Евангелие от Луки, глава 6

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 6
6:1 См.: 🔗Втор. 23:25 🔗Мф. 12:1 🔗Мк. 2:23	Бысть же в субботу второпервую ити Ему сквозе сеяния: и восторгаху ученицы Его класы, и ядяху, стирающе руками.
6:2	Нецыи же от фарисей реша им: что творите, егоже не достоит творити в субботы?
6:3 См.: 🔗1Цар. 21:6 🔗Мф. 12:4 🔗Мк. 2:26	И отвещав Иисус рече к ним: ни ли сего чли есте, еже сотвори Давид, егда взалкася сам и иже с ним бяху?
6:4 См.: 🔗Исх. 29:32 🔗Лев. 8:31 🔗Лев. 24:9 🔗Мф. 12:4 🔗Мк. 2:26	Како вниде в дом Божий, и хлебы предложения взем, и яде, и даде и сущым с ним, ихже не достояше ясти, токмо единем иереем?
6:5	И глаголаше им, яко господь есть Сын Человеческий и субботе.
6:6 См.: 🔗Мф. 12:9 🔗Мк. 3:1	Бысть же и в другую субботу внити Ему в сонмище и учити: и бе тамо человек, и рука ему десная бе суха.
6:7	Назираху же книжницы и фарисее, аще в субботу изцелит, да обрящут речь Нань.
6:8	Он же ведяше помышления их и рече человеку имущему суху руку: востани и стани посреде. Он же востав ста.
6:9	Рече же Иисус к ним: вопрошу вы: что достоит в субботы, добро творити, или зло творити? Душу спасти, или погубити? Они же умолчаша.
6:10	И воззрев на всех их, рече ему: простри руку твою. Он же сотвори тако: и утвердися рука его здрава яко другая.
6:11	Они же исполнишася безумия и глаголаху друг ко другу, что быша сотворили Иисусови.
6:12	Бысть же во дни тыя, изыде в гору помолитися: и бе об нощь в молитве Божии.
6:13 См.: 🔗Мф. 10:1 🔗Мк. 3:13	И егда бысть день, призва ученики Своя: и избра от них дванадесяте, ихже и Апостолы нарече:
6:14	Симона, егоже именова Петра, и Андреа брата его, Иакова и Иоанна, Филиппа и Варфоломеа,
6:15	Матфеа и Фому, Иакова Алфеева и Симона нарицаемаго Зилота,
6:16	Иуду Иаковля, и Иуду Искариотскаго, иже и бысть предатель.
6:17 См.: 🔗Мф. 4:25	Изшед с ними, ста на месте равне: и народ ученик Его, и множество много людий от всея Иудеи и Иерусалима, и помория Тирска и Сидонска,
6:18	иже приидоша послушати Его и изцелитися от недуг своих, и страждущии от дух нечистых: и изцеляхуся.
6:19 См.: 🔗Мк. 5:30	И весь народ искаше прикасатися Ему: яко сила от Него исхождаше и изцеляше вся.
6:20 См.: 🔗Мф. 5:3	И Той возвед очи Свои на ученики Своя, глаголаше: блажени нищии духом: яко ваше есть Царствие Божие.
6:21 См.: 🔗Ис. 55:1 🔗Ис. 61:2 🔗Ис. 65:13	Блажени, алчущии ныне: яко насытитеся. Блажени, плачущии ныне: яко возсмеетеся.
6:22 См.: 🔗Мф. 5:11	Блажени будете, егда возненавидят вас человецы, и егда разлучат вы и поносят, и пронесут имя ваше яко зло, Сына Человеческаго ради.
6:23 См.: 🔗2Пар. 36:16 🔗Неем. 9:26 🔗Ис. 35:10	Возрадуйтеся в той день и взыграйте: се бо, мзда ваша многа на небеси. По сим бо творяху пророком отцы их.
6:24	Обаче горе вам богатым: яко отстоите утешения вашего.
6:25 См.: 🔗Прит. 14:13 🔗Ис. 65:13	Горе вам, насыщеннии ныне: яко взалчете. Горе вам смеющымся ныне: яко возрыдаете и восплачете.
6:26 См.: 🔗Ис. 30:10 🔗Ин. 7:7	Горе, егда добре рекут вам вси человецы. По сим бо творяху лжепророком отцы их.
