Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 23 | |
23:1 | И рече Валаамъ къ Валаку: созижди мнѣ здѣ седмь требищъ, и уготовай мнѣ здѣ седмь телцевъ и седмь овновъ. |
23:2 | И сотвори Валакъ, якоже рече ему Валаамъ: и вознесе телца и овна на требище. |
23:3 | И рече Валаамъ къ Валаку: стани у требы своея, и пойду, аще явится мнѣ Богъ въ срѣтенiе, и слово, еже мнѣ укажетъ, повѣмъ тебѣ. И ста Валакъ у требы своея. |
23:4 | И Валаамъ иде вопросити Бога, и иде прямо: и явися Богъ Валааму. И рече къ нему Валаамъ: седмь требищъ изготовихъ и возложихъ телца и овна на требище. |
23:5 | И вложи Богъ слово во уста Валааму и рече: возвратився къ Валаку тако глаголи. |
23:6 | И возвратися къ нему: онъ же стояше у всесожженiй своихъ, и вси князи Моавли съ нимъ: и бысть Духъ Божiй на немъ. |
23:7 См.: 🔗Втор. 23:4 | И воспрiимъ притчу свою рече: от Месопотамiи приведе мя Валакъ царь Моавль, от горъ восточныхъ, глаголя: гряди, проклени ми Иакова, и гряди, проклени ми Израиля: |
23:8 См.: 🔗Нав. 24:10 | что проклену, егоже не кленетъ Господь? Или что зло реку, егоже не злословитъ Богъ? |
23:9 См.: 🔗Втор. 33:28 | Яко от верха горъ узрю его и от холмъ проуразумѣю его: се, людiе едини населятся и со языки не вмѣнятся: |
23:10 См.: 🔗Быт. 13:16 🔗3Цар. 19:4 | кто изслѣдитъ сѣмя Иаковле? И кто изочтетъ сонмы Израиля? Да умретъ душа моя въ душахъ праведныхъ, и буди сѣмя мое, якоже сѣмя ихъ. |
23:11 | И рече Валакъ къ Валааму: что сотворилъ еси ми? На проклятiе врагъ моихъ призвахъ тя, и се, благословилъ еси [я] благословенiемъ. |
23:12 См.: 🔗Втор. 32:31 | И рече Валаамъ къ Валаку: не елика ли вложитъ Богъ во уста моя, сiе сохраню глаголати? |
23:13 | И рече къ нему Валакъ: пойди еще со мною на мѣсто ино, съ негоже не узриши ихъ оттуду, но развѣ часть нѣкую ихъ узриши, всѣхъ же не узриши, и проклени ми ихъ оттуду. |
23:14 См.: 🔗Втор. 3:27 | И поя его на стражу села, на верхъ Истесанаго, и созда тамо седмь требищъ, и возложи телца и овна на требище. |
23:15 | И рече Валаамъ къ Валаку: стани у требы своея, азъ же пойду вопросити Бога. |
23:16 | И срѣте Богъ Валаама, и вложи слово во уста ему и рече: возвратися къ Валаку, и речеши сiя. |
23:17 | И возвратися къ нему: онъ же стояше у всесожженiй своихъ, и вси князи Моавли съ нимъ. И рече ему Валакъ: что глагола Господь? |
23:18 | И воспрiимъ притчу свою, рече: востани, Валакъ, и послушай, внуши свидѣтель, сыне Сепфоровъ: |
23:19 | не яко человѣкъ Богъ колеблется, ниже яко сынъ человѣческiй измѣняется: Той глаголаше, не сотворитъ ли? Речетъ, и не пребудетъ ли? |
23:20 | Се, благословляти приведенъ есмь: благословлю, и не отвращу: |
23:21 См.: 🔗Пс. 54:11 🔗Иер. 50:20 | не будетъ труда во Иаковѣ, ниже узрится болѣзнь во Израили: Господь Богъ его съ нимъ, слава царская на немъ: |
23:22 См.: 🔗Чис. 24:8 | Богъ изведый его изъ Египта, якоже слава единорога въ немъ: |
23:23 | нѣсть бо вражбы во Иаковѣ, ниже волхвованiя во Израили: во время наречется Иакову и Израилю, что совершитъ Богъ: |
23:24 См.: 🔗Быт. 49:9 | се, людiе яко львичища востанутъ, и яко левъ вознесется: не уснетъ, дондеже снѣстъ ловъ и кровь посѣченыхъ испiетъ. |
23:25 См.: 🔗Чис. 22:6 | И рече Валакъ къ Валааму: ни клятвами мнѣ клени ихъ, ниже благословенiемъ благослови ихъ. |
23:26 | И отвѣщавъ Валаамъ, рече къ Валаку: не рѣхъ ли ти, глаголя: слово, еже аще возглаголетъ Богъ, сiе сотворю? |
23:27 | И рече Валакъ къ Валааму: гряди, пойму тя на мѣсто ино, аще угодно будетъ Богу, и проклени ми ихъ оттуду. |
23:28 См.: 🔗Чис. 25:3 | И поя Валакъ Валаама на верхъ Фогора, простирающася въ пустыню. |
23:29 | И рече Валаамъ къ Валаку: созижди мнѣ здѣ седмь требищъ, и уготовай мнѣ здѣ седмь телцевъ и седмь овновъ. |
23:30 | И сотвори Валакъ, якоже рече ему Валаамъ: и вознесе телца и овна на требище. |