Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 5 | |
5:1 | Узрев же народы, взыде на гору: и седшу Ему, приступиша к Нему ученицы Его. |
5:2 | И отверз уста Своя, учаше их, глаголя: |
5:3 См.: 🔗Лк. 6:20 | блажени нищии духом: яко тех есть Царствие Небесное. |
5:4 | Блажени плачущии: яко тии утешатся. |
5:5 См.: 🔗Пс. 36:11 | Блажени кротцыи: яко тии наследят землю. |
5:6 | Блажени алчущии и жаждущии правды: яко тии насытятся. |
5:7 | Блажени милостивии: яко тии помиловани будут. |
5:8 См.: 🔗Пс. 23:4 | Блажени честии сердцем: яко тии Бога узрят. |
5:9 См.: 🔗Евр. 12:14 | Блажени миротворцы: яко тии сынове Божии нарекутся. |
5:10 См.: 🔗1Пет. 3:14 | Блажени изгнани правды ради: яко тех есть Царствие Небесное. |
5:11 См.: 🔗Лк. 6:22 🔗1Пет. 4:14 | Блажени есте, егда поносят вам, и ижденут, и рекут всяк зол глагол на вы лжуще, Мене ради: |
5:12 См.: 🔗Мф. 21:35 | радуйтеся и веселитеся, яко мзда ваша многа на небесех: тако бо изгнаша пророки, иже (беша) прежде вас. |
5:13 См.: 🔗Мк. 9:50 🔗Лк. 14:34 | Вы есте соль земли: аще же соль обуяет, чим осолится? Ни во чтоже будет ктому, точию да изсыпана будет вон и попираема человеки. |
5:14 См.: 🔗Флп. 2:15 | Вы есте свет мира: не может град укрытися верху горы стоя: |
5:15 | ниже вжигают светилника и поставляют его под спудом, но на свещнице, и светит всем, иже в храмине (суть). |
5:16 См.: 🔗1Пет. 2:12 🔗Флп. 2:15 | Тако да просветится свет ваш пред человеки, яко да видят ваша добрая дела и прославят Отца вашего, Иже на небесех. |
5:17 | не мните, яко приидох разорити закон, или пророки: не приидох разорити, но исполнити. |
5:18 См.: 🔗Лк. 16:17 | Аминь бо глаголю вам: дондеже прейдет небо и земля, иота едина, или едина черта не прейдет от закона, дондеже вся будут. |
5:19 | Иже аще разорит едину заповедий сих малых и научит тако человеки, мний наречется в Царствии Небеснем: а иже сотворит и научит, сей велий наречется в Царствии Небеснем. |
5:20 | Глаголю бо вам, яко аще не избудет правда ваша паче книжник и фарисей, не внидете в Царствие Небесное. |
5:21 | Слышасте, яко речено бысть древним: не убиеши: иже (бо) аще убиет, повинен есть суду. |
5:22 | Аз же глаголю вам, яко всяк гневаяйся на брата своего всуе повинен есть суду: иже бо аще речет брату своему: рака, повинен есть сонмищу: а иже речет: уроде, повинен есть геенне огненней. |
5:23 | Аще убо принесеши дар твой ко олтарю и ту помянеши, яко брат твой имать нечто на тя: |
5:24 | остави ту дар твой пред олтарем и шед прежде смирися с братом твоим, и тогда пришед принеси дар твой. |
5:25 См.: 🔗Лк. 12:58 | Буди увещаваяся с соперником твоим скоро, дондеже еси на пути с ним, да не предаст тебе соперник судии, и судия тя предаст слузе, и в темницу ввержен будеши: |
5:26 | аминь глаголю тебе: не изыдеши оттуду, дондеже воздаси последний кодрант. |
5:27 См.: 🔗Исх. 20:14 🔗Втор. 5:18 | Слышасте, яко речено бысть древним: не прелюбы сотвориши. |
5:28 | Аз же глаголю вам, яко всяк, иже воззрит на жену ко еже вожделети ея, уже любодействова с нею в сердцы своем: |
5:29 | аще же око твое десное соблажняет тя, изми е и верзи от себе: уне бо ти есть, да погибнет един от уд твоих, а не все тело твое ввержено будет в геенну (огненную): |
5:30 | и аще десная твоя рука соблажняет тя, усецы ю и верзи от себе: уне бо ти есть, да погибнет един от уд твоих, а не все тело твое ввержено будет в геенну. |
5:31 | Речено же бысть, яко иже аще пустит жену свою, да даст ей книгу распустную. |
5:32 | Аз же глаголю вам, яко всяк отпущаяй жену свою, разве словесе любодейнаго, творит ю прелюбодействовати: и иже пущеницу поймет, прелюбодействует. |
5:33 | Паки слышасте, яко речено бысть древним: не во лжу кленешися, воздаси же Господеви клятвы твоя. |
5:34 | Аз же глаголю вам не клятися всяко: ни небом, яко престол есть Божий: |
5:35 | ни землею, яко подножие есть ногама Его: ни Иерусалимом, яко град есть великаго Царя: |
5:36 | ниже главою твоею кленися, яко не можеши власа единаго бела или черна сотворити: |
5:37 См.: 🔗Иак. 5:12 | буди же слово ваше: ей, ей: ни, ни: лишше же сею от неприязни есть. |
5:38 | Слышасте, яко речено бысть: око за око, и зуб за зуб. |
5:39 | Аз же глаголю вам не противитися злу: но аще тя кто ударит в десную твою ланиту, обрати ему и другую: |
5:40 | и хотящему судитися с тобою и ризу твою взяти, отпусти ему и срачицу: |
5:41 | и аще кто тя поймет по силе поприще едино, иди с ним два. |
5:42 См.: 🔗Втор. 15:7 🔗Лк. 6:34 | Просящему у тебе дай, и хотящаго от тебе заяти не отврати. |
5:43 | Слышасте, яко речено есть: возлюбиши искренняго твоего и возненавидиши врага твоего. |
5:44 | Аз же глаголю вам: любите враги вашя, благословите кленущыя вы, добро творите ненавидящым вас, и молитеся за творящих вам напасть и изгонящыя вы, |
5:45 См.: 🔗Лк. 6:35 | яко да будете сынове Отца вашего, Иже есть на небесех: яко солнце Свое сияет на злыя и благия и дождит на праведныя и на неправедныя. |
5:46 | Аще бо любите любящих вас, кую мзду имате? Не и мытари ли тожде творят? |
5:47 | И аще целуете други вашя токмо, что лишше творите? Не и язычницы ли такожде творят? |
5:48 | Будите убо вы совершени, якоже Отец ваш Небесный совершен есть. |