Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 18 | |
18:1 | В той час приступиша ученицы ко Иисусу, глаголюще: кто убо болий есть в Царствии Небеснем? |
18:2 См.: 🔗Мк. 9:36 | И призвав Иисус отроча, постави е посреде их |
18:3 | и рече: аминь глаголю вам, аще не обратитеся и будете яко дети, не внидете в Царство Небесное: |
18:4 См.: 🔗Мк. 10:14 🔗1Кор. 14:20 | иже убо смирится яко отроча сие, той есть болий во Царствии Небеснем: |
18:5 | и иже аще приимет отроча таково во имя Мое, Мене приемлет: |
18:6 | а иже аще соблазнит единаго малых сих верующих в Мя, уне есть ему, да обесится жернов оселский на выи его, и потонет в пучине морстей. |
18:7 См.: 🔗1Кор. 11:19 | Горе миру от соблазн: нужда бо есть приити соблазном: обаче горе человеку тому, имже соблазн приходит. |
18:8 См.: 🔗Мк. 9:43 | Аще ли рука твоя или нога твоя соблажняет тя, отсецы ю и верзи от себе: добрейше ти есть внити в живот хрому или бедну, неже две руце и две нозе имущу ввержену быти во огнь вечный: |
18:9 См.: 🔗Втор. 13:6 🔗Мф. 5:29 | и аще око твое соблажняет тя, изми е и верзи от себе: добрейше ти есть со единем оком в живот внити, неже две оце имущу ввержену быти в геенну огненную. |
18:10 | Блюдите, да не презрите единаго (от) малых сих: глаголю бо вам, яко Ангели их на небесех выну видят лице Отца Моего Небеснаго. |
18:11 | Прииде бо Сын Человеческий (взыскати и) спасти погибшаго. |
18:12 См.: 🔗Лк. 15:4 | Что вам мнится? Аще будет некоему человеку сто овец, и заблудит едина от них: не оставит ли девятьдесят и девять в горах и шед ищет заблуждшия? |
18:13 | И аще будет обрести ю, аминь глаголю вам, яко радуется о ней паче, неже о девятидесятих и девяти не заблуждших. |
18:14 | Тако несть воля пред Отцем вашим Небесным, да погибнет един от малых сих. |
18:15 | Аще же согрешит к тебе брат твой, иди и обличи его между тобою и тем единем: аще тебе послушает, приобрел еси брата твоего: |
18:16 | аще ли тебе не послушает, поими с собою еще единаго или два, да при устех двою или триех свидетелей станет всяк глагол: |
18:17 | аще же не послушает их, повеждь церкви: аще же и церковь преслушает, буди тебе якоже язычник и мытарь. |
18:18 См.: 🔗Мф. 16:19 🔗Ин. 20:23 | Аминь (бо) глаголю вам: елика аще свяжете на земли, будут связана на небеси: и елика аще разрешите на земли, будут разрешена на небесех. |
18:19 | Паки аминь глаголю вам, яко аще два от вас совещаета на земли о всяцей вещи, еяже аще просита, будет има от Отца Моего, Иже на небесех: |
18:20 | идеже бо еста два или трие собрани во имя Мое, ту есмь посреде их. |
18:21 См.: 🔗Лк. 17:4 | Тогда приступль к Нему Петр рече: Господи, колькраты аще согрешит в мя брат мой, и отпущу ли ему до седмь крат? |
18:22 | Глагола ему Иисус: не глаголю тебе: до седмь крат, но до седмьдесят крат седмерицею. |
18:23 | Сего ради уподобися Царствие Небесное человеку царю, иже восхоте стязатися о словеси с рабы своими. |
18:24 | Наченшу же ему стязатися, приведоша ему единаго должника тмою талант: |
18:25 | не имущу же ему воздати, повеле и господь его продати, и жену его, и чада, и вся, елика имеяше, и отдати. |
18:26 | Пад убо раб той, кланяшеся ему, глаголя: господи, потерпи на мне, и вся ти воздам. |
18:27 | Милосердовав же господь раба того, прости его и долг отпусти ему. |
18:28 | Изшед же раб той, обрете единаго (от) клеврет своих, иже бе должен ему стом пенязь: и емь его давляше, глаголя: отдаждь ми, имже (ми) еси должен. |
18:29 | Пад убо клеврет его на нозе его, моляше его, глаголя: потерпи на мне, и вся воздам ти. |
18:30 | Он же не хотяше, но вед всади его в темницу, дондеже воздаст должное. |
18:31 | Видевше же клеврети его бывшая, сжалиша си зело и пришедше сказаша господину своему вся бывшая. |
18:32 | Тогда призвав его господин его, глагола ему: рабе лукавый, весь долг он отпустих тебе, понеже умолил мя еси: |
18:33 | не подобаше ли и тебе помиловати клеврета твоего, якоже и аз тя помиловах? |
18:34 | И прогневався господь его, предаде его мучителем, дондеже воздаст весь долг свой. |
18:35 | Тако и Отец Мой Небесный сотворит вам, аще не отпустите кийждо брату своему от сердец ваших прегрешения их. |