Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 34 | |
34:1 См.: 🔗Сир. 5:6 🔗Иер. 29:8 | Тщетны надежды и лживы [суть] неразумиву мужу, и сонiя вперяютъ безумныхъ. |
34:2 | Якоже емляйся за стѣнь и гоняй вѣтры, такожде емляй вѣру сномъ: |
34:3 | сiе по сему видѣнiе сновъ, прямо лицу подобiе лица. |
34:4 См.: 🔗Мф. 12:34 | От нечистаго что очистится, и от лживаго кая истина? |
34:5 | Волшебства и обаянiя и сонiя суетна суть, и якоже раждающiя сердцу мечтанiя бываютъ: |
34:6 | аще не от вышняго послана будутъ на посѣщенiе, не вдаждь въ ня сердца твоего: |
34:7 | многихъ бо прельстиша сонiя, и отпадоша надѣющеся на ня. |
34:8 | Безъ лжи совершится законъ, и премудрость во устѣхъ вѣрныхъ совершенiе. |
34:9 | Мужъ ученый увѣда много, и многоискусный повѣсть разумъ. |
34:10 | Иже не искусися, мало вѣсть: обходяй же страны умножитъ хитрость. |
34:11 | Много видѣхъ во обхожденiи моемъ, и вящшая словесъ моихъ разумъ мой: |
34:12 | многащи даже до смерти бѣдствовахъ, и спасенъ быхъ сихъ ради. |
34:13 См.: 🔗Пс. 55:12 | Духъ боящихся Господа поживетъ, *надежда бо ихъ на спасающаго я. |
34:14 | Бояйся Господа ни чего убоится и не устрашится, той бо надежда ему. |
34:15 См.: 🔗Пс. 127:1 | Боящемуся Господа блаженна душа: *чимъ одержится, и кто ему утвержденiе? |
34:16 См.: 🔗Пс. 33:16 | Очи Господни на любящыя его: защищенiе силы и утвержденiе крѣпости, покровъ от вара и покровъ въ полудне, храненiе от претыканiя и помощь от паденiя: |
34:17 | воздвизаяй душу и просвѣщаяй очи, изцѣленiе даяй, животъ и благословенiе. |
34:18 См.: 🔗Прит. 21:27 | Иже приноситъ жертву от неправды, приношенiе порочно, и не суть во благоволенiе дары беззаконныхъ. |
34:19 См.: 🔗Прит. 15:8 🔗Прит. 21:27 | Не благоволитъ вышнiй о приношенiи нечестивыхъ, ни множествомъ жертвъ очиститъ грѣхи. |
34:20 См.: 🔗Ис. 66:3 | Яко жряй сына предъ отцемъ его, тако приносяй жертвы от имѣнiя убогихъ. |
34:21 См.: 🔗Втор. 24:15 🔗Сир. 7:22 | Хлѣбъ убогимъ животъ убогихъ, лишаяй его человѣкъ кровей есть. |
34:22 См.: 🔗Лев. 19:13 | Убиваетъ искренняго отъемляй ему поживленiе, и проливаетъ кровь лишаяй мзды наемника. |
34:23 | Единъ созидаяй, а другій разоряяй, что успѣетъ болѣе, токмо трудъ? |
34:24 | Единому молящуся, а другому проклинающу, коего гласъ услышитъ Владыка? |
34:25 См.: 🔗Чис. 19:11 | Омываяйся от мертвеца и паки прикасаяйся ему, кая польза ему от бани? |
34:26 См.: 🔗2Пет. 2:22 | Тако человѣкъ постяйся о грѣсѣхъ своихъ и паки ходяй и таяжде творяй, мольбу его кто услышитъ, и что успѣ смиренiемъ своимъ? |