Евангелие от Матфея, глава 6

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 6
6:1	Внемлите милостыни вашея не творити пред человеки, да видими будете ими: аще ли же ни, мзды не имате от Отца вашего, Иже есть на небесех.
6:2 См.: 🔗Рим. 12:8	Егда убо твориши милостыню, не воструби пред собою, якоже лицемери творят в сонмищих и в стогнах, яко да прославятся от человек. Аминь глаголю вам, восприемлют мзду свою.
6:3	Тебе же творящу милостыню, да не увесть шуйца твоя, что творит десница твоя,
6:4	яко да будет милостыня твоя в тайне: и Отец твой, видяй в тайне, той воздаст тебе яве.
6:5	И егда молишися, не буди якоже лицемери, яко любят в сонмищих и в стогнах путий стояще молитися, яко да явятся человеком. Аминь глаголю вам, яко восприемлют мзду свою.
6:6	Ты же, егда молишися, вниди в клеть твою, и затворив двери твоя, помолися Отцу твоему, Иже в тайне: и Отец твой, видяй в тайне, воздаст тебе яве.
6:7	Молящеся же не лишше глаголите, якоже язычницы: мнят бо, яко во многоглаголании своем услышани будут:
6:8	не подобитеся убо им: весть бо Отец ваш, ихже требуете, прежде прошения вашего.
6:9 См.: 🔗Лк. 11:2	Сице убо молитеся вы: Отче наш, иже еси на небесех, да святится имя Твое:
6:10	да приидет Царствие Твое: да будет воля Твоя, яко на небеси, и на земли:
6:11	хлеб наш насущный даждь нам днесь:
6:12	и остави нам долги нашя, яко и мы оставляем должником нашым:
6:13	и не введи нас в напасть, но избави нас от лукаваго: яко Твое есть Царствие и сила и слава во веки. Аминь.
6:14 См.: 🔗Сир. 28:2 🔗Мк. 11:25	Аще бо отпущаете человеком согрешения их, отпустит и вам Отец ваш Небесный:
6:15	аще ли не отпущаете человеком согрешения их, ни Отец ваш отпустит вам согрешений ваших.
6:16	Егда же поститеся, не будите якоже лицемери сетующе: помрачают бо лица своя, яко да явятся человеком постящеся. Аминь глаголю вам, яко восприемлют мзду свою.
6:17	Ты же постяся помажи главу твою, и лице твое умый,
6:18	яко да не явишися человеком постяся, но Отцу твоему, Иже в тайне: и Отец твой, видяй в тайне, воздаст тебе яве.
6:19	Не скрывайте себе сокровищ на земли, идеже червь и тля тлит, и идеже татие подкопывают и крадут:
6:20 См.: 🔗Лк. 12:21 🔗1Тим. 6:19	скрывайте же себе сокровище на небеси, идеже ни червь, ни тля тлит, и идеже татие не подкопывают, ни крадут:
6:21	идеже бо есть сокровище ваше, ту будет и сердце ваше.
6:22 См.: 🔗Лк. 11:34	Светилник телу есть око. Аще убо будет око твое просто, все тело твое светло будет:
6:23	аще ли око твое лукаво будет, все тело твое темно будет. Аще убо свет, иже в тебе, тма есть, то тма кольми?
6:24 См.: 🔗Лк. 16:13	Никтоже может двема господинома работати: любо единаго возлюбит, а другаго возненавидит: или единаго держится, о друзем же нерадити начнет. Не можете Богу работати и мамоне.
6:25 См.: 🔗Пс. 54:23 🔗Лк. 12:22 🔗1Пет. 5:7	Сего ради глаголю вам: не пецытеся душею вашею, что ясте, или что пиете: ни телом вашим, во что облечетеся. Не душа ли болши есть пищи, и тело одежди?
6:26	Воззрите на птицы небесныя, яко не сеют, ни жнут, ни собирают в житницы, и Отец ваш Небесный питает их. Не вы ли паче лучши их есте?
6:27	Кто же от вас пекийся может приложити возрасту своему лакоть един?
6:28	И о одежди что печетеся? Смотрите крин селных, како растут: не труждаются, ни прядут:
6:29	глаголю же вам, яко ни Соломон во всей славе своей облечеся, яко един от сих:
6:30	аще же сено селное, днесь суще и утре в пещь вметаемо, Бог тако одевает, не много ли паче вас, маловери?
6:31	Не пецытеся убо, глаголюще: что ямы, или что пием, или чим одеждемся?
6:32	Всех бо сих языцы ищут: весть бо Отец ваш Небесный, яко требуете сих всех.
6:33 См.: 🔗Мк. 10:30 🔗Лк. 12:31 🔗1Тим. 4:8	Ищите же прежде Царствия Божия и правды Его, и сия вся приложатся вам.
6:34	Не пецытеся убо на утрей, утрений бо собою печется: довлеет дневи злоба его.