6:27 См.: 🔗Исх. 23:4 🔗Прит. 25:21 🔗Мф. 5:44	Но вам глаголю слышащым: любите враги вашя, добро творите ненавидящым вас,
6:28	благословите кленущыя вы, и молитеся за творящих вам обиду.
6:29 См.: 🔗Мф. 5:39 🔗Рим. 12:17 🔗1Кор. 6:7	Биющему тя в ланиту, подаждь и другую: и от взимающаго ти ризу, и срачицу не возбрани.
6:30	Всякому же просящему у тебе дай: и от взимающаго твоя не истязуй.
6:31 См.: 🔗Тов. 4:15 🔗Мф. 7:12	И якоже хощете да творят вам человецы, и вы творите им такожде.
6:32	И аще любите любящыя вы, кая вам благодать есть? Ибо и грешницы любящыя их любят.
6:33	И аще благотворите благотворящым вам, кая вам благодать есть? Ибо и грешницы тожде творят.
6:34	И аще взаим даете, от нихже чаете восприяти, кая вам благодать есть, ибо и грешницы грешником взаим давают, да восприимут равная.
6:35 См.: 🔗Втор. 15:8 🔗Мф. 5:45	Обаче любите враги вашя, и благотворите, и взаим дайте, ничесоже чающе: и будет мзда ваша многа, и будете сынове Вышняго: яко Той благ есть на безблагодатныя и злыя.
6:36 См.: 🔗Мф. 5:48	Будите убо милосерди, якоже и Отец ваш милосерд есть.
6:37 См.: 🔗Мф. 7:2 🔗Рим. 2:1 🔗1Кор. 4:5	И не судите, и не судят вам: (и) не осуждайте, да не осуждени будете: отпущайте, и отпустят вам:
6:38 См.: 🔗Прит. 19:17 🔗Мф. 7:2 🔗Мк. 4:24	дайте, и дастся вам: меру добру, наткану и потрясну и преливающуся дадят на лоно ваше: тою бо мерою, еюже мерите, возмерится вам.
6:39 См.: 🔗Ис. 42:19 🔗Мф. 15:14	Рече же притчу им: еда может слепец слепца водити? Не оба ли в яму впадетася?
6:40 См.: 🔗Мф. 10:24 🔗Ин. 13:16 🔗Ин. 15:20	Несть ученик над учителя своего: совершен же всяк будет, якоже и учитель его.
6:41 См.: 🔗Мф. 7:3	Что же видиши сучец, иже есть во очеси брата твоего, бервна же, еже есть во очеси твоем, не чуеши?
6:42 См.: 🔗Прит. 18:18	Или како можеши рещи брату твоему: брате, остави, да изму сучец, иже есть во очеси твоем, сам сущаго во очеси твоем бервна не видя? Лицемере, изми первее бервно из очесе твоего, и тогда прозриши изяти сучец из очесе брата твоего.
6:43 См.: 🔗Мф. 7:18 🔗Мф. 12:33	Несть бо древо добро, творя плода зла: ниже древо зло, творя плода добра.
6:44 См.: 🔗Мф. 7:16	Всяко бо древо от плода своего познается: не от терния бо чешут смоквы, ни от купины емлют гроздия.
6:45 См.: 🔗Мф. 12:34	Благий человек от благаго сокровища сердца своего износит благое: и злый человек от злаго сокровища сердца своего износит злое: от избытка бо сердца глаголют уста его.
6:46 См.: 🔗Мал. 1:6 🔗Мф. 7:21 🔗Иак. 1:22 🔗Рим. 2:13	Что же Мя зовете: Господи, Господи, и не творите, яже глаголю?
6:47	Всяк грядый ко Мне и слышай словеса Моя и творя я, скажу вам, кому есть подобен:
6:48 См.: 🔗Мф. 7:24	подобен есть человеку зиждущу храмину, иже ископа и углуби, и положи основание на камени: наводнению же бывшу, припаде река ко храмине той, и не може поколебати ея: основана бо бе на камени.
6:49	Слышавый же и не сотворивый подобен есть человеку создавшему храмину на земли без основания: к нейже припаде река, и абие падеся, и бысть разрушение храмины тоя велие.