Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 31 | |
31:1 См.: 🔗Иер. 24:7 | Во время оно, рече Господь, буду въ Бога роду Израилеву, и тіи будутъ ми въ люди. |
31:2 | Тако рече Господь: обрѣтохъ теплоту {Евр.: обрѣтоша благодать.} въ пустыни со изгибшими от меча: идите и не потребите Израиля, |
31:3 | Господь издалеча явится ему: любовiю вѣчною возлюбихъ тя, того ради вовлекохъ тя въ щедроты. |
31:4 См.: 🔗Пс. 121:3 🔗Иер. 33:7 | Яко возгражду тя, и возградишися, дѣво Израилева: возмеши тимпаны своя и изыдеши съ соборомъ играющихъ. |
31:5 См.: 🔗Ис. 65:21 | Еще насадите винограды въ горѣ самарійстѣй, насаждающе насадите и похвалите. |
31:6 См.: 🔗Ис. 2:3 | Яко есть день воззванiя отвѣщавающихъ въ горахъ Ефремовыхъ: востаните и взыдите въ Сiонъ ко Господеви Богу нашему: |
31:7 См.: 🔗Ис. 2:2 | яко тако рече Господь Иакову: возвеселитеся веселiемъ и воскликните на главу языковъ: слышано сотворите и похвалите, рцыте: спасе Господь люди своя, останокъ Израилевъ. |
31:8 См.: 🔗Втор. 30:3 | Се, азъ веду ихъ от сѣвера и соберу ихъ от конецъ земли въ праздникъ пасхи: и чадородитъ народъ многъ, и возвратятся сѣмо. |
31:9 См.: 🔗2Кор. 6:18 🔗Исх. 4:22 | Съ плачемъ изыдоша, а со утѣшенiемъ возведу я, проводя чрезъ ровенники водъ по пути праву, и не заблудятъ по нему: яко азъ бѣхъ Израилеви во Отца, и Ефремъ первенецъ ми есть. |
31:10 См.: 🔗Иер. 32:37 🔗Иез. 11:16 | Слышите, языцы, слово Господне, и возвѣстите во островѣхъ дальнихъ и рцыте: развѣявый Израиля соберетъ его и снабдитъ его, яко пастырь стадо свое. |
31:11 См.: 🔗Лк. 11:22 | Яко избави Господь Иакова и изъятъ его от руки сильнѣйшихъ его. |
31:12 См.: 🔗Ис. 58:11 | И прiидутъ и возвеселятся въ горѣ Сiонъ, и прiидутъ ко благотамъ Господнимъ, на землю пшеницы и вина и плодовъ, и скотовъ и овновъ: и будетъ душа ихъ якоже древо плодовито, и не взалчутъ ктому. |
31:13 | Тогда возрадуются дѣвицы въ собранiи юношей, и старцы возрадуются: и обращу плачь ихъ на радость, и утѣшу ихъ, и сотворю ихъ веселы. |
31:14 См.: 🔗Ис. 66:21 | Возвеличу и упою душу жерцевъ сыновъ Левіиныхъ, и людiе мои благотъ моихъ насытятся. |
31:15 См.: 🔗Мф. 2:18 | Тако рече Господь: гласъ въ рамѣ слышанъ бысть плача и рыданiя и вопля: Рахиль плачущися чадъ своихъ, и не хотяше утѣшитися, яко не суть. |
31:16 | Тако рече Господь: да почіетъ гласъ твой от плача и очи твои от слезъ, яко есть мзда дѣломъ твоимъ, глаголетъ Господь, и возвратятся от земли вражiя: |
31:17 | и есть надежда послѣднимъ твоимъ, [глаголетъ Господь,] и возвратятся сынове твои въ предѣлы своя. |
31:18 | Слышя слышахъ Ефрема плачуща: наказалъ мя еси, [Господи,] и наказахся: азъ якоже телецъ не научихся: обрати мя, и обращуся, яко ты еси Господь Богъ мой: |
31:19 См.: 🔗Рим. 2:4 | понеже послѣди плѣненiя моего покаяхся и послѣди разумѣнiя моего возстенахъ въ день посрамленiя и показахъ тебѣ, яко прiяхъ укоризну от юности моея. |
