азъ наполняю? рече Господь. |
23:25 См.: 🔗Иер. 5:31 🔗Иер. 14:14 | Слышахъ, яже глаголютъ пророцы, пророчествующе во имя мое лжу и глаголюще: видѣхъ сонъ, [видѣхъ сонъ]. |
23:26 | Доколѣ будетъ въ сердцы пророковъ прорицающихъ лжу и пророчествующихъ льщенiя сердца своего, |
23:27 См.: 🔗Суд. 3:7 | мыслящихъ, да забвенъ будетъ законъ мой въ сонiихъ ихъ, яже вѣщаютъ кійждо искреннему своему, якоже забыша отцы ихъ имя мое ради Ваала? |
23:28 См.: 🔗1Пет. 4:11 | Пророкъ, иже имать сновидѣнiе, да вѣщаетъ сновидѣнiе свое, а иже имать слово мое, да глаголетъ слово мое во истинѣ. Что плевы ко пшеницѣ? тако слово мое, рече Господь. |
23:29 | Еда словеса моя не суть якоже огнь горящь, рече Господь, и яко млатъ сотрыющь камень? |
23:30 См.: 🔗Втор. 18:20 🔗Иер. 14:15 | Сего ради, се, азъ ко пророкомъ, рече Господь, иже крадутъ словеса моя кійждо от искренняго своего. |
23:31 См.: 🔗Иез. 13:6 🔗Иез. 22:28 | Се, азъ на пророки, глаголетъ Господь, износящыя пророчествiя языкомъ и дремлющыя дреманiе свое. |
23:32 См.: 🔗Иез. 14:9 🔗Соф. 3:4 | Се, азъ на пророки, прорицающыя сонiе лживо, рече Господь, и провѣщаша та, и прельстиша люди моя во лжахъ своихъ и во прелестехъ своихъ, азъ же не послахъ ихъ, ни заповѣдахъ имъ, и пользою не упользуютъ людій сихъ, [рече Господь]. |
23:33 См.: 🔗Иез. 12:9 | И аще вопросятъ людiе сіи, или пророкъ, или священникъ, рекуще: кое [есть] бремя Господне? и речеши къ нимъ: вы есте бремя, и повергу васъ, рече Господь. |
23:34 | И пророкъ, и священникъ, и людiе, иже рекутъ: бремя Господне, посѣщу местiю на мужа того и на домъ его. |
23:35 | Сице рцыте кійждо ко искреннему и ко брату своему: что отвѣща Господь? и что глагола Господь? |
23:36 | И бремя Господне не помянется ктому, ибо бремя будетъ комуждо слово его: и превратисте словеса Бога живаго, Господа силъ, Бога нашего. |
23:37 | Сiя рцы ко пророку: что отвѣща тебѣ Господь? и что глагола Господь? |
23:38 | Аще же речете: бремя Господне: сего ради тако рече Господь: понеже рекли есте глаголъ сей бремя Господне, и послахъ къ вамъ, рекій: не глаголите бремя Господне: |
23:39 | сего ради, се, азъ возму и повергу васъ и градъ, егоже дахъ вамъ и отцемъ вашымъ, от лица моего, |
23:40 См.: 🔗Иер. 20:11 | и дамъ васъ въ поношенiе вѣчное и въ срамоту вѣчную, яже никогда забвенiемъ загладится. |