Книга Притчей Соломоновых, глава 19

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 19
19:1 См.: 🔗Прит. 28:6	Лучше есть убогъ ходяй въ простотѣ сво­ей, неже богатый строптивъ устны сво­ими и несмысленъ.
19:2 См.: 🔗Прит. 6:18	Идѣже нѣсть ученiя души, нѣсть добро, и иже скоръ есть ногама, поткнет­ся.
19:3 См.: 🔗Сир. 15:11 🔗Иак. 1:13	Неразумiе мужа погубляетъ пути его, и Бога виновна творитъ въ сердцы сво­емъ.
19:4 См.: 🔗Прит. 14:20	Богат­ст­во при­­лагаетъ други многи: нищiй же и от­ сущаго друга оставляемь бываетъ.
19:5 См.: 🔗Втор. 19:19 🔗Дан. 13:51	Свидѣтель лживъ безъ муки не будетъ: оклеветаяй же неправедно не убѣжитъ ея.
19:6	Мнози угождаютъ лицамъ царскимъ: всякъ же золъ бываетъ въ поношенiе мужеви.
19:7	Всякъ, иже убогаго брата ненавидитъ, и от­ содруже­ст­ва далече будетъ. Мысль благая вѣдящымъ ю при­­ближает­ся, мужъ же мудръ обрящетъ ю. Много творяй зла совершаетъ злобу, а иже раздражаетъ словесы, не спасет­ся.
19:8	Стяжавый мудрость любитъ себе, а иже сохраняетъ разумъ, обрящетъ благая.
19:9 См.: 🔗Прит. 21:28	Свидѣтель лживый не безъ муки будетъ, а иже разжизаетъ злобу, погибнетъ от­ нея.
19:10 См.: 🔗Прит. 30:21	Не пользуетъ безумному сладость, и аще рабъ начнетъ съ досажденiемъ обладати.
19:11 См.: 🔗Прит. 14:29	Милостивъ мужъ долготерпитъ, похвала же его превосходитъ законопреступныхъ.
19:12 См.: 🔗Есф. 7:9 🔗Рим. 13:4	Царево прещенiе подобно рыканiю львову, и якоже роса злаку, тако тихость его.
19:13 См.: 🔗Прит. 10:1	Студъ есть отцу сынъ безуменъ, и нечисты обѣты от­ мзды блудницы.
19:14 См.: 🔗Прит. 18:23	Домъ и имѣнiе раздѣляютъ отцы чадомъ: от­ Господа же сочетавает­ся жена мужеви.
19:15	Страхъ содержитъ мужа женонравна: душа же празднаго взалчетъ.
19:16 См.: 🔗Прит. 3:21 🔗Лк. 11:28	Иже хранитъ заповѣди, соблюдаетъ свою душу, а нерадяй о сво­ихъ путехъ погибнетъ.
19:17 См.: 🔗Пс. 40:2 🔗Мф. 10:42 🔗Мф. 25:40	Милуяй нища взаимъ даетъ богови, по даянiю же его воз­даст­ся ему.
19:18 См.: 🔗Прит. 13:25 🔗Прит. 23:13	Наказуй сына тво­его, тако бо будетъ благонадеженъ: въ досажденiе же не вземлися душею тво­ею.
19:19	Зло­уменъ мужъ много отщетит­ся: аще же губитель есть, и душу свою при­­ложитъ.
19:20	Слушай, сыне, отца тво­его наказанiя, да мудръ будеши въ послѣдняя твоя.
19:21 См.: 🔗Иов. 23:13 🔗Прит. 16:1	Многи мысли въ сердцы мужа: совѣтъ же Господень во вѣкъ пребываетъ.
19:22	Плодъ мужеви милостыня: лучше же нищь праведный, нежели богатъ лживъ.
19:23	Страхъ Господень въ животъ мужеви: а безстрашный водворит­ся на мѣстѣхъ, идѣже не наблюдает­ся разумъ.
19:24 См.: 🔗Прит. 26:15	Скрываяй въ нѣдрѣхъ руцѣ сво­и неправедно ниже ко устомъ сво­имъ при­­несетъ я.
19:25 См.: 🔗Прит. 21:11	Губителю раны прiемлющу, безумный коварнѣе будетъ: аще же обличаеши мужа разумна, уразумѣетъ чув­ст­во.
19:26 См.: 🔗Прит. 15:20	Безче­ст­вуяй отца и от­рѣваяй матерь свою срамоту прiиметъ и поношенiе.
19:27	Сынъ оставляяй хранити наказанiе отчее по­учит­ся словесемъ злымъ.
19:28 См.: 🔗Иов. 15:16	Выручаяй отрока несмыслена досаждаетъ оправданiю: уста же нечестивыхъ пожрутъ судъ.
19:29	Уготовляют­ся невоз­держнымъ раны, и мученiя подобнѣ неразумнымъ.