Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 28 | |
28:1 | В вечер же субботный, свитающи во едину от суббот, прииде Мариа Магдалина и другая Мариа, видети гроб. |
28:2 | И се, трус бысть велий: Ангел бо Господень сшед с небесе, приступль отвали камень от дверий гроба и седяше на нем: |
28:3 | бе же зрак его яко молния, и одеяние его бело яко снег. |
28:4 | От страха же его сотрясошася стрегущии и быша яко мертви. |
28:5 См.: 🔗Мк. 16:6 | Отвещав же Ангел рече женам: не бойтеся вы: вем бо, яко Иисуса распятаго ищете: |
28:6 | несть зде: воста бо, якоже рече: приидите, видите место, идеже лежа Господь, |
28:7 | и скоро шедше рцыте учеником Его, яко воста от мертвых и се, варяет вы в Галилеи: тамо Его узрите: се, рех вам. |
28:8 | И изшедше скоро от гроба со страхом и радостию велиею, текосте возвестити учеником Его. |
28:9 См.: 🔗Мк. 16:9 🔗Ин. 20:14 | Егда же идясте возвестити учеником Его, и се, Иисус срете я, глаголя: радуйтеся. Оне же приступльше ястеся за нозе Его и поклонистеся Ему. |
28:10 См.: 🔗Ин. 20:17 🔗Евр. 2:11 | Тогда глагола има Иисус: не бойтеся: идите, возвестите братии Моей, да идут в Галилею, и ту Мя видят. |
28:11 | Идущема же има, се, нецыи от кустодии пришедше во град, возвестиша архиереом вся бывшая. |
28:12 | И собравшеся со старцы, совет сотвориша, сребреники доволны даша воином, |
28:13 | глаголюще: рцыте, яко ученицы Его нощию пришедше украдоша Его, нам спящым: |
28:14 | и аще сие услышано будет у игемона, мы утолим его и вас безпечальны сотворим. |
28:15 | Они же приемше сребреники, сотвориша, якоже научени быша. И промчеся слово сие во Иудеех даже до сего дне. |
28:16 | Единии же надесяте ученицы идоша в Галилею, в гору, аможе повеле им Иисус: |
28:17 | и видевше Его, поклонишася Ему: ови же усумнешася. |
28:18 | И приступль Иисус, рече им, глаголя: дадеся Ми всяка власть на небеси и на земли: |
28:19 | шедше убо научите вся языки, крестяще их во имя Отца и Сына и Святаго Духа, |
28:20 | учаще их блюсти вся, елика заповедах вам: и се, Аз с вами есмь во вся дни до скончания века. Аминь. |