Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 8 | |
8:1 | И рече Господь ко иисусу: не бойся, ниже ужасайся: поими съ собою вся мужы воинскiя, и воставъ взыди въ гай: се, предахъ въ руцѣ твои царя гайска и землю его, и люди его и градъ его: |
8:2 См.: 🔗Нав. 6:20 🔗Суд. 20:29 | и да сотвориши гаю и царю его, якоже сотворилъ еси иерихону и царю его: и плѣнъ его и скоты его да плѣниши себѣ: устрой же себѣ подсаду граду за собою. |
8:3 | И воста иисусъ и вси мужiе воинстiи, да внидутъ въ гай: и избра иисусъ тридесять тысящъ мужей воинскихъ сильныхъ крѣпостiю и посла ихъ нощiю, |
8:4 См.: 🔗2Пар. 13:13 | и заповѣда имъ, глаголя: вы скрыйтеся за градомъ: не далече будите от града зѣло, и будите вси готови: |
8:5 См.: 🔗Нав. 7:4 | азъ же и вси людiе иже со мною приступимъ ко граду: и будетъ егда изыдутъ живущiи въ гаи въ срѣтенiе намъ, якоже и прежде, и побѣгнемъ от лица ихъ: |
8:6 См.: 🔗Нав. 7:4 | и егда изыдутъ вслѣдъ насъ, отторгнемъ ихъ от града: и рекутъ: бѣжатъ сіи от лица нашего, якоже и прежде: |
8:7 | вы же востанете от подсады, и пойдете во градъ, и предастъ его Господь Богъ нашъ въ руцѣ ваши: |
8:8 | и будетъ егда возмете градъ, запалите его огнемъ, по словеси сему сотворите: се, заповѣдаю вамъ. |
8:9 | И посла ихъ иисусъ, и идоша въ подсаду: и сѣдоша между Веѳилемъ и между гаiемъ, от моря гаiа. |
8:10 См.: 🔗Нав. 6:12 🔗Нав. 7:16 | И воставъ иисусъ заутра, согляда люди: и взыде самъ и старцы Израилтестiи предъ людьми въ гай. |
8:11 | И вси людiе воинстiи съ нимъ взыдоша, и идуще прiидоша сопротивъ града от востоковъ: и подсады града от моря. |
8:12 | И ополчишася от сѣвера гаiа, и [бысть] дебрь между ими и между гаiемъ. И взя яко пять тысящъ мужей, и положи ихъ на подсаду между Веѳилемъ и гаiемъ от запада гаiа. |
8:13 | И поставиша людiе весь полкъ от сѣвера града, а прочая его от моря града. И пойде иисусъ въ нощь ону посредѣ дебри. |
8:14 | И бысть егда увидѣ царь гайскiй, потщася, и воста рано и изыде въ срѣтенiе имъ прямо на брань, самъ и вси людiе его съ нимъ во время, предъ лицемъ подсады: онъ же не вѣдяше, яко подсада ему есть за градомъ [его]. |
8:15 | И увидѣ, и отъиде иисусъ и весь людъ от лица ихъ, и побѣже путемъ пустыни. |
8:16 | И укрѣпися весь людъ гнати вслѣдъ ихъ, и погнаша вслѣдъ сыновъ Израилевыхъ, и отступиша от града. |
8:17 | [И] не остася никтоже въ гаи и Веѳили, иже не погна вслѣдъ Израиля: и оставиша градъ отверстъ, и гнаша вслѣдъ Израиля. |
8:18 | И рече Господь ко иисусу: простри руку твою съ копiемъ, еже въ руцѣ твоей, на градъ, зане въ руку твою предахъ его: и подсады востанутъ вскорѣ от мѣста своего. И простре иисусъ руку свою и съ копiемъ на градъ. |
8:19 | И подсады восташа скоро от мѣста своего: и изыдоша, егда простре руку, и внидоша во градъ, и взяша его: и потщавшеся запалиша градъ огнемъ. |
