Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 28 | |
28:1 | Есть бо сребру мѣсто, отонудуже и бываетъ, и мѣсто злату, отонудуже очищается. |
28:2 | Желѣзо бо изъ земли раждается, мѣдь же равно каменiю сѣчется. |
28:3 | Чинъ положи тмѣ, и вся концы самъ испытуетъ, камыкъ тмы и сѣнь смерти. |
28:4 | Пресѣченiе потока от праха: забывающiи же путь правый изнемогоша, от человѣкъ подвигошася. |
28:5 | Есть земля, изъ неяже изыдетъ хлѣбъ: подъ нею обратися яко огнь. |
28:6 | Мѣсто сапфира каменiе ея, и персть злато ему. |
28:7 | Стезя, не позна ея птица, и не узрѣ ю око супово, |
28:8 | и не ходиша по ней сынове величавыхъ, и не прейде по ней левъ. |
28:9 | На несѣкомѣ камени простре руку свою, преврати же изъ коренiя горы: |
28:10 | бреги рѣкъ расторже, всякое же честное видѣ око мое: |
28:11 | глубины же рѣкъ откры и показа силу свою на свѣтъ. |
28:12 | Премудрость же откуду обрѣтеся? и кое мѣсто есть вѣдѣнiя? |
28:13 | Не вѣсть человѣкъ пути ея, ниже обрѣтеся въ человѣцѣхъ. |
28:14 | Бездна рече: нѣсть во мнѣ: и море рече: нѣсть со мною. |
28:15 См.: 🔗Пс. 18:11 🔗Пс. 118:72 | Не дастся сокровище за ню, и не извѣсится сребро на измѣненiе ея, |
28:16 См.: 🔗Прит. 8:11 🔗Прем. 7:9 | и не сравнится со златомъ Софирскимъ, со ониксомъ честнымъ и сапфиромъ: |
28:17 | не равно будетъ ей злато и кристаль, и измѣненiе ея сосуди злати. |
28:18 | Превысокая и бисерiе не помянутся, и притяжи премудрость паче внутреннѣйшихъ: |
28:19 | не уравнится ей топазiй еѳiопскiй, со златомъ чистымъ не сравнится. |
28:20 | Премудрость же откуду обрѣтеся? и кое мѣсто есть разуму? |
28:21 | Утаися от всякаго человѣка, и от птицъ небесныхъ скрыся. |
28:22 | Пагуба и смерть рекостѣ: слышахомъ ея славу. |
28:23 См.: 🔗Вар. 3:32 | Богъ благо позна ея путь: самъ бо вѣсть мѣсто ея. |
28:24 | Ибо самъ поднебесную всю надзираетъ, вѣдый, яже на земли, вся, яже сотвори. |
28:25 | Вѣтровъ вѣсъ и водѣ мѣру егда сотворилъ, |
28:26 См.: 🔗Иов. 38:25 | тако видяй сочте, и путь въ сотрясенiи гласовъ, |
28:27 | тогда видѣ ю и повѣда ю, уготовавъ изслѣди |
28:28 См.: 🔗Прит. 1:7 | и рече человѣку: се, благочестiе есть премудрость, а еже удалятися от зла есть вѣдѣнiе. |