Книга Премудрости Иисуса, сына Сирахова, глава 27 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 27
27:1 См.: 🔗1Тим. 6:9	За скудость мнози согрѣшиша, и ищай обогатѣти от­вратитъ око.
27:2	Посредѣ собраныхъ каменiй вонзет­ся колъ, и посредѣ продаянiя и купли совершит­ся грѣхъ.
27:3	Аще не держит­ся страха Господня со тщанiемъ, вскорѣ превратит­ся домъ его.
27:4	Трясенiемъ решета останетъ сметiе: такожде отреби человѣчестiи въ помышленiи его.
27:5 См.: 🔗Прит. 27:21	Сосуды скудельничи искушаетъ пещь, и искушенiе человѣческо въ помышленiи его.
27:6 См.: 🔗Прит. 26:24	Воздѣланiе древа являетъ плодъ его: тако слово помышленiя въ сердцы человѣчестѣмъ.
27:7	Прежде бесѣды не похвали мужа: сiя бо искушенiе [есть] человѣковъ.
27:8	Аще гониши правду, постигнеши ю и облечешися въ ню яко въ подиръ славы.
27:9 См.: 🔗Сир. 13:12	Птицы съ подобными себѣ обитаютъ, и истина къ творящымъ ю обратит­ся.
27:10	Левъ ловитъ ловъ, такожде и грѣси дѣла­ю­щихъ неправду.
27:11 См.: 🔗Прит. 15:4 🔗Еф. 4:29	Повѣсть благо­честиваго всегда премудрость: безумный же яко луна измѣняет­ся.
27:12	Посредѣ безумныхъ блюди время, посредѣ же размышляющихъ учащай.
27:13	Повѣсть буихъ мерзость, и смѣхъ ихъ во услажденiи грѣха.
27:14 См.: 🔗Сир. 23:10 🔗Иов. 4:15	Бесѣда многокленущагося подъиметъ власы, и сваръ его затченiе ушесъ.
27:15	Пролитiе крове сваръ гордыхъ, и укоризна ихъ слухъ тяжкiй.
27:16 См.: 🔗Прит. 11:13 🔗Сир. 19:10	Открываяй тайная погубляетъ вѣрность и не обрящетъ друга противу души сво­ея.
27:17	Возлюби друга и увѣрися съ нимъ:
27:18	аще же от­крыеши тайны его, не имаши гнати по немъ.
27:19 См.: 🔗Сир. 6:14	Якоже бо погубитъ человѣкъ врага сво­его, тако погубиши дружбу искрен­няго:
27:20	и якоже птицу изъ руки тво­ея испустиши, тако испустилъ еси искрен­няго и не уловиши его:
27:21 См.: 🔗Сир. 37:2	не гонися за нимъ, яко далече от­ступи и избѣже яко серна от­ сѣти.
27:22 См.: 🔗Сир. 22:24	Яко струпъ есть обязати, и клеветы есть измѣна:
27:23	от­крывый же тайная погуби вѣрность.
27:24 См.: 🔗Прит. 10:10	Помизаяй окомъ куетъ зло, и никтоже его от­ставитъ от­ того:
27:25	предъ очима тво­има усладитъ уста своя и словесемъ тво­имъ подивит­ся,
27:26	послѣди же развратитъ уста своя и въ словесѣхъ тво­ихъ дастъ соблазнъ.
27:27	Многая воз­ненавидѣхъ и не обрѣтохъ подобна ему, и Господь воз­ненавидитъ его.
27:28 См.: 🔗Рим. 12:19	Вергаяй камень на высоту на главу свою вергаетъ, и язва льстива раздеретъ струпы.
27:29 См.: 🔗Прит. 26:27	Ископоваяй ровъ впадет­ся въ онь, и распростираяй сѣть увязнетъ въ ней.
27:30	Творяй зло ввалит­ся въ не и не познаетъ, от­куду прiидетъ ему.
27:31	Поруганiе и поношенiе гордыхъ, и от­мщенiе яко левъ уловитъ ихъ.
27:32	Сѣтiю уловят­ся веселящiися о паденiи благовѣрныхъ, и болѣзнь изнуритъ я прежде смерти ихъ.
27:33	Гнѣвъ и ярость, и сiя суть мерзость, и мужъ грѣшникъ одержанъ ими будетъ.