31:20 См.: 🔗Рим. 9:16 | Сынъ любезенъ мнѣ Ефремъ, отроча питѣющееся {нѣжное}, понеже словеса моя въ немъ, памятiю воспомяну и: того ради потщахся о немъ, милуяй помилую его, рече Господь. |
31:21 | Постави себе самого, Сiоне, стражу, сотвори мученiе, направи сердце твое на путь правъ, имже ходилъ еси: возвратися, дѣвице Израилева, обратися во грады твоя рыдающи. |
31:22 | Доколѣ отвращаешися, дщи обезчествованая? яко созда Господь спасенiе въ насажденiе ново, въ немже спасенiи обыдутъ человѣцы. |
31:23 | Яко тако рече Господь: еще рекутъ слово сiе въ земли Иудейстѣй и во градѣхъ ея, егда возвращу преселенiе его: благословенъ Господь на праведнѣй горѣ святѣй своей: |
31:24 | и живущiи во градѣхъ Иудиныхъ и во всей земли его, купно со земледѣлцемъ, и вознесется во стадѣ. |
31:25 | Яко упоихъ всяку душу жаждущу и всяку душу алчущу насытихъ. |
31:26 | Того ради востахъ от сна и видѣхъ, и сонъ ми сладокъ бысть. |
31:27 | Се, дніе грядутъ, глаголетъ Господь, и всѣю Израиля и Иуду сѣмя человѣчо и сѣмя скотское. |
31:28 | И будетъ, якоже бдѣхъ на ня потребити и озлобити, тако бдѣти буду о нихъ, еже созидати и насаждати, рече Господь. |
31:29 См.: 🔗Иез. 18:2 | Въ тыя дни не рекутъ ктому: отцы ядоша кислая, а зубы дѣтемъ оскоминишася: |
31:30 | но кійждо своимъ грѣхомъ умретъ, и ядшему кислая оскоменятся зубы его. |
31:31 См.: 🔗Евр. 8:8 | Се, дніе грядутъ, глаголетъ Господь, и завѣщаю дому Израилеву и дому Иудину завѣтъ новъ, |
31:32 | не по завѣту, егоже завѣщахъ отцемъ ихъ въ день, въ оньже емшу ми за руку ихъ, извести я от земли Египетскiя, яко тіи не пребыша въ завѣтѣ моемъ, и азъ небрегохъ ихъ, глаголетъ Господь. |
31:33 См.: 🔗Евр. 8:10 🔗Иер. 24:7 | Яко сей завѣтъ, егоже завѣщаю дому Израилеву по днехъ онѣхъ, глаголетъ Господь: дая законы моя въ мысли ихъ, и на сердцахъ ихъ напишу я, и буду имъ въ Бога, и тіи будутъ ми въ люди: |
31:34 | и не научитъ кійждо ближняго своего и кійждо брата своего, глаголя: познай Господа: яко вси познаютъ мя от мала даже и до великаго ихъ: яко милостивъ буду неправдамъ ихъ и грѣховъ ихъ не помяну ктому. |
31:35 | Аще вознесется небо на высоту, рече Господь, и аще смирится исподъ земли низу, и азъ не отвергу рода Израилева о всѣхъ, яже сотвориша, глаголетъ Господь. |
31:36 См.: 🔗Быт. 1:16 🔗Пс. 135:8 | Тако рече Господь, давый солнце во свѣтъ дне, луну и звѣзды на свѣтъ нощи, и вопль на мори, и возшумѣша волны его, Господь Вседержитель имя ему. |
31:37 См.: 🔗Иер. 33:20 | Аще премолкнутъ законы сіи от лица моего, рече Господь, то и родъ Израилевъ престанетъ быти языкъ предъ лицемъ моимъ во вся дни. |
31:38 | Се, дніе грядутъ, рече Господь, и созиждется градъ Господеви от столпа Анамеиля до вратъ уголныхъ: |
31:39 | и изыдетъ размѣренiе его противу ему до могилъ гаривъ, и объимется окрестъ избраннымъ каменiемъ, |
31:40 См.: 🔗4Цар. 11:16 🔗Неем. 3:28 | и всю юдоль мертвыхъ и пепела, и весь Ассаримоѳъ даже до водотечи кедрскiя, даже до угла конiй вратъ восточныхъ, освященiе Господеви, и ктому не исторгнется и не потребится даже до вѣка. |