8:20 | И озрѣвшеся обитатели гайстiи вспять себе, узрѣша дымъ восходящь от града до небесе, и ктому не имѣша камо побѣгнути, сѣмо или овамо: людiе же бѣгущiи въ пустыню обратишася на гонящихъ. |
8:21 | Иисусъ же и весь Израиль увидѣша, яко взяша подсады градъ, и яко восходитъ дымъ градный до небесе: и обратившеся избиша мужей гайскихъ. |
8:22 См.: 🔗Чис. 21:35 🔗Втор. 7:2 | И сіи изыдоша изъ града противу имъ, и быша посредѣ полка Израилева, сіи отсюду и сіи отонуду: и избиша ихъ, дондеже не остася ни единъ от нихъ цѣлъ, ни убѣжа. |
8:23 | И царя гайска яша жива, и приведоша его ко иисусу. |
8:24 | И бысть егда престаша сынове Израилевы сѣкуще всѣхъ сущихъ въ гаи и сущихъ на поляхъ и на горѣ исхода, идѣже гониша ихъ, и падоша вси острiемъ меча на ней до конца: и обратися иисусъ въ гай и посѣче ихъ мечемъ. |
8:25 | И быша вси падшiи въ той день от мужеска полу и до женска дванадесять тысящъ, вси живущiи въ гаи. |
8:26 См.: 🔗Исх. 17:9 | Иисусъ же не обрати руки своея, юже простре съ копiемъ, дондеже прокля всѣхъ обитающихъ въ гаи. |
8:27 | Кромѣ скотовъ [ихъ] и имѣнiя, яже во градѣ онѣмъ, вся плѣниша себѣ сынове Израилевы по повелѣнiю Господню, якоже повелѣ Господь иисусу. |
8:28 | И запали градъ иисусъ огнемъ: землю необитаему во вѣкъ положи его даже до сего дне. |
8:29 См.: 🔗Втор. 21:23 🔗2Цар. 18:17 | И царя гайска повѣси на древѣ сугубѣмъ: и бяше на древѣ до вечера: и заходящу солнцу повелѣ иисусъ, и сняша тѣло его съ древа, и повергоша е въ ровъ предъ враты града: и насыпа надъ нимъ громаду велику каменiя даже до сего дне. |
8:30 | Тогда созда иисусъ олтарь Господу Богу Израилеву на горѣ Гевалъ, |
8:31 См.: 🔗Исх. 20:25 🔗Втор. 27:5 | якоже заповѣда Моисей рабъ Господень сыномъ Израилевымъ, и якоже написася въ законѣ Моисеовѣ, олтарь от каменiй всецѣлыхъ, на нихже не возложися желѣзо: и вознесе тамо всесожженiя Господу и жертву спасенiя. |
8:32 См.: 🔗Втор. 17:18 🔗Втор. 27:3 | И написа иисусъ на каменiихъ вторый законъ, законъ Моисеовъ, егоже написа предъ сыны Израилевыми. |
8:33 | И весь Израиль, и старцы ихъ и судiи ихъ и книгочiя ихъ предходяху сюду и сюду предъ кивотомъ, и жерцы и левити воздвизаша кивотъ завѣта Господня, пришелецъ же и туземецъ: иже быша половина ихъ близъ горы гаризинъ, и половина ихъ близъ горы Гевалъ, якоже заповѣда Моисей рабъ Господень благословити людій Израилевыхъ въ первыхъ. |
8:34 См.: 🔗Втор. 28:1 | И по сихъ тако прочте иисусъ вся словеса закона сего, благословенiя и клятвы, по всему написанному въ законѣ Моисеовѣ. |
8:35 См.: 🔗Втор. 31:11 | Не бяше словесе от всѣхъ, яже заповѣда Моисей иисусу, егоже не прочте иисусъ во уши всего сонма сыновъ Израилевыхъ, мужемъ и женамъ, и дѣтемъ и пришелцемъ приходящымъ ко Израилю. |