Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 3 | |
3:1 См.: 🔗Нав. 6:12 🔗Чис. 25:1 | И воста заутра Иисусъ, и воздвигошася изъ Саттина, и прiидоша до Иордана той и вси сынове Израилевы, и сташа тамо прежде неже прейти. |
3:2 | И бысть по трiехъ днехъ, проидоша книгочiя чрезъ полкъ, |
3:3 | и заповѣдаша людемъ, глаголюще: егда узрите кивотъ завѣта Господа Бога нашего, и жерцы нашя, и левиты воздвизающыя его, да воздвигнетеся и вы от мѣстъ вашихъ и пойдете вслѣдъ его: |
3:4 | но подалѣе да будетъ между вами и онымъ, елико двѣ тысящы лакотъ станете: не приближитеся къ нему, да увѣсте путь, по немуже пойдете: не ходисте бо путемъ тѣмъ ни вчера, ни третiяго дне. |
3:5 См.: 🔗Исх. 19:10 🔗Лев. 20:7 | И рече Иисусъ къ людемъ: очиститеся наутрiе, яко заутра сотворитъ въ васъ Господь чудная. |
3:6 См.: 🔗Чис. 4:15 | И рече Иисусъ къ жерцемъ: воздвигните кивотъ завѣта Господня и предъидите предъ людьми. И взяша жерцы кивотъ завѣта Господня и идоша предъ людьми. |
3:7 См.: 🔗Нав. 4:14 | И рече Господь ко Иисусу: въ сей день начинаю возвышати тя предъ всѣми сынми Израилевыми, да увѣдятъ, якоже бѣхъ съ Моисеомъ, тако буду и съ тобою: |
3:8 | и нынѣ заповѣждь жерцемъ воздвизающымъ кивотъ завѣта, глаголя: егда внидете на часть воды Иордана, и во Иорданѣ станете. |
3:9 | И рече Иисусъ сыномъ Израилевымъ: приступите сѣмо, и слышите слово Господа Бога вашего: |
3:10 | въ сихъ увѣсте, яко Господь живяй въ васъ и потребляяй потребитъ от лица вашего Хананеа и Хеттеа, и Ферезеа и Евеа, и Гергесеа и Аморреа и Иевусеа: |
3:11 См.: 🔗Деян. 7:45 🔗Пс. 8:2 | се, кивотъ завѣта Господа всея земли преходитъ Иорданъ: |
3:12 | изберите себѣ дванадесять мужей от сыновъ Израилевыхъ, единаго от коегождо племене, |
3:13 См.: 🔗Пс. 113:3 | и будетъ егда почіютъ нози жерцевъ воздвизающихъ кивотъ завѣта Господа всея земли въ водѣ Иордана, вода Иорданова оскудѣетъ, вода же низтекущая станетъ. |
3:14 См.: 🔗Деян. 7:45 | И бысть егда воздвигнушася людiе от кущъ своихъ прейти Иорданъ, жерцы же воздвигоша кивотъ завѣта Господня предъ людьми: |
3:15 См.: 🔗1Пар. 12:15 🔗Сир. 24:28 | егда же внидоша жерцы воздвижуще кивотъ завѣта Господня во Иорданъ, и нози жерцевъ воздвизающихъ кивотъ завѣта Господня омочишася въ части воды Иордана, Иорданъ же наполняшеся во вся краи своя, якоже во дни жатвы пшеницы: |
3:16 См.: 🔗Исх. 14:21 🔗Авв. 3:9 | и сташа воды текущыя свыше, ста огустѣнiе едино отлучившееся далече зѣло зѣло от Адами града даже до страны Карiаѳiарима: низтекущая же низтече въ море Аравско, въ море Сланое, дондеже до конца оскудѣ. |
3:17 | И людiе стояху прямо Иерихону. И сташа жерцы воздвизающiи кивотъ завѣта Господня на сусѣ посредѣ Иордана: и вси сынове Израилевы прехождаху по суху, дондеже скончаша вси людiе преходяще Иорданъ. |